ជាតិ
សាលារាជធានីប្រើប្រាក់ជំនួយជប៉ុនដើម្បីដំឡើងប្រព័ន្ធគ្រប់គ្រងចរាចរជាង១០០ទីតាំង
×
ភ្នំពេញ៖ អាជ្ញាធរសាលារាជធានីភ្នំពេញ នឹងដំឡើងប្រព័ន្ធកាមេរ៉ាគ្រប់គ្រងចរាចរ ជាង ១០០ទីតាំង ដោយចំណាយអស់ជាង ១៩លានដុល្លារអាមេរិកដែលជំនួយរបស់រដ្ឋាភិបាលជប៉ុន។ ការដំឡើងប្រព័ន្ធកាមេរ៉ាទាំងនោះ គឺក្នុងគោលបំណង សង្កេតមើលស្ថានភាពចរាចរ និងបញ្ចៀសការកកស្ទះចរាចរ ដែលកាន់តែមានកើនឡើងជាប្រចាំ នៅរាជធានីភ្នំពេញ។
មានសំឡេង
ប្រព័ន្ធគ្រប់គ្រងចរាចរ និងកាមេរ៉ាសុវត្ថិភាព ព្រមទាំងបន្ទប់បញ្ជារប្រព័ន្ធចរាចរបែបទំនើប នឹងត្រូវដំឡើងនៅទីតាំងចំនួន១០០ដើម្បីសម្រួលការកកស្ទះចរាចរក្នុងរាជធានីភ្នំពេញ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានឲ្យដឹងថា រដ្ឋាភិបាលជប៉ុនបានសម្រេចផ្តល់គម្រោងដំឡើងប្រព័ន្ធគ្រប់គ្រងចរាចរដ៏ទំនើបនេះ តាមរយៈទីភ្នាក់ងារ JICA ។
លោកបន្តថា នាពេលបច្ចុប្បន្នJICAកំពុងរៀបចំធ្វើលទ្ធកម្មក្នុងគម្រោងនេះ (ការដេញថ្លៃ) ជាមួយក្រុមហ៊ុនជប៉ុន នៅប្រទេសជប៉ុន។
បើតាមអ្នកនាំពាក្យ គម្រោងអភិវឌ្ឍន៍ប្រព័ន្ធគ្រប់គ្រងចរាចរក្នុងរាជធានីភ្នំពេញ ក្រោមជំនួយរបស់រដ្ឋាភិបាលជប៉ុននេះ នឹងចំណាយថវិកាជាង ១៩លានដុល្លារអាមេរិក ហើយគម្រោង នឹងបញ្ចប់នៅអំឡុងដើមឆ្នាំ ២០១៦ ។
«គម្រោងដំឡើងប្រព័ន្ធគ្រប់គ្រងចរាចរដ៏ទំនើបនេះ ចំណាយថវិកាជាង ១៩លានដុល្លារអាមេរិក ដោយជប៉ុននឹងជួយរៀបចំម៉ាស៊ីនកាមេរ៉ាទំនើបថ្មី ដែលយើងអាចតាមដានគ្រប់គ្រង និងបញ្ជាបាន ដើម្បីជួយបញ្ចៀសការកកស្ទះចរាចរ»។ នេះការបញ្ជាក់របស់លោក ឌីម៉ង់ ។
អ្នកនាំពាក្យសាលារាជធានីភ្នំពេញរូបនេះ បន្ថែមថា ទោះបីជាគម្រោងនេះ នឹងអាចជួយសម្រួលស្ថានភាពចរាចរក្នុងរាជធានីភ្នំពេញកាន់តែមមាញឹកខ្លាំងក៏ដោយ តែប្រសិនប្រជាជនមិនចូលរួមគោរពច្បាប់ចរាចរណ៍នោះ ក៏មិនអាចទៅរួចដែរ។
ដូច្នេះទនឹ្ទមគ្នានឹងការដំឡើងប្រព័ន្ធចរាចរនេះ លោកលោង ឡុង ឌីម៉ង់ ក៏បានសំណូមពរឲ្យប្រជាជនចូលរួម គោរពច្បាប់ចរាចរណ៍ឲ្យកាន់តែល្អប្រសើរផង។
គួរបញ្ជាក់ថា អភិបាលរាជធានីភ្នំពេញ លោក ប៉ា សុជាតិវង្ស បានជួបពិភាក្សាការងារស្ដីពីគម្រោងនេះជាមួយ លោក KOTO MASATO ជំនាញការ JICA លើគម្រោងចរាចរនិងសេវាដឹកជញ្ជូនសាធារណៈប្រចាំកម្ពុជាផងដែរដោយនៅពេលនោះលោកបានស្នើអង្គការ JICA សិក្សា និងរៀបចំនូវការគ្រប់គ្រងប្រព័ន្ធភ្លើងស្ដុប និងដំឡើងប្រព័ន្ធកាមេរ៉ាសុវត្ថិភាពនេះ៕
© រក្សាសិទ្ធិដោយ thmeythmey.com