ជាតិ
នយោបាយជាតិ
លោក កឹម សុខា នឹងត្រឡប់មកកម្ពុជាវិញនៅថ្ងៃទី ២៥ មីនា
×
ភ្នំពេញ៖ អនុប្រធានគណបក្សសង្គ្រោះជាតិលោក កឹម សុខា នឹងត្រឡប់មកកម្ពុជាវិញនៅថ្ងៃទី ២៥ ខែមីនាស្អែកនេះ បន្ទាប់ពីជួបជាមួយអ្នកគាំទ្ររបស់ខ្លួនអស់ជាច្រើនថ្ងៃនៅអាមេរិក។ នេះបើតាមការបញ្ជាក់របស់លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ ។
មានសំឡេង
ទោះបីជាត្រូវបានលោកនាយករដ្ឋមន្ត្រី ហ៊ុន សែន គំរាមចាត់វិធានផ្លូវច្បាប់ក៏ដោយ ក៏លោក កឹម សុខា ត្រឡប់មកកម្ពុជាវិញ ដោយមិនមានភាពភ័ខ្លាចនោះឡើយ។ ថ្លែងប្រាប់សារ ព័ត៌មានថ្មីៗជំនួសឲ្យលោក កឹម សុខា អ្នកពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បញ្ជាក់ថា លោក កឹម សុខា មិនបារម្ភពីការចាប់ខ្លួនពីសំណាក់រដ្ឋាភិបាលកម្ពុជានោះទេ។ លោកថា លោក កឹម សុខា មិនបានធ្វើអ្វីខុសផង មានរឿងអ្វី ដែលត្រូវខ្លាចនោះ។
«ការផ្លាស់ប្តូរជាពាក្យដែលអ្នកនយោបាយប្រើជាធម្មតានៅក្នុងស្រុកប្រជាធិបតេយ្យ។ ខ្ញុំគិតថា ការគំរាមរបស់លោក ហ៊ុន សែន គ្រាន់តែជាការស្រែកតាមអ្នកនាំពាក្យខ្លួនប៉ុណ្ណោះ» ។ នេះជាការបញ្ជាក់របស់លោក យ៉ែម បុញ្ញឫទ្ធិ ។
ក្នុងកិច្ចសម្ភាសន៍ជាមួយវិទ្យុអាស៊ីសេរីកន្លងមក លោក កឹម សុខា បានបដិសេធថា លោកមិនបាននិយាយពាក្យថាផ្ដួលរំលំរដ្ឋាភិបាលនោះទេ ។ « គឺអាចសម្ដេចហ៊ុន សែន លោកទទួលបានរបាយការណ៍ពីណាមកច្រឡំ ឬក៍ដោយសារអ្នកព័ត៌មានយកពាក្យពេចន៍ខ្ញុំ យកទៅនិយាយមិនពិត ។ គឺខ្ញុំអត់បានប្រើពាក្យថាផ្ដួលរំលំរដ្ឋាភិបាល ឬគណបក្សកាន់អំណាចនោះទេ ។ នៅក្នុងសំឡេងរបស់ខ្ញុំនិយាយនេះ ខ្ញុំនិយាយជាសាធារណៈ ខ្ញុំអត់មានប្រើពាក្យផ្ដួលរំលំទេ ។ ខ្ញុំបានទាំងបដិសេធថា គណបក្សសង្គ្រោះជាតិយើងនេះ ខ្ញុំនិងលោក សម រង្ស៊ីដឹកនាំនេះគឺគ្មានគោលនយោបាយផ្ដួលរំលំ និងប្រើអំពើហិង្សាទេ »។ នេះជាការបញ្ជាក់របស់លោក កឹម សុខា ។
គួររម្លឹកថា នៅថ្ងៃទីទី១៨ ខែមីនាកន្លងមកនេះ ក្នុងពិធីសម្ពោធផ្លូវមួយខ្សែនៅខេត្តបន្ទាយមានជ័យ លោកនាយករដ្ឋមន្ត្រី ហ៊ុន សែន បានបញ្ជាឲ្យពិនិត្យមើលពីអំណាចច្បាប់ ដើម្បីចាត់វិធានការចំពោះ លោក កឹម សុខា ដែលលោកអះអាងថា អនុប្រធានគណបក្សសង្គ្រោះជាតិរូបនេះ បានប្រាប់អ្នកគាំទ្រនៅអាមេរិកថា បានបរាជ័យក្នុងការរៀបគម្រោងផ្តួលរំលំរដ្ឋាភិបាលនោះ។
ដោយឡែក កាលពីយប់ថ្ងៃ១៩ មីនា ប្រធានគណបក្សសង្គ្រោះជាតិលោក សម រង្ស៊ី បានចាកចេញពីប្រទេសកម្ពុជាឆ្ពោះទៅកាន់ប្រទេសនៅតំបន់អឺរ៉ុប ។ ដោយដំណើររបស់លោក សម រង្ស៊ី ដែលមានអមដោយភរិយារបស់ខ្លួន និងមន្ត្រីគណបក្សសង្គ្រោះជាតិមួយចំនួនទៅកាន់ប្រទេសអឺរ៉ុបជាពិសេសក្នុងប្រទេសបារាំងនោះ ធ្វើឡើងក្នុងគោលដៅ ដើម្បីជួបអ្នកគាំទ្រខ្លួនពន្យល់ពីស្ថានការណ៍នយោបាយកម្ពុជាបច្ចុប្បន្ន ៕
© រក្សាសិទ្ធិដោយ thmeythmey.com