ពីនេះ ពីនោះ
ក្លឹបកម្សាន្តពេលថ្ងៃ កំពុងពង្វក់សិស្សវិទ្យាល័យមួយចំនួនឲ្យភ្លេចការសិក្សា
× ភ្នំពេញ៖ យុវវ័យមួយចំនួនកំពុងឆ្លក់វង្វេងនឹងការសប្បាយ ផឹកស៊ី រាំរែក ក្នុងក្លឹបកម្សាន្ត និងហាងផឹកស៊ីពេលថ្ងៃ ស្ទើរតែភ្លេចពេលវេលាសិក្សា។ ពួកគេមួយចំនួនកុហកឪពុកម្តាយ ថាទៅសាលារៀន តែបែ ជាគេចម៉ោងសិក្សា នាំគ្នាដូរសំលៀកបំពាក់ ចូលហាងផឹកស៊ីសប្បាយជាមួយមិត្តភក្តិទៅវិញ។ អ្នកខ្លះ គៀក កើយជាមួយគូរស្នេហ៍ផឹកស៊ីហ៊ឺហា ទាំងសំលៀកបំពាក់ជាសិស្សក៏មានផងដែរ ពួកគេហាក់មិនខ្វល់ពីតម្លៃនៃឯកសណ្ឋានរបស់ខ្លួននោះឡើយ។
ជាទូទៅគេធ្លាប់តែដឹងថាសេវាកម្មក្លឹបកម្សាន្តមានតែនៅពេលយប់ប៉ុណ្ណោះ ប៉ុន្តែនៅពេលបច្ចុប្បន្ននេះ មានក្លឹបកម្សាន្ត និងហាងផឹកស៊ីពេលថ្ងៃជាច្រើន ចាប់បើកដំណើរការចាប់ពីម៉ោង១២ថ្ងៃត្រង់ រហូតដល់យប់តែម្តង ហើយក៏កំពុងទាក់ទាញអតថិជនបានយ៉ាងច្រើន ជាពិសេសគឺក្រុមយុវជន និងយុវតី ដែលមានអាយុ ក្រោយ ២០ឆ្នាំ ឬលើសតិចតួច ពោលគឺសុទ្ធសឹងជាសិស្សដែលរៀនត្រឹមថ្នាក់វិទ្យាល័យ។
ក្លឹបកម្សាន្តមួយចំនួន មានសេវាកម្ម «Free» ជូនក្រុមនារីៗដែលមានសម្រស់ស្អាត ឬបញ្ចុះតម្លៃច្រើន ដើម្បីទាក់ទាញអតិថិជនជាបុរស កត្តាទាំងនេះហើយដែលជំរុញចិត្តពួកគេឲ្យចូលមកកម្សាន្តញឹកញាប់។ ជាកន្លែងបិទបាំង ព្រមជាមួយនឹងសំឡេងតន្ត្រីកន្ត្រាក់អារម្មណ៍ និងពន្លឺភ្លើងពណ៌ចម្រុះផងដែរនោះ ក្លឹបកម្សាន្តពេលថ្ងៃ បាន និងកំពុងពង្វក់យុវវ័យមួយចំនួន ឲ្យហ៊ានកុហកឪពុកម្តាយ និងឆ្លៀតឱកាសគេចម៉ោងសិក្សាផងដែរ៕
© រក្សាសិទ្ធិដោយ thmeythmey.com