កីឡាជាតិ
ជាតិ
វគ្គជម្រុះ World Cup ប្រចាំតំបន់អាស៊ី៖ ការប្រកួតនៅកម្ពុជា មានអ្នកទស្សនាផ្ទាល់ច្រើនជាងគេ វគ្គជម្រុះជុំទីពីរប្រចាំតំបន់អាស៊ីនៃព្រឹត្តិការណ៍ World Cup មានជំនួបចំនួន៣០ប្រកួតហើយនៅក្នុងពូលទាំង៨ ។ លើកលែងតែជំនួបក្នុងពូល F រវាងថៃ និងវៀតណាម នៅថ្ងៃទី២៤ ខែឧសភា ការប្រកួតភាគច្រើនបើកការប្រកួតនៅថ្ងៃទី១១ ខែមិថុនា នៅជើងទីមួយ និងថ្ងៃទី១៦ ខែមិថុនា នៅជើងទីពីរ។
យោងតាមរបាយការណ៍ដែលផ្សាយដោយសហព័ន្ធកីឡាបាល់ទាត់ទ្វីបអាស៊ី (AFC) ជំនួបរវាងកម្ពុជា និងសឹង្ហបុរី មានទស្សនាផ្ទាល់ច្រើនជាងគេបំផុតដោយមានរហូត ដល់ ៦៣០០០នាក់ បន្ទាប់មកមានជំនួបរវាង ជប៉ុន-សឹង្ហបុរី (៥៧៥៣៣នាក់) កម្ពុជា-អាហ្វហ្គានីស្ថាន (៥៥០០០នាក់) កូរ៉េខាងជើង-អ៊ូបេគីស្ថាន (៤២០០០នាក់) និងថៃ-វៀតណាម (៤០៥០០នាក់)។ ការប្រកួតដែលមានអ្នកទស្សនាផ្ទាល់តិចជាងគេ គឺជំនួបរវាងទីម័រខាងកើត និងអារ៉ាប់រួម អេមេរ៉េត ដែលមានចំនួនតែ២០០នាក់។ ឡាវទទួលភ្ញៀវមីយ៉ាន់ម៉ារ មានអ្នកទស្សនាផ្ទាល់តែ១៥០០នាក់ប៉ុណ្ណោះ។
ពូល A
ម៉ាឡេស៊ី ធ្វើជាម្ចាស់ផ្ទះពីរប្រកួតជាប់គ្នានៅកីឡដ្ឋាន Bukit Jalit National Stadium ក្នុងក្រុងគូឡាឡាំពូរ ដោយមានអ្នកទស្សនា ៥០០០នាក់នាជំនួបស្មើ ១-១ ជាមួយទីម័រខាងកើត និង៣០០០នាក់ ខណៈម៉ាឡេស៊ីចាញ់ប៉ាឡេស្ទីន ៦-០ ។
អារ៉ាប៊ីសាអូឌីត ទទួលបានអ្នកគាំទ្រ៤៨០០នាក់ នាជ័យជម្នះ ៣-២ លើប៉ាឡេស្ទីន នៅកីឡដ្ឋាន Prince Mohamed bin Fahd Stadium ក្នុងក្រុង Dammam ខណៈជំនួបរវាងទីម័រខាងកើត និងអារ៉ាប៊ីសាអូឌីត នៅកីឡដ្ឋាន Shah Alam Stadium ប្រទេសម៉ាឡេស៊ី ដែលជាទឹកដីកណ្តាល មានអ្នកចូលរួមទស្សនាតែ២០០នាក់ប៉ុណ្ណោះ។
ពូល B
បង់ក្លាដែសបើកកីឡដ្ឋាន Bangabandhu National Stadium នៅក្នុងទីក្រុងដាកា ដោយមានអ្នកគាំទ្រ ១០០០០នាក់នាបរាជ័យ ៣-១ ក្នុងជំនួបជាមួយគៀកហ្ស៊ីសស្ថាន និង១២០០០នាក់ នាលទ្ធផលស្មើ ១-១ ជាមួយតាជីគីស្ថាន។
