អន្តរជាតិ
នយោបាយអន្តរជាតិ
ក្រុមរដ្ឋឥស្លាមសម្លាប់រង្គាលក្រុមអ្នកកាន់សាសនាគ្រិស្តអេត្យូពី
×
ក្រុមភេរវជនរដ្ឋឥស្លាមបានទម្លាយវីដេអូសម្លាប់រង្គាលក្រុមអ្នកកាន់សាសនាគ្រិស្តជនជាតិអេត្យូពីនៅក្នុងប្រទេសលីប៊ីកាលពីថ្មីៗនេះ។ ការសម្លាប់រង្គាលជាថ្មីនេះកើតឡើងក្រោយពេលដែលក្រុមដ៏ព្រៃផ្សៃនេះបានសម្លាប់កាត់កអ្នកកាន់សាសនាគ្រិស្តមួយក្រុមជនជាតិអេហ្ស៊ីបប្រហែល២០នាកកាលពីខែកុម្ភៈ។
ខ្សែអាត់វីដេអូថ្មីមួយត្រូវបានបង្ហោះតាមប្រព័ន្ធអ៊ីនធឺណែត ដោយបង្ហាញពីសកម្មភាពព្រៃផ្សៃរបស់ក្រុមភេរវជនរដ្ឋឥស្លាមដែលសម្លាប់រង្គាលប្រជាជនអេត្យូពីនៅក្នុងប្រទេសលីប៊ី។ ក្នុងខ្សែអាត់វិដេអូនោះមានរយៈពេល ២៩នាទី ត្រូវបានគេបង្ហោះកាលពីថ្ងៃអាទិត្យម្សិលមិញ។ ក្នុងវីដេអូនោះមានបង្ហាញចំណាប់ខ្មាំងពីរក្រុមស្ថិតក្នុងកណ្តាប់ដៃក្រុមសកម្មប្រយុទ្ធរដ្ឋឥស្លាម ហើយគេអះអាងថាមួយក្រុមត្រូវបានចាប់ខ្លួនដោយក្រុមរដ្ឋឥស្លាមនៅភាគខាងកើត និងមួយក្រុមទៀតត្រូវបានចាប់ខ្លួននៅភាគខាងត្បូងប្រទេសលីប៊ី។ មុនមានការការសម្លាប់ចំណាប់ខ្មាំងទាំងនោះ ក្រុមរដ្ឋឥស្លាមបានថ្លែងសារមួយសន្ទុះធំ បន្ទាប់មកចាប់ផ្តើមសកម្មភាពសម្លាប់ចំណាប់ខ្មាំងតែម្តង។ ចំណាប់ខ្មាំងមួយក្រុមមានគ្នាប្រហែល ១២នាក់សុទ្ធតែបុរសត្រូវបានក្រុមនេះបាញ់សម្លាប់ ខណៈពេលដែលមនុស្សមួយក្រុមទៀតមានគ្នាតិចណាស់ក៏១៦នាក់នោះត្រូវបានក្រុមដដែលកាត់កសម្លាប់ចោលនៅមាត់សមុទ្រ។
យ៉ាងណាក៏ដោយ រដ្ឋាភិបាលអេត្យូពី បានបញ្ជាក់ថាខ្លួនមិនទាន់អាចទទួលស្គាល់ភ្លាមៗថា ជនរងគ្រោះទាំងនោះជាជនជាតិខ្លួននោះឡើយ ដ្បិតគេកំពុងរង់ចាំព័ត៌មានលម្អិតជាមុនសិន។ ប៉ុន្តែរដ្ឋាភិបាលអេត្យូពីបានប្រកាសថ្កោលទោសក្រុមរដ្ឋឥស្លាមនេះ បើទោះបីជាជនរងគ្រោះជាជនជាតិខ្លួនឬមិនមែនក៏ដោយ។
កាលពីខែកុម្ភៈក្រុមជនជាតិអេហ្ស៊ីបកាន់សាសនាគ្រិស្តមួយក្រុមត្រូវបានក្រុមរដ្ឋឥស្លាមសម្លាប់យ៉ាងព្រៃផ្សៃដូចគ្នាដែរនៅក្នុងប្រទេសលីប៊ី។ ក្រោយមានការសម្លាប់រង្គាលក្រុមប្រជាជនអេហ្ស៊ីបនោះ រដ្ឋាភិបាលក្រុងកៃរ៉ូ បានបញ្ជាអោយកងកម្លាំងខ្លួនបើកការវាយប្រហារតាមផ្លូវអាកាសទម្លាក់គ្រាប់បែកប្រឆាំងក្រុមរដ្ឋឥស្លាមសាខានៅលីប៊ីផងដែរ៕
© រក្សាសិទ្ធិដោយ thmeythmey.com