ជាតិ
×![]()
ដោយ: ខន ចំប៉ា
នៅថ្ងៃទី៣០ខែមេសានេះអង្គការក្រុមការងារដើម្បីដោះស្រាយទំនាស់ (ACT) មជ្ឈមណ្ឌលសិទ្ធិមនុស្សកម្ពុជា(CCHR)និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM)បានរៀបចំទិវាសេរីភាពសារព័ត៌មានពិភពលោកក្រោមប្រធានបទ«ឯករាជ្យភាពនិងគុណភាពនៃប្រព័ន្ធផ្សព្វផ្សាយនៅកម្ពុជា»។
លោក ប៉ាងួនទៀងប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM)បានថ្លែងនៅក្នុងឱកាសនោះថា បរិយាកាសនៃសេរីភាពសារព័ត៌មាននៅក្នុងប្រទេសកម្ពុជានៅឆ្នាំ២០១៤គឺបានធ្វើឲ្យអ្នកសារព័ត៌មាន មានអារម្មណ៍ភ័យខ្លាចនៅក្នុងការប្រកបការងាររបស់ខ្លួន ដោយសារតែភាពជាប់គាំងនយោបាយនិងបញ្ហាផ្សេងៗទៀត។
លោក ប៉ាងួនទៀងបានថ្លែងបន្តថាភាពភ័យខ្លាចទាំងនោះគឺនៅពេលមានការប្រមូលផ្តុំតវ៉ា ជាពិសេសនៅទីលានប្រជាធិបតេយ្យនិងកន្លែងតវ៉ាផ្សេងៗទៀតដោយសារតែកងកម្លាំង និងសន្តិសុខរបស់រដ្ឋាភិបាលមានអភ័យឯកសិទ្ធិហួសហេតុពេកក្នុងការបង្ក្រាបឬការគំរាមកំហែងដល់អ្នកសារព័ត៌មាន។
ប៉ុន្តែយ៉ាងណាក៏ដោយអ្នកជំនាញសារព័ត៌មាន បានបញ្ជាក់ថាសេរីភាពសារព័ត៌មានហាក់មានភាពល្អប្រសើរខ្លះ បន្ទាប់ពីបញ្ហាជាប់គាំងនយោបាយ ក្រោយការបោះឆ្នោតនៅកម្ពុជាបានបញ្ចប់។
បើតាមរបាយការណ៍របស់អង្គការអាដហុកពីឆ្នាំ២០១២ដល់ឆ្នាំ២០១៥មានអ្នកកាសែតប្រមាណ១៣នាក់ ត្រូវបានស្លាប់និង២៥នាក់បានរងនូវការគំរាមកំហែង។
អង្គការ Freedom House បានរាយការណ៍ថា កម្ពុជាទទួលបានចំណាត់ថ្នាក់លេខ១៤៧ជាប្រទេសដែលមិនមានសេរីភាពសារព័ត៌មាន ក្នុងចំណោមប្រទេសចំនួន១៩៧ កាលពីឆ្នាំ២០១៣។នៅឆ្នាំ២០១៤កម្ពុជាជាប់ចំណាត់ថ្នាក់លេខ១៣៩ក្នុងចំណោមប្រទេស១៨០លើពិភពលោក។
សូមបញ្ជាក់ថាទិវាសេរីភាពសារព័ត៌មានពិភពលោកនេះរៀបចំឡើងក្នុងបំណងឧទ្ទិសដឹងគុណដល់អ្នកកាសែតដែលបានបាត់បង់ជីវិតនៅក្នុងការបំពេញការងាររបស់ខ្លួន ប្រាប់ដល់ប្រជាពលរដ្ឋអំពីការរំលោភសេរីភាពសារព័ត៌មាន និងរំលឹកដល់រដ្ឋាភិបាល ក្នុងការផ្តល់នូវសេរីភាពដល់ប្រព័ន្ធផ្សព្វផ្សាយព្រមទាំងឆ្លុះបញ្ជាំងនៅក្នុងអ្នកជំនាញផ្នែកប្រព័ន្ធផ្សព្វផ្សាយអំពីបញ្ហានៃសេរីភាពសារព័ត៌មាននិងក្រមសីលធម៌វិជ្ជាជីវៈសារព័ត៌មានផងដែរ៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