អ្នកទស្សនា១៩០០០នាក់ មានវត្តមាននាជំនួបរវាងតាជីគីស្ថាន និងហ្ស៊កដង់ នៅកីឡដ្ឋាន Pamir Stadium ក្រុង Dusbanbe ខណៈក្រុមភ្ញៀវ ហ្ស៊កដង់យកឈ្នះក្នុងលទ្ធផល ៣-១ រីឯជំនួបរវាងម្ចាស់ផ្ទះគៀកហ្ស៊ីសស្ថាន និងអូស្ត្រាលី នៅកីឡដ្ឋាន Spartak Stadium ដែលក្រុមភ្ញៀវយកឈ្នះ ២-១ នោះ មានអ្នកទស្សនា១៨០០០នាក់។
ពូល C
ហុងកុងបានប្រើប្រាស់កីឡដ្ឋាន Mong Kok Stadium របស់ខ្លួនដើម្បីទទួលភ្ញៀវប៊ូតង់ និងម៉ាល់ឌីវ។ នាជ័យជម្នះ ២-០ លើប៊ូតង់ មានអ្នកទស្សនា៦៣២៦នាក់ ខណៈជោគជ័យ ២-០ លើម៉ាល់ឌីវ មានអ្នកគាំទ្រ ៦៣៧០នាក់។
ម៉ាល់ឌីវដែលបានចាញ់កាតា ១-០ នៅកីឡដ្ឋាន National Football Stadium នៅទីក្រុង Malé មានអ្នកទស្សនា៩០០០នាក់ ខណៈប៊ូតង់ទទួលបានអ្នកចូលរួម១០០០០នាក់ នៅកីឡដ្ឋាន Changlimithang Stadium ក្រុង Thimpu ខណៈពួកគេបរាជ័យ ៦-០ ដោយសារក្រុមចិន។
ពូល D
ហ្គាម មានការប្រកួតដ៏រំភើបជាប់ៗគ្នានៅកីឡដ្ឋាន Guam F.A. National Training Center ក្រុង Dededo របស់ខ្លួន។ ពួកគេបានយកឈ្នះតួកមេនីស្ថាន ១-០ ដោយមានអ្នកទស្សនា៣០០០នាក់ និងយកឈ្នះឥណ្ឌា ២-១ ដោយមានអ្នកទស្សនា៣២៧៧ នាក់។
ឥណ្ឌាបានបើកកីឡដ្ឋាន Sree Kanteerava Stadium ក្រុង Bengaluru ខណៈពួកគេរងបរាជ័យ ២-១ ដោយសារអូម៉ង់ ក្រោមក្រសែភ្នែកមនុស្ស១៩៣១២នាក់ ខណៈតួកមេនីស្ថានបញ្ចប់ក្នុងលទ្ធផលស្មើ ១-១ ជាមួយក្រុមភ្ញៀវអ៊ីរ៉ង់ នៅកីឡដ្ឋាន Sport Toplumy Stadium ក្រុង Dasoguz ដោយមានអ្នកចូលរួមទស្សនា ១០០០០នាក់។
ពូល E
ពហុកីឡដ្ឋានជាតិអូឡាំពិកកម្ពុជា អាចចាត់ទុកថា ទទួលបានចំនួនអ្នកចូលរួមជាកំណត់ត្រា ខណៈកម្ពុជាចាញ់សឹង្ហបុរី ៤-០ មានអ្នកចូលរួមរហូតដល់ទៅ៦៣០០០នាក់ ហើយមនុស្ស៥៥០០០នាក់ ទស្សនាផ្ទាល់ ខណៈកម្ពុជាចាញ់អាហ្វហ្គានីស្ថាន ១-០ ។
សម្រាប់ជំនួបកីឡដ្ឋាន Samen Al-Aeme Stadium ក្រុង Mashhad ប្រទេសអ៊ីរ៉ង់ ដែលស៊ីរីយកឈ្នះអាហ្វហ្គានីស្ថាន ៦-០ មានអ្នកទស្សនាផ្ទាល់៧៦៤៧នាក់។ រីឯជំនួបដែលបញ្ចប់លទ្ធផលស្មើ ០-០ រវាងម្ចាស់ផ្ទះជប៉ុន និងសឹង្ហបុរី នៅកីឡដ្ឋាន Saitama Stadium 2002 មានអ្នកចូលរួមប្រមាណ៥៧ ៥៣៣នាក់។
