ជាតិ
សង្គមជាតិ
×![]()
ដោយ: ខន ចំប៉ា
មន្ត្រីរាជការស៊ីវិល នគរបាលជាតិកម្ពុជា យោធិននៃកងយោធពលខេមរភូមិន្ទ នឹងទទួលបានប្រាក់បៀវត្សសម្រាប់ខែឧសភាឆ្នាំ២០១៥ មុនមួយសប្តាហ៍ ពោលគឺយ៉ាងយូរក្នុងសប្តាហ៍ទី៣ នៃខែឧសភា។ នេះបើយោងតាម លិខិតរបស់លោក ហ៊ុន សែន ដែលផ្ញើជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងមុខងារសាធារណៈ។
លិខិតចុះ ថ្ងៃទី២៥មេសាដោយលោក ហ៊ុន សែន បានបញ្ជាក់ថា ការស្នើឲ្យបើកបៀវត្សជូនមន្ត្រីរាជការមុនកាលកំណត់នេះ គឺដើម្បីកុំឲ្យមានគំលាតឆ្ងាយរវាងបៀវត្សសម្រាប់ខែមេសា និងខែឧសភា ដោយសារតែ កាលពីខែមេសា រាជរដ្ឋាភិបាលកម្ពុជាបានសម្រេចបើកប្រាក់បៀវត្សជូនមន្ត្រីរាជការសម្រាប់ខែមេសា មុនថ្ងៃចូលឆ្នាំខ្មែរ។
យោងតាមសារាចរណៃនាំលេខ០១ សរ ចុះថ្ងៃទី២៩ខែមករាឆ្នាំ២០១៤ ស្តីពីការបើកប្រាក់បៀវត្សជូនមន្ត្រីរាជការស៊ីវិល នគរបាលជាតិ យោធិននៃកងយោធពលខេមរភូមិន្ទ ការបើកប្រាក់បៀវត្ស ត្រូវអនុវត្តនៅសប្តាហ៍ទី៤នៃខែនីមួយ។
លិខិតដដែល បានឲ្យដឹងទៀតថា សម្រាប់ប្រាក់បៀវត្សចាប់ពីខែមិថុនាតទៅ ត្រូវបើកផ្តល់នៅសប្តាហ៍ទី៤ នៃខែនីមួយៗ ស្របតាមខ្លឹមសារនៃសារាចរណែនាំលេខ០១ សរ ចុះថ្ងៃទី២៩ខែមករា ឆ្នាំ២០១៤ធម្មតាវិញ។ វិធានការនេះត្រូវអនុវត្តន៍ដូចគ្នាដែរ ចំពោះការរៀបចំ បើកផ្តល់របបសន្តិសុខសង្គមជូនអតីតមន្ត្រីរាជការ និងអតីតយុទ្ធជន៕
© រក្សាសិទ្ធិដោយ thmeythmey.com
