អន្តរជាតិ
នយោបាយអន្តរជាតិ
បារាំងចេញ១០០លានអឺរ៉ូប្រឆាំងការរើសអើងពូជសាសន៍និងសាសនា
× នៅថ្ងៃសុក្រម្សិលមិញ នាយករដ្ឋមន្ត្រីបារាំង លោកម៉ានុយអែល វ៉ាល់ បានបង្ហាញជាសាធារណៈនូវគម្រោងប្រឆាំង ការរើសអើងពូជសាសន៍និងសាសនា ដែលជាបញ្ហាចោទក្នុងសង្គមបារាំង។ ដើម្បីអនុវត្តផែនការនេះ រដ្ឋាភិបាលបាន ប្រកាសចាយវាយថវិកា១០០លានអឺរ៉ូ សម្រាប់រយៈពេល៣ឆ្នាំ។
ទិសដៅលេចធ្លោនៃផែនការ១០០លានអឺរ៉ូនេះ គឺការការពារប្រជាជនបារាំងដែលមានដើមកំណើតជ្វីហ្វ និងអារ៉ាប់។ ជាការកត់សម្គាល់ ក្នុងត្រីមាសទី១ដើមឆ្នាំ២០១៥នេះ ពលរដ្ឋបារាំងកាន់សាសនាអ៊ីស្លាមបានរងបញ្ហារើសអើងដល់ទៅ២២៦ករណី គិតទៅគឺច្រើនជាងឆ្នាំមុនដល់ទៅ៦ដង។ សម្រាប់ពលរដ្ឋដើមកំណើតជ្វីហ្វវិញ តួលេខបង្ហាញថា ក្នុងឆ្នាំ២០១៤កន្លងទៅ សកម្មភាពរើសអើងវាយប្រហារពួកគេមានការកើនឡើងមួយជាពីរ បើប្រៀបទៅនឹងឆ្នាំ២០១៣ ។
នៅបារាំង ការរើសអើងសាសនានិងពូជសាសន៍ជាបញ្ហាដែលតែងកើតឡើង ក្នុងសង្គម។ ជាក់ស្តែង កាលពីខែមករាដើមឆ្នាំ ទីក្រុងប៉ារីស បានរងភេរវកម្មប្រឆាំងកាសែតស្ហាលី អេបដូ។ ហើយក៏មានការវាយប្រហារហាងទំនិញជនជាតិជ្វីហ្វផងដែរ។ ដោយសារតែឧក្រិដ្ឋជនសុទ្ធតែជាអ្នកកាន់សាសនាអ៊ីស្លាម ពលរដ្ឋដែលកាន់សាសនាអ៊ីស្លាមបានសំដែងការព្រួយបារម្ភ ខ្លាចមានការសងសឹកណាមួយទៅលើពួកគេ។ រីឯជនជាតិជ្វីហ្វវិញក៏តែងតែភ័យខ្លាចការវាយប្រហារលើពួកគេដែរ។
ចាប់ពីពេលនេះទៅ អ្នកដែលប្រើពាក្យសំដីវាយប្រហារជនជាតិជ្វីហ្វ និងអារ៉ាប់ រឹក៏ប្រើពាក្យពេចន៍បង្ហាញការរើសអើងពូជសាសន៍ និងសាសនា នឹងទទួលទោសដល់កម្រិតព្រហ្មទណ្ឌ។ ក្នុងវេបសាយក៏ដូច្នេះដែរ អ្នកដែលសរសេរឃ្លាប្រយោគរើសអើងសាសនាពូជសាសន៍នឹងទទួលទោសតាមច្បាប់។ រដ្ឋអំណាចបារាំងនឹងបង្កើតក្រុមវេបសាយមួយទទួលបន្ទុកកិច្ចការនេះ៕
© រក្សាសិទ្ធិដោយ thmeythmey.com