ជាតិ
នយោបាយជាតិ
ខុមហ្វ្រែល៖ ចំនួនសមាជិករដ្ឋាភិបាលប៉ោងធំដោយសារតែគ្មានបទបញ្ញត្តិចែងច្បាស់លាស់ គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) បានចេញរបាយការណ៍ថ្មីមួយទៀត ទាក់ទងនឹងការអនុវត្តន៍គោល នយោបាយ របស់រាជរដ្ឋាភិបាលនីតិកាលទី៥ ឆ្នាំទី១ ។របាយការណ៍ចេញផ្សាយនៅថ្ងៃទី២៨ ឧសភានេះ បានបង្ហាញថា រដ្ឋាភិបាលកម្ពុជាមានសមាជិកសរុបប្រមាណ ៦០០នាក់ ហើយខុមហ្រែ្វល ចាត់ទុកថា នេះជាចំនួនច្រើនលើសលប់បើប្រៀបធៀបទៅនឹងចំនួន គណៈរដ្ឋមន្ត្រីនៃប្រទេសមួយចំនួនក្នុងតំបន់ ដូចជា បង់ក្លាដេស និងឥណ្ឌា ដែលមានប្រជាជនច្រើនជាងកម្ពុជា។
យោងតាមរបាយការណ៍ស្តីពី ការឃ្លាំមើល និងការផ្តល់ពិន្ទុ ដែលផ្អែកលើការវិភាគព័ត៌មាន ទិន្នន័យស្ថាប័នជាតិ និងអន្តរជាតិនានា រាជរដ្ឋាភិបាលនីតិកាលទី៥ ដែលកំពុងដឹកនាំដោយ គណបក្សប្រជាជនកម្ពុជាបានបង្កើនក្រសួងដល់ចំនួន ២៨ ដោយលុបអាជ្ញាធរជាតិមួយ។
របាយការណ៍ខុមហ្វ្រែល បានរកឃើញថា រដ្ឋាភិបាល នៅតែមានចំនួនច្រើនរហូតដល់ប្រមាណ ៦០០នាក់ ក្នុងនោះ រួមមាន សមាជិកគណៈរដ្ឋមន្ត្រីចំនួន ២៤៤នាក់ (នាយករដ្ឋមន្ត្រី ១រូប ឧបនាយករដ្ឋមន្ត្រី ៩រូប ទេសរដ្ឋមន្ត្រី ១៥រូប រដ្ឋមន្ត្រី ៣៣រូប (រដ្ឋមន្ត្រីអមគណៈប្រតិភូ១៤រូប) និងរដ្ឋលេខាធិការ ១៨៧រូប) និងអនុរដ្ឋលេខាធិការចំនួន ២៣៨នាក់ ព្រមទាំងទីប្រឹក្សារដ្ឋាភិបាលចំនួនប្រមាណ ១០០នាក់ និងមន្ត្រីនយោបាយជាន់ខ្ពស់ផ្សេងទៀត។
អ្វីគួរកត់សម្គាល់នោះចំនួនស្ត្រីក្នុងសមាសភាពគណៈរដ្ឋមន្ត្រីបានកើនឡើងដល់ទៅ១៧ភាគរយនៃនីតិកាលទី៥។ មូលហតុដែលនាំឲ្យមានចំនួនរដ្ឋាភិបាលច្រើននេះ ខុមហ្រែ្វល ចាត់ទុកថា គឺដោយសារតែពុំមានបទបញ្ញត្តិ ចែងកំណត់ច្បាសលាស់ពីចំនួនសមាជិករដ្ឋាភិបាល។
«ប្រៀបធៀបជាមួយប្រទេសជិតខាង ជាពិសេសប្រទេសនៅក្នុងតំបន់ជាមួយគ្នា រចនាសម្ព័ន្ធ ដឹកនាំរាជរដ្ឋាភិបាលប្រទេសកម្ពុជានាពេលបច្ចុប្បន្នពិតជាមានចំនួនច្រើន ខណៈដែលចំនួន សមាជិកសភានីតិកាលទី៥ មិនសមាមាត្រានឹងប្រជាសាស្ត្រ ទំហំភូមិសាស្ត្រ និងសេដ្ឋកិច្ច»។ នេះជាសង្ងត់ធ្ងន់របស់ខុមហ្វ្រែល។
