អន្តរជាតិ
នយោបាយអន្តរជាតិ
អ៊ីស្រាអែលដេកភ័យក្រោយរុស្ស៊ីលក់មីស៊ីលការពារដែនអាកាសឲអ៊ីរ៉ង់
× កាលពីថ្មីៗនេះរុស្ស៊ីបានសម្រេចដកការហាមឃាត់ការផ្គត់ផ្គង់អាវុធការពារដែនអាកាសទៅអោយរដ្ឋាភិបាលក្រុងតេអ៊ីរ៉ង់។ ក្រោយសម្រេចចិត្តដកការហាមឃាត់ អ៊ីស្រាអែលបានប្រតិកម្មភ្លាមៗ ដោយបង្ហាញក្តីបារម្ភចំពោះសុវត្ថិភាពរបស់ខ្លួននៅពេលអនាគត។ ក្រុងម៉ូស្គូបានព្យាយាមបកស្រាយពីការសម្រេចចិត្តរបស់ខ្លួន ដោយបញ្ជាក់ច្បាស់ថាអាវុធរុស្ស៊ីផ្តល់អោយអ៊ីរ៉ង់សម្រាប់ការពារខ្លួនប៉ុណ្ណោះ។
រដ្ឋាភិបាលអ៊ីស្រាអែលបានសម្តែងក្តីបារម្ភរបស់ខ្លួនចំពោះការសម្រេចចិត្តរបស់រុស្ស៊ីក្នុងការដកការហាមឃាត់ការលក់សព្វាវុធ ការពារដែនអាកាស ទៅអោយអ៊ីរ៉ង់។ នាយករដ្ឋមន្ត្រីអ៊ីស្រាអែលបានទូរស័ព្ទទៅដោយផ្ទាល់កាន់ប្រធានាធិបតី វ្ល៉ាឌីមៀ ពូទីន ដោយលោកឆ្លៀតឱកាសបង្ហាញការព្រួយបារម្ភរបស់លោកជុំវិញការលក់អាវុធ និងបញ្ហាសន្តិសុខតំបន់។ លោក បេន ចាមិនណេតាន់យ៉ាហ៊ូ បានលើកឡើងថា ការបំពាក់អាវុធមីស៊ីលការពារដែនអាកាសនេះត្រឹមតែជួយអោយអ៊ីរ៉ង់ឡើងចាង កាចសាហាវជាមុននៅក្នុងតំបន់ ហើយអ្វីដែលសំខាន់វានឹងធ្វើអោយប៉ះពាល់សន្តិសុខ សន្តិភាព នៅក្នុងតំបន់ថែមទៀត។
ក្រោយមានការបង្ហាញក្តីបារម្ភ ពីសំណាក់រដ្ឋាភិបាលអ៊ីស្រាអែល របបដឹកនាំក្រុងម៉ូស្គូ បានព្យាយាមបកស្រាយអោយអ៊ីស្រាអែលអស់កង្វល់។ រុស្ស៊ីសង្កត់ធ្ងន់ និងធានាថា ការផ្គត់ផ្គង់មីស៊ីលការពារដែនអាកាសទៅអោយរដ្ឋាភិបាលអ៊ីរ៉ង់ជារឿងសាមញ្ញប៉ុណ្ណោះ ហើយអាវុធទាំងនោះត្រូវប្រើប្រាស់ក្នុងន័យការពារខ្លួនប៉ុណ្ណោះ មិនមែនបង្កបញ្ហាសន្តិសុខ ឬគំរាមកំហែងប្រទេសណាមួយនោះឡើយ។ ដូច្នេះអ៊ីស្រាអែលមិនចាំបាច់ព្រួយបារម្ភឡើយចំពោះការផ្គត់ផ្គង់សព្វាវុធទៅអោយអ៊ីរ៉ង់នោះ។
គួររម្លឹកបន្តិចថារុស្ស៊ីនិងរដ្ឋាភិបាលអ៊ីរ៉ង់បានសម្រេចចុះកិច្ចព្រមព្រៀងទិញលក់ប្រព័ន្ធមីស៊ីលការពារអាកាស S-300 តាំងពីឆ្នាំ ២០០៧មកម្ល៉េះ ក្នុងទំហំទឹកប្រាក់ប្រមាណ ៨០០លានដុល្លារអាមេរិក។ ប៉ុន្តែក្រោយមកកិច្ចព្រមព្រៀងនេះត្រូវបានគេព្យួរបណ្តោះអាសន្នសិន ក្នុងអាណត្តិប្រធានាធីបតី Dmitry Medvedev ដោយមានការដាក់ការហាមឃាត់នាំអាវុធទៅអ៊ីរ៉ង់ ។
យ៉ាងណាក៏ដោយ ការសម្រេចអនុវត្តកិច្ចសន្យាឡើងវិញនេះ កើតឡើងក្រោយពេលដែលភាគីមហាអំណាច ៦ និងអ៊ីរ៉ង់បានសម្រេចរៀបចំចំណុចសំខាន់ៗក្នុងក្របខណ្ឌនៃកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ផង ហើយភាគីពាក់ព័ន្ធប្តេជ្ញាបន្តចរចាគ្នាដើម្បីឈានទៅសម្រេចបាននូវកិច្ចព្រមព្រៀងពេញលេញមួយនាពេលខាងមុខ។ ការដកការហាមឃាត់សព្វាវុធទៅកាន់ប្រទេសអ៊ីរ៉ង់ ជាការសម្រេចចិត្តឯកតោភាគី និងដោយស្ម័គ្រចិត្តពីសំណាក់រដ្ឋាភិបាលរុស្ស៊ីផ្ទាល់ ហើយរុស្ស៊ីជឿថាពេលវេលានេះ គេមិនត្រូវការប្រភេទទណ្ឌកម្មបែបនេះទៀតឡើយ៕
© រក្សាសិទ្ធិដោយ thmeythmey.com