ជាតិ
មជ្ឈមណ្ឌលបុប្ផាណាចាក់បញ្ចាំងភាពយន្ដដែលសម្តែងដោយព្រះមហាក្សត្រនៅល្ងាចនេះ
×![]()
ដោយ: ខន ចំប៉ា
មជ្ឈមណ្ឌលបុប្ផាណានឹងបញ្ចាំងខ្សែភាពយន្ដដែលសម្តែងដោយ ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅវេលាម៉ោង ៥ល្ងាចថ្ងៃសៅរ៍នេះ។
ការចាក់បញ្ចាំងភាពយន្តនៅល្ងាចនេះ ដើម្បីចូលរួមអបអរសាទរ ព្រះរាជពិធីចំរើនព្រះជន្ម ព្រះបរមនាថនរោត្តមសីហមុនី ព្រះមហាក្សត្រកម្ពុជា ។
ខ្សែភាពយន្តនេះមានចំណងជើងថា «ព្រះអាទិត្យអស្តង្គតនៅភូមិខ្ញុំ» មានរយៈពេល ៦៣នាទីផលិតនៅឆ្នាំ ១៩៩២ និយាយជាភាសារខ្មែរ ភាសាអង់គ្លេសរត់ពីក្រោម ជាពិសេស ភាពយន្តមួយនេះ គឺដឹកនាំដោយអតីតព្រះមហាក្សត្រ ព្រះបរមរតនកោដ្ឋ ព្រះបាទ នរោត្តមសីហនុ។
រឿងព្រះអាទិត្យអស្តង្គតនៅភូមិខ្ញុំ គឺជារឿងដែលរៀបរាប់ពីនារី ជាគិលានុបដ្ឋាយិកាវ័យក្មេងម្នាក់នៅមន្ទីរពេទ្យខេត្តសៀមរាប-អង្គរ និងយុវជន សីហាជាវេជ្ជបណ្ឌិតដែលទើបត្រលប់មកពីប្រទេសបារាំង។ពួកគេទទួលការព្យាបាលវះកាត់អ្នកជម្ងឺដែលមានរបួសធ្ងន់ៗដែលបណ្តាលមកពីការផ្ទុះមីនពីព្រោះទឹកដីខ្មែរពោរពេញទៅដោយគ្រាប់មីន។ មិនយូរប៉ុន្មាន សីហានិងនារីបានសម្រេចចិត្តរៀបការជាមួយគ្នា។ ថ្ងៃមួយសីហាត្រូវមានកាតព្វកិច្ចពិសេសដែលត្រូវចាកចេញពីភរិយាដើម្បីរួមដំណើរជាមួយក្រុមអ្នកដោះមីន។តើសីហានឹងសម្រេចចិត្តបែបណា រវាងមនោសញ្ចេតនាស្នេហាជាតិនិងភរិយាជាទីស្រលាញ់របស់ខ្លួន ?
រឿង«ព្រះអាទិត្យអស្តង្គតនៅភូមិខ្ញុំ» ដែលសម្តែងដោយ បរមនាថនរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជានេះ នឹងបើកឲ្យទស្សនិកជនចូលរួមទស្សនាដោយសេរី នៅមជ្ឈមណ្ឌលបុប្ផាណា៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