បើតាមខុមហ្វ្រែល ចំនួននេះច្រើនលើសលប់ បើប្រៀបធៀបនឹងប្រទេសបង់ក្លាដេស ជាប្រទេសមានចំនួនប្រជាជនចំនួន ១៥៨,៥១៣,០០០នាក់ មានសមាជិកគណៈរដ្ឋម ន្ត្រីចំនួនតែ ៥៥រូបប៉ុណ្ណោះ រីឯ ប្រទេសឥណ្ឌា មានចំនួនសមាជិកគណៈរដ្ឋមន្ត្រីត្រឹមតែ ៦៦រូបប៉ុណ្ណោះ ស្របពេលដែលប្រជាជនមានចំនួន ១,២៦៧,៤០២,០០០នាក់។
ជារៀងរាល់អាណត្តិរដ្ឋាភិបាលសង្គមស៊ីវិល អ្នកវិភាគនានា និងគណបក្សប្រឆាំងផងតែងតែរិះគន់ទំហំគណៈរដ្ឋមន្ត្រី និងទំហំនៃសមាជិករដ្ឋាភិបាលដែលមានខ្លួនសំពីងសំពោងខ្លាំងជ្រុលហើយ និងស្រូបយកថវិកាជាតិយ៉ាងសម្បើម។ តាមពិតក្រុមអ្នកសង្កេតការណ៍រិះគន់ត្រឹមទំហំគណៈរដ្ឋមន្ត្រីនោះឡើយ តែជាទំហំសមាជិករដ្ឋាភិបាល និងពិសេសថ្នាក់ដឹកនាំក្រសួងដែលមានចំនួនរដ្ឋលេខាធិការ និងអនុរដ្ឋលេខារាប់មិនអស់។
កាលពីថ្ងៃទី១០ មីនា ឆ្នាំ២០១៥ ក្នុងពិធីចែកវិញ្ញាបនបត្រនិស្សិតសាលាភូមិន្ទរដ្ឋបាល លោកនាយករដ្ឋមន្ត្រី ហ៊ុន សែន បានមានប្រសាសន៍ថា ទំហំនៃគណៈរដ្ឋមន្ត្រីបច្ចុប្បន្នមិនធំ ដូចការរិះគន់នោះឡើយ។
លោកនាយករដ្ឋមន្ត្រីបានពន្យល់អំពីមូលហេតុដែលធ្វើឲ្យគេមើលឃើញថា គណៈរដ្ឋមន្ត្រីរបស់លោកធំប៉ោងនោះ គឺដោយសារតែរដ្ឋធម្មនុញ្ញកម្ពុជាបានសរសេរចែងហៅឈ្មោះគណៈរដ្ឋមន្ត្រីដែលគ្របដណ្តប់ពីនាយករដ្ឋមន្ត្រី រហូតដល់រដ្ឋលេខាធិការ។ ក៏ប៉ុន្តែសម្រាប់លោកប្រមុខរដ្ឋាភិបាល រដ្ឋលេខាធិការនៅតាមក្រសួងសព្វថ្ងៃមិនមានការទទួលខុសត្រូវចំពោះមុខនាយករដ្ឋមន្ត្រី និងចំពោះរដ្ឋសភានោះទេ។ ដូច្នេះ ចំពោះលោកនាយករដ្ឋមន្ត្រី គណៈរដ្ឋមន្ត្រីពិតប្រាកដ គឺមានត្រឹមតែរដ្ឋមន្ត្រី ទេសរដ្ឋមន្ត្រី ឧបនាយករដ្ឋមន្ត្រី និងនាយករដ្ឋមន្ត្រី។
ដើម្បីបន្ថយរូបភាពដែលធ្វើឲ្យគេមើលឃើញថា គណៈរដ្ឋមន្ត្រីមានទំហំធំ ដោយសារតែមានចំនួនរដ្ឋលេខាធិការនោះ លោក ហ៊ុន សែន បានបង្ហើបឲ្យដឹងថា លោកធ្លាប់មានបំណងធ្វើវិសោធនកម្មរដ្ឋធម្មនុញ្ញ ដើម្បីដកចេញនូវមុខតំណែងរដ្ឋលេខាធិការពីកញ្ចប់គណៈរដ្ឋមន្ត្រី៕
© រក្សាសិទ្ធិដោយ thmeythmey.com