ជាតិ
អាជ្ញាធរអប្សរាធ្វើបទបង្ហាញស្តីពីបច្ចេកវិទ្យាLIDAR នៅតំបន់រមណីយដ្ឋានអង្គរ
×
សៀមរាប៖ ដើម្បីឲ្យដឹងពីអត្ថប្រយោជន៍របស់ប្រព័ន្ធបច្ចេកវិទ្យាLIDAR អាជ្ញាធរអប្សរា ដែលយកបច្ចេកវិទ្យានេះមកប្រើតាំងពីឆ្នាំ២០១២មក បានរៀបចំបទបង្ហាញមួយស្តីពីការសិក្សាស្រាវជ្រាវថ្មី នៅព្រះរាជាណាចក្រកម្ពុជា តាមរយៈបច្ចេកវិទ្យា LIDAR។ អ្នកចូលរួមមានបុគ្គលិក មន្ត្រីពាក់ព័ន្ធ មគ្គុទ្ទេសក៍ និស្សិត និងក្រុមអ្នកសារព័ត៌មានជាដើម។
សិក្ខាកាមប្រមាណ២០០នាក់ បានចូលរួមក្នុងបទបង្ហាញពី ការសិក្សាស្រាវជ្រាវថ្មីរបស់ប្រព័ន្ធបច្ចេកវិទ្យាLIDAR។ យោងតាមឯកសារបញ្ជាក់ថា នៅខែមេសា ឆ្នាំ២០១២ LIDAR ត្រូវបានប្រើប្រាស់នៅលើផ្ទៃដីប្រមាណ ៣០០គីឡូម៉ែត្រការេ ដើម្បីឆ្លុះមើលផ្នែកកណ្តាលនៃឧទ្យានអង្គរ កោះកែរ និងភ្នំគូលែន ក្នុងគោលបំណងទទួលបានរូបភាពច្បាស់សុក្រឹត និងមានទំហំពិតប្រាកដ។
ជាទូទៅ LIDAR ត្រូវបានប្រើបង្កើតឡើងដំបូងសម្រាប់យកទៅធ្វើជាមធ្យោបាយស្រាវជ្រាវអំពីព្រៃឈើ ការប្រើប្រាស់ដីធ្លី ធនធានរ៉ែ និងធនធានទឹកជាដើម។ នៅឆ្នាំ២០១២ មានស្ថាប័នស្រាវជ្រាវជាតិ និងអន្តរជាតិចំនួន៨ បានចូលរួមសហប្រតិបត្តិការ មិនធ្លាប់មាននៅអង្គរ និងមានតំណាងប្រទេសចំនួន៧ បានចូលថវិកា ដើម្បីនាំបច្ចេកវិទ្យា LIDAR មកប្រើប្រាស់។
ជាធម្មតានៅតំបន់អង្គរ មិនអនុញ្ញាតឲ្យយន្តហោះហោះហើរទេ តែគម្រោងLIDAR ត្រូវបានអនុញ្ញាតជាពិសេស ដើម្បីអាចថតយករូបភាពពីខាងលើតំបន់មួយនេះ។ ជាលទ្ធផល ដែលទទួលបានហួសពីការស្មាន រួមមាន ការដឹងពីការហូរច្រោះដីយ៉ាងខ្លាំងនៅសម័យអង្គរ ការពង្រីកក្រុងនៅជុំវិញអង្គរវត្ត រចនាសម្ព័ន្ធព្រមទាំងទំនប់ទឹកជាច្រើននៅរមណីយដ្ឋានភ្នំគូលែន ការរៀបចំដីកសិកម្ម និងវិស្វកម្មស្របទៅតាមស្ថានភាពដីនៅកោះកែរ។
គួរបញ្ជាក់ថា បទបង្ហាញនេះធ្វើឡើងនៅថ្ងៃទី៦ ខែមេសា ដែលរៀបចំឡើងនៅស្នាក់ការអាជ្ញាធរអប្សរា៕
© រក្សាសិទ្ធិដោយ thmeythmey.com