ជាតិ
ប៊ែកខេម មកកម្ពុជាដើម្បីរកមធ្យោបាយជួយកុមាររងគ្រោះដោយអំពើហិង្សា ក្រោមគម្រោងមូលនិធិ 7 បែកខេម ទូតសុច្ឆន្ទៈរបស់អង្គការយូនីសេហ្វ បានធ្វើការស្វែងយល់ពីបញ្ហាលំបាកកុមារនៅខេត្តសៀមរាប។ រូប យូនីសេហ្វ
× ក្រោមគម្រោងមូលនិធិ 7 បែកខេម ទូតសុច្ឆន្ទៈរបស់អង្គការយូនីសេហ្វ បានធ្វើការស្វែងយល់ពីបញ្ហាលំបាកកុមារនៅខេត្តសៀមរាប។ រូប យូនីសេហ្វ
× ដេវីដ ប៊ែកខេម ឯកអគ្គរាជទូតសុច្ឆន្ទៈអង្គការយូនីសេហ្វ បានធ្វើដំណើរមកកាន់ប្រទេសកម្ពុជា ក្នុងគោលបំណងស្វែងយល់ពីការងាររបស់អង្គការយូនីសេហ្វនិងដៃគូ ដែលកំពុងជួយគាំទ្រដល់កុមាររងគ្រោះពីការរំលោភបំពានលើរាងកាយ ផ្លូវភេទ និងផ្លូវចិត្ត និងកំពុងការពារកុមារដែលងាយរងគ្រោះពីសំណាក់គ្រោះថ្នាក់ផ្សេងៗទៀត។ នេះបើតាមសេចក្តីប្រកាសព័ត៌មានរបស់អង្គការយូនីសេហ្វនៅថ្ងៃទី១៥ ខែមិថុនា។
នៅដើមឆ្នាំនេះ គឺជាទិវាខួបលើកទី១០ របស់លោក ដេវីដ ប៊ែកខេម ដែលបានទទួលភារកិច្ចជាឯកអគ្គរាជទូតសុច្ឆន្ទៈអង្គការយូនីសេហ្វ ហើយរូបលោករួមទាំងអង្គការនេះបានបង្កើតនូវមូលនិធិមួយដែលមានឈ្មោះថា «លេខ៧ មូលនិធិដេវីដ ប៊ែកខេម និងយូនីសេហ្វ»(http://www.7.org) ដើម្បីជួយការពារកុមារពីគ្រោះថ្នាក់។ មូលនិធិនេះនឹងគាំទ្រដល់អង្គការយូនីសេហ្វ ឲ្យអនុវត្តនូវកម្មវិធីអភិវឌ្ឍន៍ជីវិតកុមារនៅទូទាំងពិភពលោក រួមទាំងកុមាររងគ្រោះដោយអំពើហិង្សានៅក្នុងប្រទេសកម្ពុជាផងដែរ។
លោក ដេវីដ ប៊ែកខេម បានប្តេជ្ញាចិត្តប្រើនូវសម្លេង ឥទ្ធិពល និងទំនាក់ទំនងដ៏មានកិត្យានុភាពរបស់លោក ដើម្បីប្រមូលនូវថវិកា និងជម្រុញមេដឹកនាំពិភពលោក ឲ្យធ្វើការផ្លាស់ប្តូរប្រកបដោយភាពវិជ្ជមានយូរអង្វែងសម្រាប់កុមារ។ លោក ដេវីដ ប៊ែកខេម ឯកអគ្គរាជទូតសុច្ឆន្ទៈអង្គការយូនីសេហ្វ បានមានប្រសាសន៍ថា ៖«ខ្ញុំមកកាន់ប្រទេសកម្ពុជា ដើម្បីជួបកុមាររងគ្រោះពីអំពើហិង្សា ស្តាប់នូវរឿងរ៉ាវរបស់ពួកគេ និងស្វែងយល់ពីការងាររបស់អង្គការយូនីសេហ្វនិងដៃគូ ក្នុងការជួយកុមារទាំងនោះឲ្យមាន សុវត្ថិភាព។ សម្រាប់ខ្ញុំ វាតក់ស្លុតណាស់ ដែលមានកុមារម្នាក់នៅរៀងរាល់ប្រាំនាទី បានស្លាប់ដោយសារអំពើហិង្សា នៅកន្លែងណាមួយនៅក្នុងពិភពលោក»។
យូនីសេហ្វលើកកម្ពស់សិទ្ធិនិងសុខុមាលភាពកុមារគ្រប់រូប នៅក្នុងគ្រប់ការងារទាំងអស់។ សហការជាមួយនឹងដៃគូ យើងធ្វើការនៅក្នុងប្រទេសនិងដែនដីចំនួន១៩០ ដើម្បីប្រែក្លាយការប្ដេជ្ញាចិត្ដខាងលើឲ្យទៅជាសកម្មភាពអនុវត្ដជាក់ស្ដែង តាមរយៈការផ្ដោតការយកចិត្ដទុកដាក់ជាពិសេសដល់កុមារដែលងាយរងគ្រោះជាងគេនិងមិនត្រូវបានគេយកចិត្តទុកដាក់ ដើម្បីជាប្រយោជន៍ដល់កុមារគ្រប់រូបនៅគ្រប់ទិសទី៕
© រក្សាសិទ្ធិដោយ thmeythmey.com