អន្តរជាតិ
នយោបាយអន្តរជាតិ
អ៊ីរ៉ង់ត្រៀមសហការជាមួយឥណ្ឌា,ចិន,រុស្ស៊ីប្រឆាំងប្រព័ន្ធមីស៊ីលណាតូ
×
ក្រោយរុស្ស៊ីប្រកាសដកការហាមឃាត់ការនាំចូលសព្វាវុធទៅកាន់ប្រទេសអ៊ីរ៉ង់ អ៊ីរ៉ងបានប្រកាសថាខ្លួនត្រៀមលក្ខណៈរួចស្រេចហើយដើម្បីសហការជាមួយមហាមិត្តចិន រុស្ស៊ី និងឥណ្ឌាដើម្បីទប់ទល់ប្រព័ន្ធមីស៊ីលបក្សសម្ព័ន្ធយោធាណាតូ។ អ៊ីរ៉ង់ចាត់ទុកប្រព័ន្ធមីស៊ីលណាតូដែលពង្រាយនៅភាគខាងកើតអឺរ៉ុបនិងតំបន់ផ្សេងទៀតជាការគំរាមកំហែងផ្នែកសន្តិសុខ ហើយការសហការជាមួយរុស្ស៊ីក្តី ចិនក្តី ឥណ្ឌាក្តីជារឿងមួយមិនអាចខ្វះបានដើម្បីធានាសន្តិសុខ និងស្ថិរភាព។
លោក មុំ ពិទូរ្យ លម្អិតព័ត៌មាននេះ
រដ្ឋាភិបាលក្រុងតេអ៊ីរ៉ង់បានប្រកាសថា ខ្លួនត្រៀមលក្ខណៈជាស្រេចហើយដើម្បីសហការជាមួយបណ្តាប្រទេសជាមិត្តដូចជារុស្ស៊ី ឥណ្ឌា និងចិនជាដើម ដើម្បីការពារសន្តិសុខ និងទប់ទល់រាល់ការគំរាមកំហែងផ្នែកសន្តិសុខបង្កឡើងដោយបក្សសម្ព័ន្ធយោធាណាតូ។ អ៊ីរ៉ង់ផ្តោតសំខាន់លើការគំរាមកំហែងបង្កឡើងដោយប្រព័ន្ធមីស៊ីលបក្សសម្ព័ន្ធយោធាណាតូ ដែលពង្រាយនៅជុំវិញអឺរ៉ុប និងការប្រើប្រាស់សកម្មភាពយោធាដើម្បីគំរាមកំហែងប្រទេសផ្សេងទៀតនោះ។
រដ្ឋមន្ត្រីការពារជាតិអ៊ីរ៉ង់ បានថ្លែងក្នុងសន្និសីទសន្តិសុខអន្តរជាតិនាទីក្រុងម៉ូស្គូថា ក្នុងនាមលោកជាអ្នកតំណាងអោយរដ្ឋាភិបាលអ៊ីរ៉ង់លោកគាំទ្រពេញទំហឹងចំពោះគំនិតអភិវឌ្ឍន៍សហការប្រតិបត្តិការផ្នែកសន្តិសុខ និងការពារជាតិរវាងប្រទេសចិន អ៊ីរ៉ង់ ឥណ្ឌា និងរុស្ស៊ី។ ការសហការផ្នែកសន្តិសុខ និងយោធានេះ គឺដើម្បីប្រកួតប្រជែងនិងទប់ទល់ជាមួយអង្គការលោកខាងលិចណាតូ ដែលកំពុងពង្រីកឥទ្ធិពល និងតំឡើងសម្ភារៈ ឬសព្វាវុធរបស់ខ្លួនមានដូចជាមីស៊ីលជាដើមនៅអឺរ៉ុប ជាពិសេសអឺរ៉ុបខាងកើត។
ការលើកឡើងពីការបង្កើនសហប្រតិបត្តិការជាមួយបណ្តាប្រទេសមហាអំណាចដូចជារុស្ស៊ី ចិន ឥណ្ឌានេះកើតឡើង ស្របពេលដែលសហរដ្ឋអាមេរិកនៅបន្តតំឡើងនិងពង្រាយប្រព័ន្ធមីស៊ីលនៅអឺរ៉ុប ដោយយកលែសថា ជាការទប់ស្កាត់ការគំរាមកំហែងផ្នែកសន្តិសុខដែលមិនអាចប៉ាន់ស្មានដឹងមុនដោយនុយក្លេអ៊ែរអ៊ីរ៉ង់។
យ៉ាងណាមិញ ឆ្លើយតបនឹងសកម្មភាពរបស់អាមេរិក រុស្ស៊ីបានសម្រេចដកការហាមឃាត់ការនាំចេញសព្វាវុធទៅកាន់ប្រទេសអ៊ីរ៉ង់ ដោយត្រៀមបញ្ជូនអាវុធការពារដែនអាកាស S-300 ទៅកាន់អ៊ីរ៉ង់ក្នុងពេលឆាប់ៗនេះ។
គួររម្លឹកបន្តិចថារុស្ស៊ីនិងរដ្ឋាភិបាលអ៊ីរ៉ង់បានសម្រេចចុះកិច្ចព្រមព្រៀងទិញលក់ប្រព័ន្ធមីស៊ីលការពារអាកាស S-300 តាំងពីឆ្នាំ ២០០៧មកម្ល៉េះ ក្នុងទំហំទឹកប្រាក់ប្រមាណ ៨០០លានដុល្លារអាមេរិក។ ប៉ុន្តែក្រោយមកកិច្ចព្រមព្រៀងនេះត្រូវបានគេព្យួរបណ្តោះអាសន្នសិន ក្នុងអាណត្តិប្រធានាធីបតី Dmitry Medvedev ដោយមានការដាក់ការហាមឃាត់នាំអាវុធទៅអ៊ីរ៉ង់។
យ៉ាងណាក៏ដោយ ការសម្រេចអនុវត្តកិច្ចសន្យាឡើងវិញនេះ កើតឡើងក្រោយពេលដែលភាគីមហាអំណាច ៦ និងអ៊ីរ៉ង់បានសម្រេចរៀបចំចំណុចសំខាន់ៗក្នុងក្របខណ្ឌនៃកិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ផង ហើយភាគីពាក់ព័ន្ធប្តេជ្ញាបន្តចរចាគ្នាដើម្បីឈានទៅសម្រេចបាននូវកិច្ចព្រមព្រៀងពេញលេញមួយនាពេលខាងមុខ។ ការដកការហាមឃាត់សព្វាវុធទៅកាន់ប្រទេសអ៊ីរ៉ង់ ជាការសម្រេចចិត្តឯកតោភាគី និងដោយស្ម័គ្រចិត្តពីសំណាក់រដ្ឋាភិបាលរុស្ស៊ីផ្ទាល់ ហើយរុស្ស៊ីជឿថាពេលវេលានេះ គេមិនត្រូវការប្រភេទទណ្ឌកម្មបែបនេះទៀតឡើយ៕
© រក្សាសិទ្ធិដោយ thmeythmey.com