ពីនេះ ពីនោះ
ឥទ្ធិពលស្រា
(បទពាក្យ៨)
-ស្រាជាសារជាតិនាំឱ្យស្រវឹង ផឹកច្រើនកំហឹងខឹងក្តៅរោលរា
មុខយក្សមុខខ្លាលែងស្គាល់ខ្នែងអ៊ា ប៉ងផ្តាច់ជន្មាឥតយល់ខុសត្រូវ។
-ស្រាថោកស្រាថ្លៃអាស្រ័យអ្នកផឹក ផឹកច្រើនប្រមឹកដួលដេកតាផ្លូវ
ទាំងវ័យកណ្តាលក្មេងចាស់សក់ស្កូវ ប្រឹងសាងអាស្រូវទុកជូនគ្រួសារ។
-ស្រាជាសារធាតុបំផ្លាញសុខភាព ខ្លាចគេឈ្នះប្រៀបផឹកផ្តាច់សង្ខា
ផឹកផ្តាំកូនចៅញ្ញាតិផៅខេមរា ទាំងក្រុងចម្ការផឹកប្តូររង្វាន់។
-ស្រាសស្រាថ្នាំត្រាំចំណាំងឈើ ស្រុកក្រោមស្រុកលើផលិតមិនទាន់
ផឹកលក់ដីស្រែលក់គោជ្រូកមាន់ កញ្ច្រៀវឮលាន់បំពងលោកិយ។
-ស្រាជាសារជាតិនាំឱ្យបំពាន ឃោរឃៅធ្វើព្រានចាប់រំលោភស្រី
កាប់ចាក់ទាត់ធាក់ឥតខ្លាចក្រែងអ្វី ជាជនអប្រិយដោយសារតែស្រា។
-ស្រាជាសារជាតិនាំឱ្យវង្វេង ក្លាយជាអ្នកលេងក្អេងក្អាងហានក្លា
ស្រាលក់កិត្តិយសមុខមាត់គ្រួសារ បំផ្លាញជាតាឱ្យអប្បលក្ខណ៍។
-ស្រាជាសារជាតិពង្វក់ឱ្យវល់ បំពុលបញ្ញាឱ្យក្បត់សច្ចៈ
ស្រាឱ្យមនុស្សជាទៅជាខ្វាក់ ទោះគុកច្រវាក់ក៏មិនខ្លាច។
-ស្រាជាឧសថកម្ទេចស្មារតី កោងកាចតិរ្ថិយឈ្លើយកំណាច
ស្រាចូលខ្លួនមនុស្សផ្ទុះអង់អាច ស្រាជាបិសាចប្រល័យអនាគត៕
កំណត់ត្រា, កែសម្រួល ដោយ៖ វិឆ័យ សុភី
© រក្សាសិទ្ធិដោយ thmeythmey.com