ជាតិ
សង្គមជាតិ
លោក ថោង សារ៉ាត អាចប្រឈមនឹងការជាប់ពន្ធនាគារមួយជីវិត
× លោក ថោង សារ៉ាត់ ត្រូវបានបញ្ជូនទៅកាន់ពន្ធនាគារព្រៃស នៅម៉ោងជាង៥ល្ងាច ថ្ងៃទី១៧ខែមេសា បន្ទាប់ពីត្រូវបានសាកសួរអស់រយៈពេល ជាច្រើនម៉ោងដោយលោក លី សុខលេង ចៅក្រមស៊ើបសួរសាលាដំបូងរាជធានីភ្នំពេញ។
ទាក់ទងទៅនឹងការចាប់ខ្លួនលោក ថោង សារ៉ាត់ អ្នកនាំពាក្យក្រសួងមហាផ្ទៃលោក ខៀវ សុភ័គ បានបញ្ជាក់ប្រាប់សារព័ត៌មានថ្មីៗថា កម្លាំងនគរបាលខ្មែរចាប់ខ្លួនលោក ថោង សារ៉ាត់ បាននៅតំបន់បាវិតខេត្តស្វាយរៀងនាព្រលប់ថ្ងៃទី១៦ខែមេសា។
លោក ថោង សារ៉ាត់ ត្រូវបានចាប់ខ្លួនតាមដីការបស់តុលាការ ចោទប្រកាន់ពីបទផ្តើមគំនិតក្នុងអំពើឃាតកម្មគិតទុកជាមុន តាមមាត្រា២៨និង២០០ នៃក្រមព្រហ្មទណ្ឌ ពាក់ព័ន្ឋនឹងការបញ្ជាឲ្យអង្គរក្សបាញ់សម្លាប់លោក អ៊ឹង ម៉េងជឺ កាលពីយប់ថ្ងៃទី២២ ខែវិច្ឆិកា ឆ្នាំ២០១៤កន្លងទៅ។ នេះបើតាមការចុះផ្សាយនៅក្នុងគេហទំព័ររបស់អគ្គស្នងការនគរបាលជាតិ។
យោងតាមមាត្រា២០០ និង ២៩ នៃក្រមព្រហ្មទណ្ឌ ក្រុមជនត្រូវចោទទាំងអស់អាច ប្រឈមមុខនឹងការជាប់ពន្ឋនាគារអស់មួយជីវិត ប្រសិនបើតុលាការរកឃើញថាមានពិរុទ្ឋភាព ដូចការចោទប្រកាន់មែននោះ។
សូមបញ្ជាក់ថា ក្រៅពីការសួរដេញដោលដោយចៅក្រមស៊ើបសួរសាលាដំបូងរាជធានីភ្នំពេញ លោក ថោង សារ៉ាត់ កាលពីថ្ងៃទី១៧មេសា ក៏ត្រូវបានលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ធ្វើការសាកសួរផងដែរ៕
© រក្សាសិទ្ធិដោយ thmeythmey.com