កីឡាជាតិ
ជាតិ
ស៊ីហ្គេម៖ ក្រុមកីឡាបាល់ទាត់ U-23 កម្ពុជា ចេញទៅសិង្ហបុរី ក្រុមកីឡាករ U-23 កម្ពុជា ថត Selfie ជាមួយអ្នកថតរូបឈ្មោះ កឹម សុវណ្ណា នៅមុនពេលចេញដំណើរទៅកាន់ប្រទេសសឹង្ហបុរី
× ក្រុមបាល់ទាត់ជម្រើសយុវជនក្រោយអាយុ២៣ឆ្នាំរបស់កម្ពុជា (U23) នឹងហោះទៅប្រទេសសិង្ហបុរី នៅវេលាម៉ោង ៩:៣០ នាទីព្រឹកថ្ងៃទី ៣១ ខែ ឧសភា ឆ្នាំ ២០១៥ នេះ ដើម្បីចូលរួមប្រកួតវគ្គជម្រុះក្នុងពូល A នៃព្រឹត្តិការណ៍កីឡាស៊ីហ្គេមឆ្នាំ ២០១៥ នៅទីនោះ។
សម្រាប់ក្រុមថ្នាក់ដឹកនាំមាន ក្រៅពីលោក Lee Tae Hoon ជាគ្រូបង្វឹកបង្កោល មានលោក អ៊ុង កងយ៉ានិត, អ៊ុំ សាវង្ស និង លោក ហ៊ោ សុខហេង ជាជំនួយការគ្រូបង្វឹក លោក អ៊ិន សុខា ជាគ្រូអ្នកចាំទី លោក ហៃ សក្ខរី និង លោក ខាត់ ចាន់ហាក់ ជាគ្រូពេទ្យ ផងដែរ។
កីឡាករទាំង ២០ នាក់ក្នុងបញ្ជីមាន៖
អ្នកចាំទី៖ អ៊ុំ សេរីរ័ត្ន, ប៉េង ប៊ុនឆាយ
ខ្សែការពារ៖ សឿយ វិសាល, នេន សុធារ័ត្ន, ទូច បញ្ចរ៉ុង, សុខ សុវណ្ណ, ណុប តុលា,ង៉យ ស្រ៊ីន និង សំអឿន ពិដោរ។
ខ្សែបម្រើ៖ ហួយ ផល្លីន, ឈិន ឈឿន, សុះ ស៊ូហាណា, ទិត្យ ឌីណា, អ៊ុល រ៉ាវី, ប្រាក់ មុន្នីឧត្តម, កែវ សុខផេង, ចាន់ វឌ្ឍនាកា
ខ្សែប្រយុទ្ធ៖ ផានី អ៊ីរដ្ឋា, ភួង សុខសាណា, សុខ ចាន់រស្មី។
ចំពោះលទ្ធផលក្នុងការប្រកួតកំដៅសាច់ដុំសំខាន់ៗនាពេលកន្លងមកមាន ស្មើ U23 ម៉ាឡេស៊ី ៣ ទល់ ៣ នៅថ្ងៃទី ២៩ ខែ មេសា ហើយនៅថ្ងៃទី ១ ឧសភា ចាញ់ក្រុមម៉ាឡេស៊ី ក្នុងប្រកួតទី២ ដោយលទ្ធផល ៣ ទល់ ២។ នៅថ្ងៃទី ១៣ ខែ ឧសភា ចាញ់ U23 កូរ៉េខាងត្បូង ១ ទល់ ០ នៅទឹកដីវៀតណាម ហើយនៅថ្ងៃទី ១៥ មិថុនា ឈ្នះក្លិបខេត្តឡុងអាន របស់វៀតណាម ៣ ទល់ ១ និង ស្មើជាមួយជម្រើសជាតិឈុតធំ ២ ទល់ ២ នៅបាទី កាលពីថ្ងៃទី ២២ ខែ ឧសភា កន្លងទៅ។
សម្រាប់ប្រកួតជម្រុះនៅពូល A ក្នុងកីឡាស៊ីហ្គេមឆ្នាំ ២០១៥ ក្រុម U23 កម្ពុជា ត្រូវប្រកួតបើកឆាកប៉ះក្រុម ហ្វីលីពីន នៅថ្ងៃទី ៣ ខែ មិថុនា ហើយបន្តប៉ះ ក្រុមឥណ្ឌូណេស៊ី នៅថ្ងៃទី ៦ ខែ មិថុនា ជួបក្រុមម្ចាស់ផ្ទះសិង្ហបុរី នៅថ្ងៃទី ៨ មិថុនា និង ប្រកួតចុងក្រោយជួបក្រុមមីយ៉ាន់ម៉ា នៅថ្ងៃទី ១០ មិថុនា ឆ្នាំ ២០១៥។
គិតត្រឹមពេលនេះ បាល់ទាត់ជាកីឡាទី៤ របស់កម្ពុជា ក្នុងចំណោមកីឡាទាំង ២២ ប្រភេទដែលបានធ្វើដំណើរទៅប្រកួតក្នុងកីឡាស៊ីហ្គេម មុនគេ បន្ទាប់ពីប្រណាំងសេះ វាយកូនឃ្លីលើតុ និង គុនដាវ៕
© រក្សាសិទ្ធិដោយ thmeythmey.com