ពិភពតារា៖ ម៉ា នីកា បដិសេធព័ត៌មានស្នេហាបុរសម្នាក់
×
ភ្នំពេញ៖ តារាម៉ូដែលនិងសម្តែង កញ្ញា ម៉ានីកា កាលពីពេលកន្លងទៅធ្លាប់បានប្រកាសឲ្យមហាជនជនដឹងជាសារធារណៈថា នៅក្នុងឆ្នាំ២០១៥នេះ នាងនឹងបើកចំហទ្វាបេះដូង រង់ចាំទទួលស្នេហ៍ពិត ដោយពុំមានការរុញរាឡើយ។ ការប្រកាសនេះ មិនទាន់ទាំងបានប៉ុន្មានថ្ងៃផង ថ្មីៗនេះក៏មានព័ត៌មានថា នីកា កំពុងសាងភាពផ្អែមល្ហែម និងស្និទ្ធស្នាលខុសប្លែកជាមួយបុរសវ័យប្រហែលគ្នាម្នាក់។
ការទំលាយចេញពីប្រភពអ្នកសិល្បៈបានបង្ហើបមកថា រយៈពេលថ្មីៗនេះ គេតែងបានឃើញកញ្ញា ម៉ានី បង្ហាញភាពស្និទ្ធស្នាលជាមួយបុរសម្នាក់ ដែលមានវ័យប្រហែលគ្នា នឹងអាចជាការចាប់ផ្តើមសាងជីវិតស្នេហា រវាងតារាស្រីរូបនេះ ជាមួយបុរសនោះស្របពេលដែលនាងបានប្រកាសបើកបេះដូងទទួលយកស្នេហ៍ក្នុងឆ្នាំ២០១៥នេះ។
ឆ្លើយឆ្លងជាមួយគេហទំព័រ “ថ្មីៗ” តាមទូរស័ព្ទ កាលពីពេលថ្មីៗនេះ កញ្ញា ម៉ានីកា បាននិយាយដោយប្រយោគបដិសេធន៍ថា នាងមិនមានទំនាក់ទំនងស្នេហាជាមួយបុរសណាម្នាក់ឡើយ។ នាងអះអាងថា “មានឯណាអត់មានទេបង(សើច) ប្រហែលជាគេយល់ច្រឡំហើយមើលទៅ..!ព្រោះមកដល់ឥឡូនេះ ខ្ញុំពុំទាន់សម្លឹងឃើញបុរសណាម្នាក់នៅឡើយទេហើយក៏មិនទាន់ទុកចិត្តចំពោះអ្នកណាម្នាក់ផងហ្នឹង..!” ។
តារាសម្តែង និយមការស្លៀកពាក់បែបសិចស៊ី កញ្ញា ម៉ានីកា បានបន្តនិយាយទៀតថា “ខ្ញុំទទួលស្គាល់ថាពិតជាធ្លាប់ចេញទៅដើរកំសាន្ត និងហូបអីនៅខាងក្រៅ ប៉ុន្តែអ្នកដែលដើរជាមួយទាំងនោះ គឺជាមិត្តភក្តិខ្ញុំប៉ុណ្ណោះ។ ម្យ៉ាងទៀតអ្នកដែលតែងមានការស្និទ្ធស្នាលជាមួយខ្ញុំនោះ ពុំមែនបុរសជាគូស្នេហ៍ ដូចការលើកឡើងទេ តែគាត់ជាអ្នកធ្វើសក់ និងផាត់មុខឲ្យខ្ញុំតើ...!” ។
ជាមួយគ្នានេះ កញ្ញា ម៉ានីកា ក៏បានបញ្ជាប់ថា ចាប់តាំងពីនាងប្រកាសជាជំហរ បើកបេះដូងទទួលស្នេហ៍នោះមក រហូតមកទល់នឹងពេលនេះ គឺនាងមិនទាន់សម្លឹងឃើញបុរសណាម្នាក់នៅឡើយទេ ។ នីកា បានបន្ថែមថា បើនិយាយឱ្យចំទៅ គឺមានអ្នកសារភាពសុំស្រឡាញ់ ទាំងអ្នករស់នៅក្នុងស្រុក និងក្រៅស្រុក ប៉ុន្តែអត់ទាន់មាននិស្ស័យ និងហាក់ពុំទាន់មានទំនុកចិត្តទៅលើបុរសណាម្នាក់ឡើយ។
តារាសម្តែង កញ្ញា ម៉ានីកា មានឈ្មោះដើមថា ស័ត សុខវិច្ឆិកា បានចូលប្រឡូកក្នុងវិស័យសិល្បៈ កាលពីឆ្នាំ២០០៤ ។ នាងបានជាប់ការប្រឡងចម្រៀងជាក្រុម ក្នុងកម្មវិធី “តារាមាសតន្ត្រី” របស់ស្ថានីយទូរទស្សន៍ ប៉ុស្តិ៍លេខ។ បច្ចុប្បន្ន នាងចាប់អាជីពជាតារាសម្តែង ម៉ូដែល និងធ្វើជាគ្រូបង្ហាត់ដើរម៉ូដផងដែរ៕
© រក្សាសិទ្ធិដោយ thmeythmey.com