អន្តរជាតិ
នយោបាយអន្តរជាតិ
តួកគីជាសមាជិកណាតូតែមួយគត់ ដែលទិញប្រព័ន្ធមីស៊ីលការពារដែនអាកាសពីប្រទេសចិន
×
ប្រទេសចិនបានបញ្ជាក់ថា ខ្លួនបានយល់ព្រមលើកិច្ចព្រមព្រៀងក្នុងការលក់ប្រព័ន្ធមីស៊ីលការពារអាកាសHQ-9 ទៅឲ្យប្រទេសតួកគីកាលពីដើមសប្ដាហ៍នេះ ក្នុងអំឡុងពេលតាំងពិព័រណ៍ទ័ពសមុទ្រនិងអាវកាសអន្ដរជាតិក្នុងទីក្រុង Langkawiប្រទេសម៉ាឡេស៊ី។ នេះបើយោងតាមការផ្សាយរបស់ទូរទស្សន៍មជ្ឈឹមចិន CCTV ។
ប្រភពដដែលបានផ្សាយថា តំណាងសាជីវកម្មនាំចូលនិងនាំចេញគ្រឿងម៉ាស៊ីនជាតិចិន បាននិយាយថាFD 2000 របស់ប្រទេសចិនដែលជាម៉ូដែលមួយនៃប្រព័ន្ធមីស៊ីលការពារអាកាសHQ-9 មានកេរ្តិ៍ឈ្មោះល្បីល្បាញសម្រាប់ការនាំចេញនោះ ត្រូវបានតួកគីជ្រើសរើសយកសម្រាប់កិច្ចសន្យាទិញមួយកាលពីឆ្នាំ ២០១៣ ។
យោងតាមសេចក្ដីការណ៍របស់CCTVដដែលនេះ កិច្ចព្រមព្រៀងនៃការលក់FD-2000 ទៅឲ្យតួកគីនេះ គឺជាជ័យជម្នះដ៏ធំមួយរបស់ចិន ដែលបានយកឆ្នះលើការដេញថ្លៃពីសំណាក់ ប្រព័ន្ធមីស៊ីលការពារអាកាសPatriotរបស់អាមេរិកប្រព័ន្ធមីស៊ីលការពារអាកាសS-400របស់រុស្ស៊ីនិងប្រព័ន្ធមីស៊ីលការពារអាកាសSamp-T របស់ក្រុមហ៊ុនបារាំង-អ៊ីតាលី Eurosamផងដែរ។
ក្រុមអ្នកវិភាគនៅក្នុងប្រទេសតួកគីបាននិយាយថាមូលហេតុដែលតួកគីជ្រើសរើសយកក្រុមហ៊ុនចិននេះ គឺដោយសារតែហេតុផលបច្ចេកវិទ្យាក៏ដូចជាការចំណាយមានប្រសិទ្ធិភាពផងដែរ។
បន្ទាប់ពីប្រទេសតួកគីបានប្រកាសពីកិច្ចសន្យាទិញអាវុធជាមួយប្រទេសចិននេះរួចមក អគ្គលេខាធិការអង្គការណាតូលោក Anders Fogh Rasmussen បាននិយាយថាក្នុងរយៈពេលប៉ុន្មានថ្ងៃទៀតនេះ លោករំពឹងថាប្រទេសតួកគីនឹងការជ្រើសរើសយកប្រព័ន្ធមីស៊ីលការពារអាកាសណាដែលសម្ព័ន្ធមិត្តផ្សេងទៀតបាននិងកំពុងប្រើប្រាស់។
ចំណែកឯសហរដ្ឋអាមេរិកវិញ បានសម្តែងនូវក្តីបារម្ភយ៉ាងខ្លាំងទៅលើប្រទេសតួកគីដោយបាននិយាយថាប្រព័ន្ធការពារមីស៊ីលដែនអាកាសរបស់ចិននឹងមិនអាចធ្វើការស៊ីគ្នាបានជាមួយនឹងប្រព័ន្ធការពារដែនអាកាស របស់អង្គការណាតូដែលកំពុងប្រើបាននោះទេ៕
© រក្សាសិទ្ធិដោយ thmeythmey.com