កីឡាជាតិ
កីឡាករ បឺត ខាំ បំបាក់កីឡាថៃឲ្យសន្លប់ក្នុងទឹកទី ៤ ក្រោយពីផ្អាកប្រកួតនៅកម្ពុជាជាង ២ ឆ្នាំ
× កីឡាករ បឺត ខាំ បានផ្តួលកីឡាថៃ ថាន វ៉ាលេក( Than Valek ) ឲ្យសន្លប់នៅក្នុងទឹក ៤ នៅសង្វៀនអាស៊ីអាគ្នេយ៍នៅយប់ថ្ងៃអាទិត្យ ។ តាំងពីទឹកទី ១ ដល់ទឹកទី ៤ កីឡាករ បឺត ខាំ បានវាយចំៗគោលដៅលើកីឡាករថៃ ដែលធ្វើឲ្យទស្សនជនជាអ្នកគាំទ្រ បឺត ខាំ កោតសរសើរយ៉ាងខ្លាំងចំពោះបច្ចេកទេសនៃការប្រកួតរបស់កីឡាករកម្ពុជារូបនេះ ក្រោយពីបាត់មុខពីសង្វៀនជាង ២ ឆ្នាំ ។ តាមពិតកីឡាករ ថាន វ៉ាលេក ដែលបរាជ័យក្រោមស្នាដៃរបស់ បឺត ខាំ ពេលនេះ ក៏ធ្លាប់ចាញ់កីឡាករខ្មែរ រឿង សោភ័ណ នៅសង្វៀនស៊ីធីអ៊ិន កាលពីខែមេសា ឆ្នាំ ២០១៥ កន្លងទៅថ្មីៗនេះ ។
ឈាមរបស់កីឡាករថៃ Than Valek ស្រក់ពេញមុខរបស់ខ្លួន ក្រោយពីត្រូវមួយកែងឆ្វេងចំថ្ងាស់របស់កំពូលកីឡាករប្រដាល់ក្បាច់ខ្មែរបុរាណ បឺត ខាំ នៅសង្វៀនអាស៊ីអាគ្នេយ៍នៅយប់ថ្ងៃអាទិត្យទី ១៧ ខែ ឧសភានេះ ។ ក្រោយពីរងបួសក្នុងចុងទឹកទី ៤ កីឡាករថៃរូបនេះ ត្រូវអាជ្ញាកណ្តាលរាប់ដល់ ៨ ហើយក្រុមគ្រូពេទ្យបានបញ្ឈប់ការប្រកួតជាបន្ទាន់ដោយសាររបួលក្បាលមានទំហំរធំពេក ដែលមិនអាចឲ្យកីឡាករ ថាន វ៉ាលេក ប្រកួតបន្ត ។ ជ័យជំនះ បានទៅលើកីឡាករកម្ពុជា បឺត ខាំ ។ វត្តមានរបស់កីឡាករកម្ពុជា ដែលពោរពេញដោយបច្ចេកទេសរូបនេះ លើកដំបូងនៅសង្វៀនអាស៊ីអាគ្នេយ៍ បានទទួលការសាទរយ៉ាងខ្លាំងពីសំណាក់ប្រជាជនខ្មែរដែលស្នេហាវិស័យកីឡា ។
សូមបញ្ជាក់ថា នេះជាការប្រកួតលើកដំបូងនៅក្នុងប្រទេសកំណើតរបស់ខ្លួន ក្រោយពីកីឡាករដ៏ល្បីរបស់កម្ពុជារូបនេះ បានបាត់ខ្លួនពីសង្វៀនមួយរយៈ បន្ទាប់ពីចាញ់កីឡាករប្រេស៊ីល ដោយរងបួសជើងធ្ងន់ កាលដើមឆ្នាំ ២០១៣ នៅសង្វៀនរបស់ទូរស្សន៍បាយ័ន ។ ដោយសាររបួសជើងធ្ងន់ធ្ងរកីឡាករ បឺត ខាំ ដែលប្រជាជនខ្មែរឲ្យរហ័ស្សនាមថា ជាកីឡាករដែលប្រកួតពោរពេញដោយបច្ចេកទេសដ៏កម្រមាននៅកម្ពុជា ត្រូវបាត់មុខពីសង្វៀនប្រកួតជាង ២ ឆ្នាំ ដើម្បីព្យាបាលរបួសរបស់ខ្លួន ។ ក្នុងពេលដែលព្យាបាលរបួលនេះ កីឡាករដ៏ល្បីរបស់កម្ពុជារូបនេះ តែងដង្ហោយរកជំនួយពីសប្បុរសជន ពីព្រោះខ្លួន និងក្រុមគ្រួសារគ្មានសមត្ថភាពរកថវិកា ដើម្បីព្យាបាលរបួសដោយខ្លួនឯងឡើយ ។
ក្រោយពីទទួលការព្យាបាលពីគ្រូបុរាណខ្មែរផង និងគ្រូពេទ្យផង ជាង ១ ឆ្នាំ កីឡាករប្រដាល់កម្ពុជាដ៏ពូកែរូបនេះ បានធូរស្រាលពីរបួស ហើយត្រូវសហព័ន្ធកីឡាប្រដាល់កម្ពុជា ជ្រើសរើសឲ្យទៅធ្វើជាគ្រូបង្វិកនៅប្រទេសជប៉ុន ជាមួយកីឡាករកម្ពុជា ៣ រូបផ្សេងទៀត ។ នៅជប៉ុនកីឡាករ ដេលពោរពេញដោយបច្ចេកទេសនៃការប្រកួតរូបនេះ បានបង្ហាត់សិស្សផង និងហ្វឹកហាត់ខ្លួនឯងផង ។ កាលពីខែមេសា ឆ្នាំ ២០១៥ កន្លងទៅ កីឡាករ បឺត ខាំ បានឡើងប្រកួតជាលើកដំបួងជាមួយកីឡាករកូរ៉េខាងត្បូង នៅប្រទេសជប៉ុន ក្រោយពីខ្លួនរងរបួសជើងកាលដើមឆ្នាំ ២០១៣ ។ ការប្រកួតនេះ កូឡាករ បឺត ខាំ បានផ្តួលឲ្យកីឡាករកូរ៉េ ឲ្យសន្លប់ក្នុងទឹកទី ២ ។ បូកទាំងជ័យជំនះ នៅលើដីមាតុភូមិរបស់ខ្លួន នៅថ្ងៃអាទិត្យនេះផង បឺត ខាំ ឈ្នះជាប់គ្នាពីរដងហើយ ក្រោយពីបាត់មុខលើសង្វៀនជាង ២ ឆ្នាំ ៕
© រក្សាសិទ្ធិដោយ thmeythmey.com