អន្តរជាតិ
នយោបាយអន្តរជាតិ
ព្រះសង្ឃប្តឹងរដ្ឋមន្ត្រីក្រសួងមហាផ្ទៃមីយ៉ាន់ម៉ាលើការប្រើសាធាតុគីមីពុលដើម្បីបំបែកការតវ៉ា
×![]()
ព្រះសង្ឃសាសនាព្រះពុទ្ធត្រៀមប្តឹងរដ្ឋមន្ត្រីក្រសួងមហាផ្ទៃមីយាន់ម៉ា ប្រឆាំងទៅនឹងការបង្ក្រាបដែលប្រើប្រាស់សារធាតុគីមីពុលដើម្បីបំបែកហ្វូងបាតុករកាលពីឆ្នាំ២០១២ ។ បន្តឹងនេះក៏ធ្វើឡើង ក្នុងបំណងដើម្បីដាក់សម្ពាធលើរដ្ឋាភិបាលក្នុងដំណើរការកែទម្រង់លទ្ធិប្រជាធិបតេយ្យផងដែរ។
កញ្ញា ខន ចំប៉ា លម្អិតព័ត៌មាននេះ
នៅថ្ងៃម្សិលមិញនេះក្រុមព្រះសង្ឃ និងអង្គការសិទ្ធិមនុស្ស បានបញ្ជាក់ថាសមាគមព្រះសង្ឃកំពុងត្រៀមដាក់ពាក្យបណ្តឹងប្រឆាំងនឹងរដ្ឋមន្ត្រីក្រសួងមហាផ្ទៃមីយ៉ាន់ម៉ាពីបទប្រើប្រាស់សារធាតុគីមីពុល ដើម្បីបំបែកក្រុមអ្នកតវ៉ាកាលពីឆ្នាំ២០១២កន្លងទៅនេះ។
ក្នុងឆ្នាំ២០១២ មានការផ្ទុះការតវ៉ារបស់ក្រុមព្រះសង្ឃសាសនាព្រះពុទ្ធនៅក្នុងស្ថានីយ៍រ៉ែមួយកន្លែង នៅភាគពាយព្យប្រទេសមីយ៉ាន់ម៉ា ដើម្បីប្រឆាំងទៅនឹងក្រុមហ៊ុនចិនដែលទទួលបានអាជ្ញាបណ្ណពីរដ្ឋាភិបាលដើម្បីធ្វើអាជីវកម្ម ហើយបានធ្វើឲ្យមានការប៉ះពាល់ជីវភាពរស់នៅ និងបានធ្វើអោយបាត់បង់ដីរបស់ប្រជាជនដែលរស់នៅក្នុងតំបន់នោះ។
យ៉ាងណាមិញ បើយោងតាមអង្គការការពិតនៃយុត្តិធម៌ ដែលជាអង្គការសិទ្ធិមនុស្សប្រចាំមីយ៉ាន់ម៉ា យោងហោចណាស់មានព្រះសង្ឃ១០០អង្គ ត្រូវបានបញ្ជូនទៅសង្គ្រោះជាបន្ទាន់និង៥៦អង្គផ្សេងទៀតរងរបួសធ្ងន់ ដោយសារការដុតលើរូបរាងកាយ និងការប្រើប្រាស់នូវសារធាតុគីមីពុល នៅក្នុងការបង្ក្រាបបំបែកការតវ៉ារបស់អាជ្ញាធរមីយ៉ាន់ម៉ា។
ជាមួយគ្នានេះក្រុមព្រះសង្ឃបានបញ្ជាក់ថា គិតចាប់តាំងពីពេលនៃការកើតហេតុការណ៍នេះមកដល់បច្ចុប្បន្ន រដ្ឋាភិបាលមីយ៉ាន់ម៉ា មិនបានទទួលខុសត្រូវ និងមិនមានការកែទម្រង់ស្របទៅតាមតម្រូវការនៃការទាមទារនោះទេ។ ឆ្លើយទៅនឹងភាពអយុត្តិធម៌នេះ ក្រុមព្រះសង្ឃនឹងប្តឹងអាជ្ញាធរ ដែលមានរដ្ឋមន្ត្រីក្រសួងមហាផ្ទៃដែលជាអ្នកទទួលខុសត្រូវ លើការបង្រា្កបយ៉ាងសាហាវឃោរឃៅនេះ។ ក្រុមព្រះសង្ឃក៏បានបញ្ជាក់ទៀតថា គម្រោងនៃការប្តឹងនេះ ក៏មានគោលបំណងដើម្បីដាក់សម្ពាធទៅលើរដ្ឋាភិបាល ក្នុងដំណើរការនៃអនុវត្តលទ្ធិប្រជាធិបតេយ្យនៅក្នុងប្រទេសមីយ៉ាន់ម៉ាផងដែរ។
ទាក់ទិននឹងបញ្ហានេះដែរ មិនមានការឆ្លើយតបពីសំណាក់អាជ្ញាធរនិងរដ្ឋាភិបាលមីយ៉ាន់ម៉ានៅឡើយនោះទេ។ បើយោងតាមការអះអាងរបស់រដ្ឋាភិបាលមីយ៉ាន់ម៉ា មុនពេលនៃការបង្ក្រាបនោះ កងកម្លាំងរដ្ឋាភិបាលបានជូនដំណឹងទៅកាន់ក្រុមអ្នកតវ៉ាមុន៥ប្រាំនាទី ដើម្បីធ្វើការចាកចេញពីកន្លែងកើតហេតុ ក៏ប៉ុន្តែប្រជាជននិងព្រះសង្ឃមិនបានអនុវត្តន៍តាមបទបញ្ជានោះទេ។
គួរបញ្ជាក់ផងដែរថា ស្របពេលដែលការបោះឆ្នោតជាសកលរបស់មីយ៉ាន់ម៉ាខិតជិតមកដល់ ចលនាប្រឆាំងទៅនឹងរដ្ឋាភិបាលក៏ចាប់ផ្តើមផ្ទុះឡើងសារជាថ្មី ដើម្បីធ្វើការដាក់សម្ពាធទៅលើរដ្ឋាភិបាលឲ្យមានការកែទម្រង់។ ទោះបីយ៉ាងណាក៏ដោយ មិនមានលទ្ធផលជាផ្កែផ្កាណាមួយកើតឡើង ក្រោយការតវ៉ាឡើយ ពោលគឺក្រុមអ្នកតវ៉ាតែងតែទទួលបានមកវិញ នូវការបង្ក្រាបយ៉ាងហិង្សាពីសំណាក់រដ្ឋាភិបាល៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
