ពីនេះ ពីនោះ
របៀបបង្រៀនកូនអ្នក ឲ្យមានទំនួលខុសត្រូវ
× កុមារគ្រប់រូប សុទ្ធតែចេះធ្វើខុស ប៉ុន្តែ ចំនុចសំខាន់ គឺមិនមែនស្ថិតលើកំហុសទេ តែវាស្ថិតលើការចេះទទួលខុសត្រូវ ឬមិនចេះប៉ុណ្ណោះ។ ខាងក្រោមនេះ យើងខ្ញុំនឹងប្រាប់អ្នក ពីវិធីមួយចំនួន ក្នុងការធ្វើឲ្យកូនអ្នក ចេះទទួលស្គាល់នូវទង្វើដែលខ្លួនបានធ្វើ។
1. នៅពេលដែលគេធ្វើខុស អ្នកមិនត្រូវសួរគេថា ហេតុអ្វីបានជាគេធ្វើខុសនោះទេ តែអ្នកត្រូវសួរគេថា តើមានរឿងអ្វីកើតឡើង ដើម្បីឲ្យគេរៀបរាប់រឿងទាំងនេះប្រាប់អ្នក នោះគេនឹងទទួលស្គាល់កំហុសគេដោយខ្លួនឯង។
2. អ្នកត្រូវតែឲ្យគេរៀនចេះប្រឈមមុខនឹងបញ្ហារបស់ខ្លួនឯង មិនត្រូវឲ្យតែពេលគេធ្វើខុស ឲ្យគេនិយាយតែពាក្យសុំទោសមួយម៉ាត់ ហើយបញ្ចប់រឿងទេ ព្រោះពាក្យនេះ បើគេនិយាយច្រើនដង គឺធ្លាប់ហើយ ដូចនេះ អ្នកត្រូវតែឲ្យគេនិយាយពីកំហុសឆ្គងរបស់គេ ទើបធ្វើការសុំទោសក្រោយ។
3. អ្នកមិនត្រូវទម្លាប់ឲ្យកូន ច្រានចោលកំហុសរបស់គេ ហើយថាជាកំហុសអ្នកដទៃទេ ព្រោះនេះជាទម្លាប់អាក្រក់ ដែលមិនអាចកែបានអស់មួយជីវិត។ អ្នកត្រូវបង្រៀនគេថា មនុស្សសុទ្ធតែអាចធ្វើខុស តែបើកូនចេះទទួលស្គាល់ នូវអ្វីដែលកូនប្រព្រឹត្ត នោះជារឿងប្រសើរបំផុត ហើយមនុស្សគ្រប់គ្នា នឹងស្រលាញ់កូនគ្រប់ៗគ្នា ដោយសារតែភាពថ្លៃថ្នូររបស់កូន៕
ផ្តល់សិទ្ធិដោយ៖ www.health.com.kh
© រក្សាសិទ្ធិដោយ thmeythmey.com