ជាតិ
សង្គមជាតិ
×![]()
ដោយ: ថ្មីៗ
រថយន្តដឹកដី ដឹកខ្សាច់ជាច្រើនគ្រឿង កំពុងតែបង្កការរំខាន និងការបារម្ភដល់ពលរដ្ឋដែលរស់នៅតាមកំណាត់ផ្លូវពីស្ពានព្រែកហូរ ទៅរង្វង់មូលថ្នល់បំបែក (បត់ទៅសៀមរាបកន្ទួត)។
អ្នកបើកបរគ្មានសីលធម៌ បើកបរជែងគ្នា ធ្លាក់ជ្រុះដុំដី ខ្សាច់ និងទឹកភក់ពេញថ្នល់ និងបានធ្វើឲ្យខូចថ្នល់ទៀត។ ទាំងនេះគឺជាបញ្ហាដែលពលរដ្ឋរស់នៅតាមបណ្តោយផ្លូវនេះបានសង្កេតឃើញ និងព្រួយបារម្ភចំពោះបញ្ហាសុវត្ថិភាពដែលអាចកើតឡើងចំពោះអ្នកភូមិនៅក្នុងតំបន់នោះ។
ប្រជាពលរដ្ឋដែលរស់នៅភូមិក្រាំងស្វាយ សង្កាត់ព្រែកកំពឹស ខណ្ឌដង្កោបានរអ៊ូរទាំ និងខឹងសម្បារចំពោះរថយន្តដឹកដី ដឹកខ្សាច់ទាំងនោះ ដែលបើកបរលឿនខ្លាំង។ អ្នកភូមិរូបនេះទទួលស្គាល់ថា ក្នុងពេលកន្លងមក វាធ្លាប់មានអាជ្ញាធរចុះពិនិត្យការដឹកជញ្ជូនទាំងនេះដែរ ប៉ុន្តែសកម្មភាពដឹកជញ្ជូនដ៏គ្រោះថ្នាក់ទាំងនេះ ក៏មិនបានថមថយដែរ។ អ្នកភូមិ ដ្បិតមិនស្គាល់ថាអាជ្ញាធរទាំងនោះមកពីវិស័យណា ប៉ុន្តែពួកគេសង្ស័យថា ក្រុមមានសមត្ថកិច្ចទាំងនោះអាចទទួលបានផលប្រយោជន៍ពីក្រុមឈ្មួញ រូបភាពនៃការដឹកជញ្ជូនដ៏គ្រោះថ្នាក់មិនបានថមថយ។
អ្នកភូមិមួយរូបទៀត បានរអ៊ូរទាំអំពីសំឡេងស៊ីផ្លេនៃរថយន្តដឹកដីទាំងនោះ។ ស៊ីផ្លេឮសូរខ្លាំងៗ ហើយអ្នកបើកបរចុចស៊ីផ្លេញឹកញាប់ ដោយសារតែពួកគេបើកបរលឿន។ សំឡេងស៊ីផ្លេ តែងតែធ្វើពលរដ្ឋភ្ញាក់ផ្អើល និងធុញទ្រាន់។ ហើយថាស៊ីផ្លេរថយន្តដឹកដីទាំងនោះ ក៏តែងធ្វើឲ្យអ្នកធ្វើដំណើរតាមម៉ូតូភ្ញាក់ផ្អើល ហើយធ្លាក់ពីលើផ្លូវដែរ។ នេះគេមិននិយាយអំពីរដូវភ្លៀងដែលរថយន្តធុនធ្ងន់ទាំងនេះតែងកិនជង្ហុកហើយសាចទឹកភក់លើអ្នកធ្វើដំណើរនៅឡើយផង។
អ្នកភូមិម្នាក់សុំមិនបញ្ចេញឈ្មោះ ដែលធ្វើដំណើរតាមផ្លូវនោះរាល់ថ្ងៃបានប្រាប់ឲដឹងថា « នៅពេលគាត់ធ្វើដំណើរតាមផ្លូវនេះម្តងៗ គាត់តែងតែមានអារម្មណ៍ភ័យព្រួយ ដោយសារក្រុមឡានទាំងនោះបើកជែងគ្នាក្នុងល្បឿនលឿនៗ និងចុចស៊ីផ្លេលឺៗថែមទៀតផង» ។ គាត់បានត្អូញត្អែរបន្ថែមទៀតថា មានថ្ងៃមួយពេលគាត់កំពុងតែបើកម៉ូតូទៅផ្សារតាខ្មៅ ស្រាប់តែមានឡានដឹកដីមួយបើកពីក្រោយគាត់ ហើយចុចស៊ីផ្លេធ្វើឲគាត់ភ្ញាក់ធ្លាក់ចិញ្ចើមផ្លូវ ហើយមានពេលខ្លះសំលៀកបំពាក់របស់គាត់ត្រូវប្រលាក់ភក់ដែលការបើកបរកិនជង្ហុកភក់នៅលើផ្លូវនោះ៕
© រក្សាសិទ្ធិដោយ thmeythmey.com