ពូល F
ពូលនេះ ទើបតែមានការប្រកួតពីរលើកប៉ុណ្ណោះ ដោយសហព័ន្ធកីឡាបាល់ទាត់អន្តរជាតិ (FIFA) បានព្យួរក្រុមកីឡាបាល់ទាត់ជម្រើសជាតិឥណ្ឌូនេស៊ី ពីសកម្មភាពប្រកួត ដោយសារតែមានការជ្រៀតជ្រែកពីសំណាក់រដ្ឋាភិបាល។
នៅពេលដែលថៃ បានយកឈ្នះវៀតណាម ១-០ នៅកីឡដ្ឋាន Rajamangala Stadium ក្នុងក្រុងបាងកក មានអ្នកទស្សនា៤០៥០០នាក់ ។ ថៃ បានទទួលជ័យជម្នះជាលើកទីពីរ តាមរយៈជ័យជម្នះ ២-០ លើម្ចាស់ផ្ទះចិន-តៃប៉ិ នៅកីឡដ្ឋាន Taipei Municipal Stadium ដោយមានអ្នកទស្សនា១៨១៦៨នាក់។
ពូល G
កីឡដ្ឋាន New Lao National Stadium ក្នុងក្រុងវៀងចន្ទ័ន៍របស់ឡាវ ទទួលបានអ្នកទស្សនា ១៥០០នាក់ ខណៈក្រុមម្ចាស់ផ្ទះស្មើ ២-២ ជាមួយមីយ៉ាន់ម៉ារ ហើយចំនួនឡើងដល់២៥០០នាក់ ខណៈពួកគេចាញ់លីបង់ ២-០ ។
លីបង់ បានប្រកួតចាញ់គូវែត ១-០ នៅកីឡដ្ឋាន Saida International Stadium ក្រុង Sidon របស់ខ្លួន ក្រោមក្រសែភ្នែកមនុស្ស១៥២១៥នាក់ ខណៈមនុស្ស១០៩០ បានទស្សនាការប្រកួតរវាងកូរ៉េខាងត្បូង និងមីយ៉ាន់ម៉ារនៅកីឡដ្ឋាន Rajamangala Stadium របស់ថៃដែលជាទឹកដីកណ្តាល។ កូរ៉េខាងត្បូងឈ្នះក្នុងលទ្ធផល ២-០ ។
ពូល H
យ៉េមែន បានប្រើប្រាស់កីឡដ្ឋាន Suheim Bin Hamad Stadium ក្រុងដូហា ប្រទេសកាតា សម្រាប់ការប្រកួតពីរលើកដំបូងរបស់ខ្លួន។ មនុស្ស៣២០០នាក់ចូលទស្សនា ខណៈយ៉េមែនចាញ់កូរ៉េខាងជើង ១-០ ហើយមនុស្សកើនដល់៥២០០នាក់ នៅពេលដែលយ៉េមែនចាញ់ហ្វីលីពីន ២-០ ។
មនុស្ស៦០០០នាក់ បានចូលទស្សនានៅកីឡដ្ឋាន Phippine Sports Stadium នៅពេលដែលម្ចាស់ផ្ទះហ្វីលីពីនយកឈ្នះ បារ៉ែន ២-១ រីឯកីឡដ្ឋាន Kim Il-sung Stadium នៅទីក្រុងព្យុងយ៉ាង មានអ្នកចូលទស្សនា៤២០០០នាក់ នៅពេលដែលកូរ៉េខាងជើងបំបាក់ភ្ញៀវអ៊ូបេគីស្ថាន ៤-២ ៕
© រក្សាសិទ្ធិដោយ thmeythmey.com