ជាតិ
បទយកការណ៍ / បទសម្ភាសន៍
វត្តមាន Iphone និង Samsung ជំរុញអោយពលរដ្ឋខ្មែរជំពាក់បំណុលគេកាន់តែច្រើន!
×![]()
ដោយ: លីម តុលា
ភ្នំពេញ៖ កាលពីពេលមុន ពលរដ្ឋខ្មែរសុខចិត្តខ្ចីបុលគេដោយសារជំងឺ, ដោយសារការសាងសង់លំនៅដ្ឋាន, ដោយសារការរៀបអាពាហ៍ពិពាហ៍ជូនកូនចៅ, ដោយសារជំនួញ។ល។ ប៉ុន្តែនៅក្នុងយុគសម័យបច្ចេកវិទ្យានេះ ពលរដ្ឋខ្មែរមួយចំនួនសុខចិត្តខ្ចីបុលគេដើម្បីទិញសម្ភារបច្ចេកវិទ្យាព័ត៌មាន ដូចជា ការទិញកុំព្យូទ័រ, ការទិញទូរសព្ទដៃ។ល។ ជាការកត់សម្គាល់ជាក់ស្តែង ពលរដ្ឋខ្មែរកាន់តែច្រើនឡើងៗជំពាក់បំណុលគេដោយសារតែវត្តមាន Iphone និង Samsung នៅក្នុងប្រទេសកម្ពុជា។
ស្ថិតក្នុងជីវភាពលំបាកគួរសម យុវជន សុខ ចំរើន មានអាជីពជាជាងកាត់សក់មួយកន្លែងនៅទីក្រុងភ្នំពេញ បានបង្ហាញអារម្មណ៍ដោយមិនខ្មាសអៀនថា ខ្លួនគេត្រូវតែមាន Iphone មួយគ្រឿងប្រើប្រាស់នឹងគេដែរ ទោះបីជាចាស់ ឬថ្មីក៏ដោយ។
កាត់សក់បណ្តើររៀបរាប់ប្រាប់បណ្តើរថា គាត់សុខចិត្តសន្សំមួយថ្ងៃ១ដុល្លារ ឬ២ដុល្លារដើម្បីទិញ Iphone 5 ដែលគេប្រើរួចហើយក្នុងតម្លៃជាង២០០ដុល្លារ។ លោកមិនមានថវិកាគ្រប់ចំនួនដើម្បីទិញទេ។ តែលោកបានបង្ខំចិត្តខ្ចីពីថៅកែរបស់លោកបន្ថែមទៀត។
លោក ចំរើន អាយុប្រមាណជា៣០ឆ្នាំ សុខចិត្តបេះពីមាត់ពីករសន្សំប្រាក់បានជាង១០០ដុល្លារអាមេរិកខ្លួនឯងដោយចំណាយរយៈពេលអស់ជាច្រើនខែ។ ដើម្បីបង្គ្រប់ចំនួនជាង២០០ដុល្លារលោកក៏បានសម្រេចចិត្តខ្ចីប្រាក់ពីថៅកែបន្ថែមជាង១០០ដុល្លារទៀត។ «ខ្ញុំស្រឡាញ់ទូរសព្ទទំនើប។ ខ្ញុំចង់ប្រើដូចគេដែរ ដូច្នេះ ខ្ញុំត្រូវតែសន្សំ និងសុខចិត្តខ្ចីប្រាក់ពីថៅកែខ្ញុំបង្គ្រប់។ ខ្ញុំប្រើប្រាស់វាដើម្បីទូរសព្ទ និងឆែកមើលហ្វេសប៊ុកតាមដានព័ត៌មាន»។ នេះគឺជារៀបរាប់ប្រាប់របស់យុវជន ចំរើន។
ក្រោយពីទិញទូរសព្ទហើយ ចំរើន ត្រូវដកប្រាក់៣០ដុល្លារពីប្រាក់ចំណូលប្រចាំខែជាង១០០ដុល្លាររបស់ខ្លួនដើម្បីសងទៅថៅកែជារៀងរាល់ខែ។ ទឹកមុខស្រពោនបន្តិច ចំរើន បានបន្តទៀតថា គាត់ត្រូវតែទ្រាំធ្វើដូច្នេះ ពីព្រោះ គាត់ស្រឡាញ់ទូរសព្ទ។ នារីម្នាក់ទៀតឈ្មោះ ភារី អាយុជាង២០ឆ្នាំដែលធ្វើការជាមួយ ចំរើន ដែរនោះ ក៏បានឆ្លើយបន្ទរមកទៀតថា បុគ្គលិកនៅទីនេះ ខ្ចីលុយថៅកែទិញ Iphone គ្រប់គ្នា។ «ពួកយើងជំពាក់បំណុលគេគ្រប់គ្នា»។ ភារី បញ្ជាក់យ៉ាងដូច្នេះ ជាមួយនឹងសម្តីលេងសើចលាយឡំជាមួយនឹងក្តីបារម្ភតិចតួច។ សម្រាប់ ភារី ទិញទូរសព្ទ Iphone (ទូរសព្ទប្រើរួចហើយ) គឺដើម្បីមើលហ្វេសប៊ុក មើល Youtube។ល។
