ពីនេះ ពីនោះ
បុគ្គលិកដែលផ្លាស់ប្តូរការងារពី២ទៅ៣កន្លែងក្នុងមួយឆ្នាំជាបុគ្គលិក«គ្រោះថ្នាក់»ឬ?
×
ជាធម្មតា ការផ្លាស់ប្តូរការងាររបស់បុគ្គលិកកម្មករនៅក្នុងវិស័យឯកជន ជាសិទ្ធិរបស់បុគ្គលដែលជាបុគ្គលិករបស់ស្ថាប័ន។ ការផ្លាស់ប្តូរការងារអាចបណ្តាលមកពីកត្តាមួយចំនួន ក្នុងនោះមាន៖ ទី១ ប្រាក់ខែនៅកន្លែងចាស់តិចពេក។ ទី២ បរិយាកាសការងារកន្លែងចាស់មិនសូវល្អ និងទី៣ ការងារកន្លែងចាស់មិនបានផ្តល់ចំណេះដឹងថ្មី(ខ្វះChallenge)។ ជាលក្ខណៈធម្មជាតិរបស់មនុស្ស បុគ្គលិកមិនអាចធ្វើការងារមួយកន្លែងអស់មួយជីវិតនោះទេ ពួកគេត្រូវការផ្លាស់ប្តូររកអ្វីដែលថ្មី ដែលលំបាកជាងមុន ឬស្រួលជាងមុន។
«ផ្លាស់ប្តូរញឹកញាប់»អនុញ្ញាតអោយអ្នកផ្លាស់ប្តូរការងារអាចទទួលបានផលប្រយោជន៍ច្រើនមែន។ ប៉ុន្តែថៅកែ អ្នកគ្រប់គ្រង និងទីភ្នាក់ងារជ្រើសរើសបុគ្គលិក ផ្តល់អនុសាសន៍ថា អ្នកស្វែងរកការងារធ្វើ មិនគួរផ្លាស់ប្តូរការងារធ្វើពី២ទៅ៣កន្លែងក្នុងរយៈមួយឆ្នាំនោះឡើយ។ ក្នុងអារម្មណ៍អ្នកជ្រើសរើសបុគ្គលិក ពួកគេពិចារណាលើ២ចំណុច។ ទី១ បុគ្គលិកនោះជាបុគ្គលពូកែ ដូច្នេះ ស្ថាប័នផ្សេងៗដណ្តើមគ្នាទទួលយកគាត់។ ប៉ុន្តែ ចំណុចទី២វិញ ពួកគេគិតថា ប្រហែលជាបុគ្គលិកនោះ គិតតែពីផលប្រយោជន៍ហើយ បានជាគិតតែពីរត់ពីក្រុមហ៊ុនមួយទៅក្រុមហ៊ុនមួយផ្សេងទៀតមិនចេះឈប់ឈរ។
សម្រាប់អ្នកដឹកនាំ ពួកគេរអែងអារម្មណ៍បន្តិចមុននឹងជ្រើសរើសបុគ្គលិកដែលផ្លាស់ប្តូរការងារពី២ទៅ៣កន្លែងក្នុងរយៈពេលមួយឆ្នាំ ពីព្រោះ ពួកគេបារម្ភខ្លាចថា បុគ្គលិកថ្មីនោះ អាចរត់ចេញពីក្រុមហ៊ុនរបស់គេដដែលនៅថ្ងៃណាមួយ។
អ្នកដឹកនាំក្រុមហ៊ុន ទីភ្នាក់ងារជ្រើសរើសបុគ្គលិកផ្តល់ជាគំនិតថា បុគ្គលិក កម្មករ គួរធ្វើការអោយស្ថាប័នរបស់ខ្លួនអោយបានរយៈពេលយ៉ាងតិច២ឆ្នាំមុននឹងធ្វើការផ្លាស់ប្តូរទៅរកកន្លែងថ្មី ប្រសិនបើប្រាក់ខែចាស់អាចទទួលយកបាន ហើយការគ្រប់គ្រងមានលក្ខណៈអាចទទួលយកបាន។ តែបើប្រាក់ខែតិច ហើយការគ្រប់គ្រងរញ៉េរញ៉ៃដូចចាប់ក្តាមដាក់ចង្អៀរនោះ កម្មករបុគ្គលិកអាចផ្លាប់ប្តូរបានគ្រប់ពេលវេលា៕
© រក្សាសិទ្ធិដោយ thmeythmey.com