អន្តរជាតិ
បុរសម្នាក់ត្រូវជាប់គុក១៤ ខែដោយសារយកទឹកខ្មៅគប់ឲ្យប្រឡាក់រូបថតម៉ៅសេទុង
×
បុរសជនជាតិចិនម្នាក់ ត្រូវបានតុលាការកាត់ទោសឲ្យជាប់ពន្ធនាគារ១៤ ខែ បន្ទាប់ពីបុរសម្នាក់នេះ គប់ដបទឹកថ្នាំសំដៅទៅកាន់រូបថតរបស់លោកប្រធានម៉ៅសេទុង ដែលគេដាក់តាំងនៅទីលានធានអានមេន កណ្ដាលរដ្ឋធានីប៉េងកាំង។
ទូរទស្សន៍មជ្ឈឹមចិន CCTV បានផ្សាយថា តុលាការក្រុងប៉េងកាំង បានប្រកាសពីការដាក់ទោស បុរសម្នាក់ឈ្មោះ SunBing អាយុ ៤២ ឆ្នាំឲ្យជាប់គុករយៈពេល ១ឆ្នាំ ២ ខែក្រោយពេលគាត់បានធ្វើឲ្យប្រឡាក់រូបថតលោកប្រធានម៉ៅ កាលពីថ្ងៃទី ៦ ខែមីនា ដោយគប់ដបទឹកថ្នាំសំដៅទៅរូបថតលោក ម៉ៅ ដើម្បីទាក់ទាញការចាប់អារម្មណ៍ពីសំណាក់ភ្ញៀវទេសចរ។
តុលាការបានសម្រេចថាលោកSun ប្រព្រឹត្តទង្វើផ្គើននឹងច្បាប់នៅពេលដែលគាត់បានធ្វើឱ្យមានភាពរញ៉េរញ៉ៃនិងភាពគ្មានសណ្ដាប់ធ្នាប់តាមទីសាធារណៈ។តុលាការបានបន្ថែមទៀតថា បុរសម្នាក់នេះ គួរតែត្រូវដាក់ទណ្ឌកម្មឲ្យធ្ងន់ធ្ងរចំពោះការប្រព្រឹត្តបទឧក្រិដ្ឋបែបនេះ។
ប្រភពដដែលបានឲ្យដឹងថា កន្លែងដែលប្រឡាក់នោះត្រូវបានគេសម្អាតរួចរាល់ បន្ទាប់ពី លោក Sun ត្រូវបានចាប់ខ្លួនដោយប៉ូលីសក្នុងតំបន់នៅកន្លែងកើតហេតុ។ លោក Sun ធ្លាប់បានជាប់គុកម្ដងរួចមកហើយ នឹងត្រូវបានដោះលែងចេញពីពន្ធនាគារកាលពីខែមករាឆ្នាំ ២០១៣បន្ទាប់លោកជាប់គុកគ្រប់ ១៧ ខែ ពីបទលួចបន្លំកាតឥណទាន៕
© រក្សាសិទ្ធិដោយ thmeythmey.com