ខ្មែរក្រហម
ជាតិ
សាលាក្តីខ្មែរក្រហមទុកពេលឲ្យភាគីពាក់ព័ន្ធពិនិត្យឯកសារលើសំណុំរឿង០០៣ និង០០៤
× ភ្នំពេញ៖ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានផ្អាកសវនាការលើសំណុំរឿង ០០២ រយៈពេលជាង២សប្តាហ៍ ពោលគឺចាប់ថ្ងៃទី៦ មេសា រហូតដល់ថ្ងៃទី២១ ខែមេសា ឆ្នាំ២០១៥ ដើម្បីទុកពេលវេលាឲ្យដើមបណ្តឹងរដ្ឋប្បវេណី និងភាគីពាក់ព័ន្ធពិនិត្យមើលឯកសារពាក់ព័ន្ធជាង ៣ពាន់ទំព័រដែលបានដកស្រង់ចេញពីសំណុំរឿង ០០៣ និង០០៤ ។
អង្គជំនុំជម្រះសាលាក្តីខ្មែរ បានសម្រេចផ្អាកសវនការសំណុំរឿង ០០២ ចាប់ពីថ្ងៃទី៦នេះហើយនឹងបន្តបើកសវនការវិញនៅថ្ងៃទី២១ ខែមេសា។
អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា បានឲ្យដឹងថា សហព្រះរាជអាជ្ញាបានសម្រេចយកឯកសារពាក់ព័ន្ធជាង ៣ពាន់ទំព័រក្នុងសំណុំរឿង ០០៣ និង០០៤ ដូចនេះ អង្គជំនុំជម្រះទុកពេលឲ្យដើមបណ្តឹងរដ្ឋប្បវេណី សហចៅក្រម និងសហព្រះរាជអាជ្ញាទាំងជាតិ និងអន្តរជាតិត្រួតពិនិត្យឯកសារទាំងនោះ មុននឹងបន្តនីតិវីធីសវនការ។
លោកថា៖«សហព្រះរាជអាជ្ញាបានសម្រេចយកឯកសារពាក់ព័ន្ធក្នុងសំណុំរឿង០០៣ និង០០៤ ជាង ៣ពាន់ទំព័រ មកត្រួតពិនិត្យ។ ដូច្នេះអង្គជំនុំជម្រះក៏បានសម្រេចទុកពេលឲ្យ ភាគីពាក់ព័ន្ធ ព្រមទាំងដើមបណ្តឹងរដ្ឋប្បវេណីពិនិត្យ និងពិភាក្សាមុននឹងបន្តសវនការ»។
គួររម្លឹកថា កាលពីថ្ងៃទី ២៦ខែកុម្ភៈ លោកនាយករដ្ឋមន្ត្រី ហ៊ុន សែនបានរិះគន់សាលាក្តីខ្មែរក្រហម ករណីពង្រីកវិសាលភាពក្នុងការកាត់ទោសក្នុងសំណុំរឿង០០៣ និង០០៤ ថា នឹងអាចធ្វើឲ្យអតីតមន្ត្រីក្នុងសម័យខ្មែរក្រហមមានការភ័យខ្លាចហើយអាចរត់ចូលព្រៃនាំឲ្យមានសង្គ្រាមស៊ីវិលជាថ្មីទៀត។
ប៉ុន្តែ អ្នកនាំពាក្យសាលាក្តីខ្មែរបានបញ្ជាក់ថា ការសម្រេចដកស្រង់ឯកសារ ពីសំណុំរឿង ០០៣ និង០០៤ មកពិនិត្យនោះ គឺមិនប៉ះពាល់ដល់ដំណើស៊ើបក្តីនោះទេ ពោលគឺ ជនត្រូវចោទ អ៊ឹម ចែម និង មាស មុត ដែលអតីតមេដឹកនាំខ្មែរក្រហមត្រូវស្ថិតនៅក្រោមការត្រួតពិនិត្យដោយកំបាំងមុខដដែល។ លោកថា៖«សហព្រះរាជអាជ្ញាសម្រេចដកស្រង់ឯកសារមកពិនិត្យជាង ៣ពាន់ទំព័រនោះ គឺជាឯកសារដែលពាក់ព័ន្ធនឹងសំណុំបទឧក្រិដ្ឋក្នុងសហករណ៍ត្រាំកក់មន្ទីរសន្តិសុខ ស-២១ និងមន្ទីរសន្តិសុខក្រាំងតាចាន់។ ហើយសំណុំរឿង ០០៣ និង០០៤ នៅតែដាក់ឲ្យស្ថិតក្រោមការអង្កេតដូចធម្មតា»។
កាលពីដើមខែមិនា អតីតមេដឹកនាំកម្ពុជាប្រជាធិបតេយ្យពីររូបត្រូវបានចៅក្រមអន្តរជាតិនៃសាលាក្តីខ្មែរក្រហមដាក់ឱ្យនៅក្រោមការត្រួតពិនិត្យដោយកំបាំងមុខក្នុងសំណុំរឿង ០០៣ និង ០០៤ ស្របពេលដែលភាគីចៅក្រមជាតិបន្តប្រកាន់គោលជំហរនៅស្ងាត់ស្ងៀម។
លោកស្រី អ៊ឹម ចែម ដែលជាអតីតចៅហ្វាយស្រុកព្រះនេតព្រះ និងលោក មាស មុតអតីតមេទាហ៊ានជើងទឹក បានរងការចោទប្រកាន់ពីបទមនុស្សឃាតឧក្រិដ្ឋកម្មប្រឆាំងមនុស្សជាតិ និង ឧក្រិដ្ឋកម្មសង្គ្រាម។
ជនជាប់ចោទទាំងពីរគឺជាមនុស្សពីរនាក់ក្នុងចំណោមជនជាប់ចោទទាំងប្រាំក្នុងសំណុំរឿង ០០៣ និង ០០៤។ ចៅក្រមអន្តរជាតិរកឃើញថា លោក មាស មុត ក្នុងអំណាចរបស់លោក បានជាប់ពាក់ព័ន្ធឹនឹងការធ្វើឃាតមនុស្សការសម្លាប់រង្គាល និងការធ្វើទុក្ខបុកម្នេញ ដោយសារមូលហេតុនយោបាយ និងពូជសាសន៍ជាដើម។ ដោយឡែក លោកស្រី អ៊ឹម ចែម ក៏ត្រូវបានចៅក្រមអន្តរជាតិបានរកឃើញថា បានជាប់ពាក់ព័ន្ធនឹងការសម្លាប់មនុស្ស នៅមន្ទីរសន្តិសុខភ្នំទ្រយោង និងការដ្ឋានស្ពានស្រែង ដោយបានធ្វើឃាតមនុស្ស និងបង្ខំមនុស្ស ឱ្យធ្វើជាទាសករជាដើម៕
© រក្សាសិទ្ធិដោយ thmeythmey.com