អន្តរជាតិ
ប្រមុខការពារជាតិអាមេរិកព្រមានចិន ក្រោយចិនបញ្ជូនកាំភ្លើងធំទៅសមុទ្រចិនខាងត្បូង
× រដ្ឋមន្ត្រីការពារជាតិអាមេរិក បានព្រមានចិនចំៗនៅចំពោះមុខមន្ត្រីជាន់ខ្ពស់ការពារជាតិឯទៀតមកពីប្រទេសអាស៊ីប៉ាស៊ីហ្វិកក្នុងវេទិការសន្តិសុខ Shangri-La ថា សកម្មភាពសាងសង់កោះរបស់ចិននៅក្នុងដែនជម្លោះសមុទ្រចិនខាងត្បូងកំពុងធ្វើឲ្យសន្តិសុខនៅអាស៊ីប៉ាស៊ីហ្វិកផុយស្រួយខ្លាំង។ ចិនបានពង្រាយកាំភ្លើងធំរួចដែរនៅកោះដែលខ្លួនទាមទារ។ យ៉ាងណាមិញ ប្រមុខការពារជាតិអាមេរិកខាងលើបានស្នើឲ្យមានការប្រើប្រាស់វិធានការការទូតដើម្បីដោះស្រាយបញ្ហាជម្លោះដែនទឹកនេះ ដើម្បីការពារស្ថានការណ៍។
នៅក្នុងកិច្ចសន្ទនា Shangri-La ដែលរៀបចំឡើងក្នុងប្រទេសសិង្ហបុរី រដ្ឋមន្ត្រីការពារជាតិអាមេរិក លោក Ashton Carter បានថ្លែងសុន្ទរកថា ព្រមានចិន ចំពោះការបន្តសាងសង់កោះសិប្បនិម្មិតនៅតំបន់ជម្លោះសមុទ្រចិនខាងត្បូង។ រដ្ឋមន្ត្រីការពារជាតិខាងលើបានសង្កត់ធ្ងន់ថា ការបន្តសាងសង់កោះយ៉ាងគឃ្លើននេះ កំពុងតែបង្កការគំរាមកំហែងដល់សន្តិសុខ និងស្ថិរភាពនៃតំបន់អាស៊ីប៉ាស៊ីហ្វិកទាំងមូល។ ប៉ុន្តែក្រៅពីព្រមានចិន ឲ្យបញ្ឈប់សកម្មភាពខ្លួន រដ្ឋមន្ត្រីការពារជាតិអាមេរិកក៏បានដង្ហើយស្នើឲ្យមានការប្រើប្រាស់មធ្យោបាយការទូតដើម្បីដោះស្រាយ និងបន្ធូរបន្ថយកម្តៅនៅក្នុងជម្លោះនេះផង។
បើតាមសម្តីរបស់ប្រមុខការពារជាតិអាមេរិក អាមេរិកទទួលស្គាល់ថា មានប្រទេសជាច្រើនដែលបានសាងសង់ប៉មការពារនៅលើ ឬក្បែរកោះជម្លោះ ប៉ុន្តែមិនដូចចិនឡើយ។ សកម្មភាពរបស់ចិនដែលសង់កោះសិប្បនិម្មិត ក្លាយជារឿងពិបាកប៉ាន់ស្មាន និងធ្វើឲ្យសន្តិសុខតំបន់ផុយស្រួយថែមទៀត។ លោក Carter លើកឡើងថា រដ្ឋបាលក្រុងវ៉ាស៊ីនតោនបារម្ភខ្លាំងមែនទែនចំពោះទង្វើចិននេះ ដ្បិតគេមិនអាចប៉ាន់ស្មានបានឡើយ ថាក្រុងប៉េកាំងនឹងបន្តវាតទឹកដីរបស់ខ្លួនទៅដល់ទីណា នៅក្នុងដែនជម្លោះសមុទ្រចិនខាងត្បូង។
មុនឈានដល់ព្រមានចិនចំពោះមុខមន្ត្រីជាន់ខ្ពស់ការពារជាតិដែលមកពីបណ្តាប្រទេសអាស៊ីប៉ាស៊ីហ្វិកនេះ ចិននិងអាមេរិកបានទាស់ទែងពាក្យសម្តីគ្នារួចហើយ ដោយសារសហរដ្ឋអាមេរិកប្រកាសទាមទារឲ្យចិន បញ្ឈប់ការសាងសង់កោះសិប្បនិម្មិត។
ជុំវិញការកើនឡើងកម្តៅយោធានេះ កាលពីប៉ុន្មានថ្ងៃមុនក្រសួងការពារជាតិចិនបានប្រកាសផ្តាស់ប្តូរយុទ្ធសាស្ត្រយោធាបង្កើនអំណាចកងទ័ពជើងទឹក និងជើងអាកាសផង ដែលសកម្មភាពក្រុងប៉េកាំងនេះបញ្ជាក់ថាចិនត្រៀមខ្លួនដើម្បីការពារនិងប្រយុទ្ធ បើចាំបាច់។
សូមជម្រាបបន្តិចថា រដ្ឋមន្ត្រីការពារជាតិអាមេរិកខាងលើកំពុងស្ថិតក្នុងដំណើរទស្សនកិច្ចមកកាន់តំបន់អាស៊ីចំនួន១១ថ្ងៃ ក្នុងនាមជាប្រមុខការពារជាតិក្រុងវ៉ាស៊ីនតោនថ្មី។ ដំណើរទស្សនកិច្ចរបស់លោក ផ្តោតជាពិសេសលើបញ្ហាសន្តិសុខដែនសមុទ្រ ខណៈពេលដែលកែវភ្នែកទាំងពីររបស់ក្រុងវ៉ាស៊ីនតោនកំពុងបន្តមើលសកម្មភាពចិនដែលកំពុងទន្ទ្រានកាន់កាប់តំបន់ត្រួតស៊ីគ្នានៅសមុទ្រចិនខាងត្បូង៕
© រក្សាសិទ្ធិដោយ thmeythmey.com