អន្តរជាតិ
ស្វែងយល់ពីបុណ្យចូលឆ្នាំប្រពៃណីឡាវ Bun Pi Mai
×
ដូចកម្ពុជា មីយ៉ាន់ម៉ា និងថៃ ដែរ ប្រទេសឡាវនឹងប្រារព្ធពិធីបុណ្យចូលឆ្នាំនៅសប្តាហ៍ក្រោយក្នុងរយៈពេលបីថ្ងៃ ។ ពិធីបុណ្យចូលឆ្នាំនេះមានលក្ខណៈប្រហាក់ប្រហែលគ្នានឹងថ្ងៃចូលឆ្នាំប្រពៃណីខ្មែរយើងដែរ ដូចប្រជាជនឡាវនាំគ្នាសែនព្រេន ទៅវត្ត ស្រង់ព្រះ ធ្វើបុណ្យដាក់បាត្រជាដើម។
ពិធីបុណ្យចូលឆ្នាំនៅក្នុងប្រទេសឡាវ ត្រូវបានគេហៅថា Bun Pi Mai តែពិធីបុណ្យនេះគឺមានលក្ខណៈប្រហាក់ប្រហែលទៅនឹងពិធីបុណ្យចូលឆ្នាំសង្ក្រាននៅក្នុងប្រទេសថៃផងដែរ។ ថ្ងៃបុណ្យចូលឆ្នាំនេះ ជាថ្ងៃឈប់សម្រាករបស់ប្រជាជនឡាវទូទាំងប្រទេស ហើយវាក៏ជាពេលវេលាដែលប្រជាជនឡាវជួបជុំក្រុមគ្រួសារ ញាតិមិត្តជិតឆ្ងាយដើម្បីប្រារព្ធពីធីបុណ្យនេះ។
Bun Pi Mai គឺតែងត្រូវបានគេប្រារព្ធឡើងក្នុងរយៈពេលបីថ្ងៃ ក្នុងអំឡុងពេលប្រារព្ធពិធីបុណ្យនេះដែរប្រជាជនឡាវតែងតែជឿជាក់ថាវិញ្ញាណចាស់នឹងចាកចេញហើយព្រលឹងថ្មីចួលមកជំនួស។ដូច្នេះហើយទើបប្រជាជនឡាវនាំគ្នាលាងសម្អាតព្រះពុទ្ធរូបនៅក្នុងវិហារ តាមទីវត្តអារ៉ាម ហើយគេនាំគ្នាយកបាច់ផ្កា ឬកម្រងផ្កាម្លឹះជាដើមនោះដើម្បីដាក់ថ្វាយព្រះផងដែរ។
ចំណែកក្នុងពេលប្រារព្ធពីធីបុណ្យនេះ ប្រជាជនឡាវបានឈប់សម្រាកពីការងារ ហើយភាគច្រើនពួកគេធ្វើដំណើរទៅជួបជុំគ្រួសារ និងមានពិធីជប់លាងជាមួយក្រុមគ្រួសារជាដើមផង។ មិនខុសអ្វីពីប្រទេសថៃផងដែរ ក្នុងចន្លោះពីធីបុណ្យចួលឆ្នាំនេះ គេសង្កេតឃើញមានការបាញ់ទឹក ជះទឹកដាក់គ្នាជាពិសេសក្រុមយុវវ័យផង នៅតាមដងផ្លូវនោះ។
ពីដើមឡើយ ការលេងជះទឹកនេះមិនមែនដូចនៅក្នុងប្រទេសថៃឡើយ ព្រោះការលេងជះទឹកនេះធ្វើឡើងក្នុងចំណោមបងប្អូនមិត្តភក្តិប៉ុណ្ណោះ។ ហើយការលេងជះទឹកដាក់គ្នានេះជាបុណ្យប្រពៃណីជាតិរបស់ឡាវតាំងបីបុរាណមកម្ល៉េះ។ មុនចាក់ទឹកលើនរណាម្នាក់ គេត្រូវបួងសួងសុំពរជ័យពីទេវតាឆ្នាំថ្មីសិន ហើយក្រោយបួងសួងហើយទើបគេចាក់ទឹក។ ប៉ុន្តែក្រោយមកការលេងជះទឹកនេះត្រូវបានគេយកមកលេងកម្សាន្តជាមួយអ្នកទេសចរណ៍ និងមនុស្សរាល់គ្នាដែលទៅលេងនៅឡាវ ដោយមិនប្រកាន់ថាជាមិត្ត បងប្អូនឡើយ។
ក្នុងអំឡុងពេលចូលឆ្នាំនេះ អ្នកទេសចរបរទេសច្រើនអញ្ជើញទៅទស្សនានៅក្នុងប្រទេសឡាវ ហើយអ្នកទេសចរភាគច្រើនចូលរួមលេងកម្សាន្តយ៉ាងរីករាយក្នុងពិធីបុណ្យនេះ។ បើសិនជាលោកអ្នកចង់ទៅទស្សនាប្រទេសឡាវក្នុងពេលចូលឆ្នាំ ត្រូវប្រាកដថាលោកអ្នកបានកក់កន្លែងស្នាក់នៅ សំបុត្រយន្តហោះ ជាមុន។ ហើយម្យ៉ាងពេលដើរកំសាន្តត្រូវរក្សាទុកលិខិតឆ្លងដែន សម្ភារៈអេឡិចត្រូនិកនានាអោយបានស្រួលបួលក្រែងខូចខាតដោយសារការលេងជះទឹក៕
© រក្សាសិទ្ធិដោយ thmeythmey.com