ជាតិ
ជនជាតិដើមភាគតិច ទាមទារឲ្យរដ្ឋាភិបាលអន្តរាគមន៍ការទន្ទ្រានដី និងការកាប់ព្រៃឈើខុសច្បាប់
×
ប្រជាពលរដ្ឋនៅភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគីរី ទាមទារឲ្យរាជរដ្ឋាភិបាលកម្ពុជាអន្តរាគមន៍អោយមានប្រសិទ្ធភាពទៅលើការទន្ទ្រានយកដីនិងការកាប់ព្រៃឈើខុសច្បាប់នៅកន្លែងរបស់ពួកគេរស់នៅ ពីសំណាក់ក្រុមហ៊ុន កៅស៊ូប៊ិញ ហឿក។
លោក វណ្ណា ខ្វើក ជនជាតិដើមភាគតិចនៅភូមិពូគង់ មានប្រសាសន៍ថា ជីវភាពរបស់លោកបានរងផលប៉ះពាល់យ៉ាងខ្លាំងពីការផ្ដល់សម្បទានដីសេដ្ឋកិច្ចនេះ ។ លោកថាផលប៉ះពាល់ដោយសារការទន្ទ្រានយកដី និងការកាប់ព្រៃឈើនៅក្នុងភូមិពូគង់ ពីសំណាក់ក្រុមហ៊ុន កៅស៊ូប៊ិញ ហឿក បាននិងកំពុងធ្វើឲ្យជីវភាពរស់នៅរបស់ប្រជាជននៅក្នុងសហគមន៍ ជាពិសេសជនជាតិដើមភាគតិចជួបការលំបាក ដូចជាការបាត់បង់ដីធ្លី ព្រៃឈើ ជីវភាព និង វប្បធម៌ជាដើម ។
ជនជាតិដើមភាគតិភូមិពូគង់រូបនេះបន្ថែមថា ៖«ព្រៃគឺជាជីវិតិរបស់យើង ជាពិសេស ដើមច្បោះ ដែលគឺជាធនធានធម្មជាតិដ៏សំខាន់ក្នុងការរកប្រាក់ចំណូលដើម្បីទ្រទ្រង់ជីវភាពរបស់សហគមន៍ ប៉ុន្តែនៅពេលនេះ ក្រុមហ៊ុនបានបំផ្លាញអស់ជាង ៨០ ភាគរយ នៃដើមច្បោះ ទាំងអស់ដែលយើងមាន» ។
នៅភូមិភូគង់ ជនជាតិដើមភាគតិចកំពុងមានវិវាទ ជាមួយនឹងក្រុមហ៊ុន កៅស៊ូប៊ិញ ហឿក ក្រចេះរ៉ាប់បឺរ ដែលទទួលបានដីសម្បទានសេដ្ឋកិច្ចពីរដ្ឋាភិបាលចំនួន ៨.៩២៦ ហិកតា សម្រាប់កិច្ចសន្យារយៈពេល ៧០ឆ្នាំ ដើម្បីធ្វើការអភិវឌ្ឍដំណាំ កសិឧស្សាហកម្ម ។
ពាក់ព័ន្ធនឹងបញ្ហានេះវេទិកានៃអង្គការមិនមែនរដ្ឋាភិបាលស្តីពីកម្ពុជា (NGOF) និងមជ្ឈមណ្ឌលអប់រំច្បាប់សម្រាប់សហគមន៍ (CLEC) រួមនឹងអ្នករងគ្រោះសហគមន៍ពូគង់ នឹងរៀបចំធ្វើសន្និសីទកាសែតនៅថ្ងៃទី១៨ មិនា ដើម្បីសម្តែងនូវក្តីកង្វល់របស់ពួកគេ នៅទីស្នាក់ការអង្គការមិនមែនរដ្ឋាភិបាល NGOF ។ នេះបើតាមសេចក្ដីជូនដំណឹងរបស់អង្គការមិនមែនរដ្ឋាភិបាល ៕
© រក្សាសិទ្ធិដោយ thmeythmey.com