ជាតិ
សង្គមជាតិ
ស្ពានអ្នកលឿងស្ថិតក្នុងចន្លោះលេខ ៣០ ដល់ ៤០ បើប្រៀបនឹងស្ពានលើលោក
× នៅថ្ងៃនេះ លោកនាយករដ្ឋមន្ត្រី ហ៊ុន សែន បានចូលរួមក្នុងពិធីសម្ពោធដាក់ឲ្យប្រើប្រាស់ស្ពានអ្នកលឿង ឬស្ពាន ត្សឹបាសា (Tsubasa) ជាផ្លូវការ។ ស្ពាននេះកសាងឡើង ក្រោមជំនួយឥតសំណងរបស់រដ្ឋាភិបាលជប៉ុនដែលចំណាយទឹកប្រាក់សរុបចំនួន ៩៥ លានដុល្លារអាមេរិក។ ក្រុមវិស្វករ បានវាយតម្លៃថា ស្ពាននេះស្ថិតក្នុងចំណាត់ថ្នាក់ចន្លោះពីលេខ ៣០ ដល់លេខ ៤០ នៅលើពិភពលោក ជាស្ពានដែលវែងនិងល្អជាងគេ ។
តំណាងក្រុមវិស្វករជប៉ុន លោក Abe Yoshinori បានអះអាងថា ស្ពានអ្នកលឿងនេះ ជាស្ពានដែលល្អ និងវែងស្ថិតនៅក្នុងលំដាប់ថ្នាក់លេខ ៣០ ដល់ ៤០ បើប្រៀបធៀបជាមួយស្ពាននៅលើពិភពលោក។ ហើយវាក៏ជាស្ពានខ្សែកាព ដែលមានប្រវែងវែងបំផុត ដូចនៅប្រទេសជប៉ុនផងដែរ ។
បើតាមលោក Abe Yoshinori ស្ពាននេះ នឹងប្រើប្រាស់រយៈពេល ១០០ ឆ្នាំដោយមិនមានការជួសជុល ហើយរថយន្តដឹកជញ្ជូនដែលអាចឆ្លងកាត់ស្ពាននេះបានមិនឲ្យលើសពី ២៥ តោននោះឡើយ។ «តែនេះមិនមែនមានន័យថា ស្ពានថា ស្ពាននេះមិនអាចទ្រទំងន់លើសពី ២៥ តោននោះទេ គឺអាចទ្របាន តែដើម្បីកុំឲ្យរថយន្តដឹកធ្ងន់ឆ្លងកាត់ស្ពាននេះ យើងត្រូវកំណត់មិនឲ្យលើស ២៥ តោន» ។ នេះជាការបញ្ជាក់របស់អ្នកជំនាញខាងលើ។
លោកតំណាងវិស្វករជប៉ុនបន្ថែមថា បន្ទាប់ពីស្ពាននេះ ដាក់ឲ្យដំណើរការ ខាងភាគីជប៉ុននឹងធានាមើលការខុសត្រូវរយៈពេល ១ ឆ្នាំ ក្រោយមកនឹងប្រគល់ជូនរដ្ឋាភិបាលមើលការខុសត្រូវវិញ។
សូមបញ្ជាក់ថា ស្ពានអ្នកលឿង តភ្ជាប់ស្រុកពីរ ស្ថិតនៅត្រើយម្ខាងៗនៃទន្លេមេគង្គក្រោម គឺស្រុកលើកដែកខេត្តកណ្ដាល និងស្រុកពាមរខេត្តព្រៃវែង។ស្ពានអ្នកលឿងនេះ ចាប់ផ្តើមសាងសង់នៅ ថ្ងៃទី ៧ ខែធ្នូ ឆ្នាំ២០១០ មានបណ្តោយ ៥,៤ គីឡូម៉ែត្រ និងទទឹងជាង ១៣ ម៉ែត្រ បែងចែក ៥ ផ្នែកធំៗហើយមានសរសរចំនួន ៣៥ ។ ស្ពាននេះ កសាងឡើងក្រោមជំនួយឥតសំណងពីរដ្ឋាភិបាលជប៉ុន ដែលចំណាយទឹកប្រាក់សរុបចំនួន ៩៥ លានដុល្លារអាមេរិក។ អ្នកស្ថាបនាស្ពាននេះ មានអ្នកគ្រប់គ្រងជប៉ុនចំនួន ៩ នាក់ បុគ្គលិកប្រទេសទី៣ ចំនួន២៥ នាក់ បុគ្គលិកកម្ពុជាចំនួន ៥៧ នាក់ និងកម្មករកម្ពុជា ចំនួន ៦៤៧ នាក់៕ © រក្សាសិទ្ធិដោយ thmeythmey.com