កីឡាជាតិ
ជាតិ
ស៊ីហ្គេម៖ វៀតណាម និងថៃ ទទួលជ័យជម្នះ ៦-០ ដូចគ្នាក្នុងការប្រកួតបើកឆាកពូល B កីឡាករវៀតណាម Tran Phi Son អបអរការស៊ុតបាល់បញ្ចូលទីលើប្រ៊ុយណេ។ Photo: SINGSOC
× ក្រុមកីឡាបាល់ទាត់ជម្រើសជាតិអាយុក្រោម២៣ឆ្នាំ វៀតណាម និងថៃ សុទ្ធតែបានទទួលជ័យជម្នះរៀងៗខ្លួនលើក្រុមប្រ៊ុយណេ និងឡាវ នាការប្រកួតបើកឆាកក្នុងពូល B នៃព្រឹត្តិការណ៍កីឡាស៊ីហ្គេមនៅកីឡដ្ឋាន Bishan Stadium ប្រទេសសិង្ហបុរី នាល្ងាចថ្ងៃទី២៩ ខែឧសភា ឆ្នាំ២០១៥ ។
សម្រាប់ការប្រកួតគូទីមួយក្នុងពូល B វៀតណាមបានបំបាក់ក្រុមប្រ៊ុយណេ ៦-០ ដោយ Le Thanh Binh រកបានគ្រាប់បញ្ចូលទីនៅពាក់កណ្តាលតង់ទីមួយ ហើយ៥គ្រាប់ទៀតសម្រេចបាននៅតង់ទី២ ដោយកីឡាករ Tran Phi Son, Mac Hong Quan, Pham Duc Huy, Nguyen Cong Phuong និង Pham Manh Hung។
រីឯការប្រកួតគូទីពីរ ម្ចាស់ការពារតំណែងជើងឯកថៃ បានយកឈ្នះឡាវ ក្នុងលទ្ធផល ៦-០ ដូចគ្នា។ ខ្សែប្រយុទ្ធ Chananan Pombuppha ដែលលេងឲ្យក្លិប Muangthong United បានស៊ុតបាល់បញ្ចូលទីតែម្នាក់ឯងចំនួន៤គ្រាប់ ខណៈពីរគ្រាប់សម្រេចផលដោយ Narubadin Weerawatnodom និង Nurul Sriyankem។
ជាមួយនឹងជ័យជម្នះ វៀតណាម និងថៃ កំពុងឈរលើកំពូលតារាងបណ្តោះអាសន្ន។ នៅថ្ងៃទី៣០ ខែឧសភា នេះ ម៉ាឡេស៊ី ត្រូវប៉ះជាមួយទីម័រខាងកើត សម្រាប់ការប្រកួតនៅក្នុងពូល B បន្ថែមទៀត៕
© រក្សាសិទ្ធិដោយ thmeythmey.com