ជាតិ
×![]()
ដោយ: ខន ចំប៉ា
ទឹកប្រាក់ប្រមាណ២៧,៣១៥លានយ៉េនស្នើនឹងប្រមាណ ២២៨,៧១១,៤៩៩ដុល្លារដែលជាកម្ចីឥតសំណងនិងកម្ចីសម្បទានរបស់រដ្ឋាភិបាលជប៉ុននឹងត្រូវចុះហត្ថលេខាផ្តល់ និងទទួល នៅថ្ងៃទី៣០មីនា ខាងមុខនេះនៅទីស្តីក្រសួងការបរទេស និងសហប្រតិបត្តការអន្តរជាតិ។នេះបើតាមសេចក្តីជូនដំណឹងរបស់ក្រសួងការបរទេសនិងសហប្រតិបត្តិការអន្តរជាតិ។
សេចក្តីជូនព័ត៌មានដែលចេញផ្សាយនៅថ្ងៃទី២៦មីនានេះបានឲ្យដឹងថាលោកហោ ណាំហុងរដ្ឋមន្ត្រីក្រសួងការបរទេស និងសហប្រតិបត្តការអន្តរជាតិនិងលោកគូម៉ាម៉ារូយូជិឯកអគ្គរាជទូតជប៉ុនប្រចាំកម្ពុជានឹងចុះហត្ថលេខាលើកម្ចីនេះក្រោមអធិបតីភាពលោកនាយករដ្ឋមន្ត្រីហ៊ុនសែន។
បើតាមសេចក្តីជូនព័ត៌មានដដែលកម្ចីនិងសម្បទាននេះនឹងយកទៅអនុវត្តន៍លើគម្រោងចំនួន៥រួមមាន៖
១. គម្រោងជំនួយឥតសំណងចំនួន៣ដែលមានទឹកប្រាក់៤,២៩១លានយ៉េនឬប្រមាណ៣៥,៩២៩,០១៥លានដុល្លារផ្តោតលើគម្រោងកែលម្អមន្ទីរពេទ្យ គម្រោងអភិវឌ្ឍន៍ប្រព័ន្ធគ្រប់គ្រងចរាចរណ៍នៅទីក្រុងភ្នំពេញ និងគម្រោងជំនួយឥតសំណងបន្ថែម សម្រាប់គម្រោងសាងសង់ និងកែលម្អរោងចក្រវារីអគ្គិសនីខ្នាតតូចនៅខេត្តរតនគិរី។
២. គម្រោងកម្ចីសម្បទានចំនួន២ដែលមានទឹកប្រាក់ចំនួន២៣,០២៤លានយ៉េនឬប្រមាណ១៩២,៧៨២,៤៨៤ដុល្លារ ផ្តោតលើគម្រោងពង្រីកប្រព័ន្ធបញ្ជូន និងចែកចាយអគ្គិសនីនៅរាជធានីភ្នំពេញជំហានទី២និងគម្រោងធ្វើឲ្យប្រសើរឡើងនូវផ្លូវជាតិលេខ៥ «កំណាត់ផ្លូវពីធ្លាម្អម-បាត់ដំបង និងសិរីសោភ័ណ្ឌ» ៕
© រក្សាសិទ្ធិដោយ thmeythmey.com