នៅក្នុងក្រុមហ៊ុនឯកជនមួយទៀត យុវជន ចាន់ណា អាយុជាង២០ឆ្នាំមកពីខេត្តកំពង់ធំ ហើយកំពុងបម្រើការអោយក្រុមហ៊ុនមួយនៅទីក្រុងភ្នំពេញ ក៏សុខចិត្តខ្ចីបុលពីថៅកែដើម្បីទិញទូរសព្ទ Samsung Galaxy S4 ជជុះក្នុងតម្លៃ១៧០ដុល្លារដែរ។ មុននឹងទិញទូរសព្ទនេះ យុវជន ចាន់ណា ធ្លាប់ស្រមៃចង់បានអស់រយៈពេលជាច្រើនខែមកហើយ។ «ខ្ញុំឃើញគេប្រើទូរសព្ទទំនើប ខ្ញុំស្រឡាញ់ណាស់។ ថ្ងៃមួយខ្ញុំសម្រេចចិត្តខ្ចីលុយថៅកែខ្ញុំដើម្បីទិញវា។ ឥឡូវខ្ញុំទិញបានហើយ ខ្ញុំស្រឡាញ់វាណាស់។ ខ្ញុំលេងហ្វេសប៊ុក និងតាមដានព័ត៌មាន»។ នេះគឺជាបញ្ជាក់ប្រាប់របស់យុវជន ចាន់ណា។
សព្វថ្ងៃ ចាន់ណា មានទូរសព្ទថ្មីប្រើប្រាស់ក្នុងដៃយ៉ាងសង្ហារមែន។ តែ ចាន់ណា ត្រូវមានកាតព្វកិច្ចសងបំណុលទៅថៅកែវិញចំនួន៣០ដុល្លារក្នុងមួយខែដោយដកពីប្រាក់ខែសរុបរបស់ខ្លួនចំនួន៨០ដុល្លារក្នុងមួយខែ។ ក្រោយពីដកសងបំណុល៣០ដុល្លាររួចហើយ ចាន់ណា នៅសល់៥០ដុល្លារដើម្បីចិញ្ចឹមជីវិតប្រចាំថ្ងៃ។ សម្រាប់ ចាន់ណា ប្រាក់អស់មែន តែ ចាន់ណា សប្បាយចិត្ត។ ជារៀងរាល់ថ្ងៃ យុវជន ចាន់ណា ចុចទូរសព្ទស្ទើរគ្រប់ពេលដែលពេលខ្លះ ធ្វើអោយថៅកែរបស់គាត់មិនសប្បាយចិត្តទៅវិញ។
ថៅកែមួយចំនួនដែលត្រូវបានសម្ភាន៍បានទទួលស្គាល់ថា កម្មករ បុគ្គលិកមួយចំនួនធំនាំគ្នាខ្ចីប្រាក់ដើម្បីទិញទូរសព្ទ។ ការទិញនេះផ្តល់ផលប្រយោជន៍ដល់ក្រុមហ៊ុនផង និងសម្រាប់បុគ្គលិកកម្មករខ្លួនឯងផង។
ក្នុងរយៈពេលប៉ុន្មានឆ្នាំចុងក្រោយនេះ ប្រជាពលរដ្ឋខ្មែរស្ទើរជាង៥០%មាននិន្នាការខ្ចីបុលពីធនគារកាន់តែច្រើន មាននិន្នាការខ្ចីពីមីក្រូហិរញ្ញវត្ថុកាន់តែច្រើន មាននិន្នាការខ្ចីបុលដើម្បីទិញទូរសព្ទកាន់តែច្រើន។
ជាក់ស្តែង យុវជន ជាពិសេស បានខ្ចីបុលគេផ្លូវការ និងមិនផ្លូវការជាច្រើនដើម្បីទិញទូរសព្ទដៃ Iphone និងSamsung។ Iphone និងSamsung មិនមែនគ្រាន់តែជាសម្ភារសម្រាប់ប្រើប្រាស់ទំនាក់ទំនងគ្នាប៉ុណ្ណោះទេ។ តែ Iphone និងSamsung ត្រូវបានគេសន្មត់ថា ជាវត្ថុមានតម្លៃ និងលើកតម្លៃអ្នកប្រើប្រាស់ទៅវិញ។ កាន់ Iphone និងSamsung នៅក្នុងដៃធ្វើអោយម្ចាស់ទូរសព្ទមានមោទនភាពខ្លួនឯង និងធ្វើអោយអ្នកនៅជុំវិញខ្លួនកោតសរសើរ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
