ជាតិ
សុខភាព
កម្ពុជាប្រកាសប្រើប្រព័ន្ធបច្ចេកវិទ្យា ដើម្បីប្រឆាំងជំងឺអេដស៍
×
ការប្រឈមនឹងការឆ្លងមេរោគអេដស៍នៅកម្ពុជានាពេលបច្ចុប្បន្ន នៅតែមានអត្រាខ្ពស់។ ដើម្បីសម្រចមហិច្ឆិតាឆ្ពោះទៅលុបបំបាត់ការឆ្លងថ្មីនៃមេរោគអេដស៍ក្នុងឆ្នាំ២០២០ខាងមុខរាជរដ្ឋាភិបាលកម្ពុជាសហការជាមួយដៃគូពាក់ព័ន្ធនានា បានប្រកាសប្រើប្រាស់ប្រព័ន្ធបច្ចេកវិទ្យា ដើម្បីប្រយុទ្ធប្រឆាំងនឹងជំងឺអេដស៍។
នៅថ្ងៃទី២១ឧសភានេះ គម្រោងគំរូមួយស្តីពីជំងឺអេដស៍នៅកម្ពុជា របស់ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ(USAID) សហការជាមួយអាជ្ញាធរជាតិប្រយុទ្ធប្រឆាំងជំងឺអេដស៍ និងក្រសួងប្រៃសណីយ៍ និងទូរគមនាគមន៍ បានប្រកាសឲ្យប្រប្រាស់នូវកញ្ចប់បច្ចេកវិទ្យាព័ត៌មានឬMobile Health (mHealth) ដែលជាកម្មវិធីផ្តល់ព័ត៌មានសុខភាពតាមទូរសព្ទដៃជាលើកដំបូងនៅកម្ពុជា។
កម្មវិធីនេះ បង្កើតក្នុងគោលដៅផ្តល់ព័ត៌មានទាក់ទងនឹងមេរោគអេដស៍ និងសេវាសុខភាពដទៃទៀត ទៅដល់ក្រុមដែលប្រឈមមុខខ្ពស់ក្នុងការឆ្លងមេរោគអេដស៍ ដែលរួមមាន ក្រុមស្ត្រីដែលធ្វើការនៅសេវាកម្សាន្ត ក្រុមបុរសស្រឡាញ់បុរស និងក្រុមបំឡែងភេទ។
បើយោងតាមរបាយការណ៍ដែលបានផ្សព្វផ្សាយនៅក្នុងការប្រកាសឲ្យប្រើប្រាស់នូវកញ្ចប់បច្ចេកវិទ្យាព័ត៌មាន នៅថ្ងៃនេះ បច្ចុប្បន្នក្រុមដែលប្រឈមមុខខ្ពស់ក្នុងការឆ្លងមេរោគអេដស៍មានជាង៦ម៉ឺននាក់ ក្នុងនោះមាន ក្រុមស្ត្រីដែលធ្វើការនៅសេវាកម្សាន្តមានចំនួន៤ម៉ឺន ក្រុមបុរសស្រឡាញ់បុរសចំនួន២ម៉ឺននាក់ និងក្រុមបំឡែងភេទមានចំនួន២,៦០០នាក់។
កញ្ចប់បច្ចេកវិទ្យាព័ត៌មាននេះ បង្កើតឡើងដោយផ្អែកលើកម្មវិធី SMART-Girl M-Style និងSreySrosរបស់USAID និងមាន២ផ្នែក គឺសហគមន៍ខ្ញុំ«My Community»និងសំឡេងសម្រាប់អ្នក«Voice4U»។ សហគមន៍ខ្ញុំគឺជាបណ្តុំគេហទំព័រឆ្លើយឆ្លង និងបណ្តាញសង្គមហ្វេកប៊ុក (SreysroskhmerនិងMstylekhmer) ដែលបង្ហាញទីតាំងផ្តល់សេវាតាមផែនទីអេឡិចត្រូនិក និងព័ត៌មានសម្រាប់ការបញ្ជូនដែលគេអាចទាញយកព័ត៌មានទាក់ទងនឹងជំងឺអេដស៍ ការពិនិត្យ និងវាយតម្លៃកម្រិតប្រឈមនឹងការឆ្លងមេរោគអេដស៍ និងព័ត៌មានផ្សេងទៀត។ សំឡេងសម្រាប់អ្នក ជាប្រព័ន្ធឆ្លើយតបតាមសំឡេងតាមរយៈទូរសព្ទដៃ ដេលផ្លត់ដល់អ្នកដៅនូវការប្រឹក្សាតាមទូរសព្ទ ព័ត៌មានតាមតម្រូវការទាក់ទងនឹងសុខភាព និងជំងឺអេដស៍ ព្រមទាំងការរំលឹកអំពី ថ្នាំ និងការណាត់ជួបគ្រូពេទ្យ។ លេខទូរសព្ទ៤ខ្ទង់ គឺ១២៩៥ នឹងត្រូវដាក់ឲ្យហៅចូលដោយឥតគិតថ្លៃពីគ្រប់ប្រព័ន្ធទាំងអស់ នៅក្នុងខែមិថុនាខាងមុខ ។
ការប្រើប្រាស់លេខទូរសព្ទ១២៩៥នេះ នឹងផ្តល់ភាពងាយស្រួលទៅដល់ក្រុមគោលដៅ អាចស្វែងរកព័ត៌មាន និងការកម្សាន្ត ដោយគ្មានការភ័យខ្លាចនឹងការរើសអើង និងអាចកាត់បន្ថយការមើលងាយពួកគាត់ផងដែរ៕
© រក្សាសិទ្ធិដោយ thmeythmey.com