អន្តរជាតិ
នយោបាយអន្តរជាតិ
រុស្ស៊ីនិងអាមេរិកកំពុងប្រជែងអាវុធនុយក្លេអ៊ែរដាស់សង្គ្រាមត្រជាក់ត្រលប់វិញ
×
ក្រោយមន្ត្រីយោធាជាន់ខ្ពស់រុស្ស៊ីព្រមានក្រុងវ៉ាស៊ីនតោននិងរដ្ឋអឺរ៉ុបដែលចង់ពង្រាយទ័ព និងអាវុធធុនធ្ងន់រួមទាំងប្រព័ន្ធប្រឆាំងមីស៊ីលនៅអឺរ៉ុបខាងកើតនិងបាល់ទិក ប្រធានាធិបតីរុស្ស៊ីស្រាប់តែប្រកាសបង្កើនអំណាចយោធាភ្លាម។ រដ្ឋាភិបាលលោក វ្ល៉ាឌីមៀ ពូទីនត្រៀមបញ្ជូលមីស៊ីលបាញ់ឆ្លងទ្វីបដែលបំពាក់ក្បាលគ្រាប់នុយក្លេអ៊ែរបន្ថែមក្នុងវិស័យការពារ និងបំពាក់អាវុធទំនើបដល់កងទ័ពរុស្ស៊ីឲ្យបាន៧០ភាគរយត្រឹមឆ្នាំ ២០២។ ម្យ៉ាង ទ័ពជើងទឹករុស្ស៊ីនឹងទទួលបាននាវាមុជទឹកបំពាក់កាំជ្រួចនុយក្លេអ៊ែរត្រឹមចុងឆ្នាំនេះថែមទៀត។យុទ្ធសាស្ត្រនេះអាចធានាថា វិស័យការពារជាតិរុស្ស៊ីរឹងមាំគ្មានសត្រូវយកឈ្នះបាន ប៉ុន្តែវាក៏គ្រោះថ្នាក់ដែរ។ ណាតូ និងអាមេរិកព្រួតគ្នារិះគន់ផែនការ លោក ពូទីន មិនសំចៃមាត់ ដែលហ៊ានប្រើយុទ្ធសាស្ត្រយោធាដ៏គ្រោះថ្នាក់ យកអាវុធនុយក្លេអ៊ែរគំរាមកំហែងពិភពលោក។ ការប្រើកាំជ្រួចនុយក្លេអ៊ែរនិងបំពាក់អាវុធយុទ្ធភណ្ឌបន្ថែមរបស់រុស្ស៊ីដើម្បីឆ្លើយតប កម្លាំងណាតូនិងអាមេរិក បង្ហាញថាពិភពលោកកំពុងបន្តធ្លាក់បន្តិចម្តងៗក្នុងការប្រណាំងប្រជែងសព្វាវុធនិងសង្គ្រាមត្រជាក់ជំនាន់ថ្មី ។
សូមស្តាប់ការបកស្រាយរបស់លោក សៅ ផលនិស្ស័យ៖
សញ្ញានៃការប្រណាំងប្រជែងអាវុធនុយក្លេអ៊ែរកើនឡើងកាន់តែខ្លាំង បន្ទាប់ពីប្រមុខរដ្ឋរុស្ស៊ីប្រកាសបញ្ចូលបន្ថែមកាំជ្រួចឆ្លងទ្វីបបំពាក់ក្បាលគ្រាប់នុយក្លេអ៊ែរ៤០ដើមក្នុងវិស័យការពារជាតិរុស្ស៊ីនិងធ្វើទំនើបកម្មយោធារុស្ស៊ីឲ្យខ្លាំងបំផុតដោយបំពាក់អាវុធទំនើបឲ្យបាន៧០ភាគរយត្រឹមឆ្នាំ ២០២០ ។ ជាសញ្ញាគ្រោះថ្នាក់ ពេលដែលរុស្ស៊ីចាប់ផ្តើមជ្រើសយកអាវុធប្រល័យលោកមកតបតជាមួយក្រុមប្រទេសលោកខាងលិចដែលបន្តចងកម្មចងពៀររុស្ស៊ីដោយយកបញ្ហាអ៊ុយក្រែនជាលេសបង្កជម្លោះ។រដ្ឋបាល់ទិកកំពុងពិភាក្សាជាសម្ងាត់ជាមួយមន្ត្រីក្រុងវ៉ាស៊ីនតោនជុំវិញការពង្រាយទ័ពនិងអាវុធ ប៉ុន្តែជោគជ័យឬអត់មិនទាន់នោះមិនទាន់ត្រូវគេទម្លាយឲ្យដឹងឡើយ។ ជាការពិតបញ្ហាអ៊ុយក្រែនត្រូវលោកខាងលិចប្រើប្រាស់ជាឈ្នាន់ ដើម្បីពង្រាយទ័ព អាវុធគ្រប់ធុន និង ពង្រីកអំណាចយោធាអាមេរិកជាន់ពន្លិចរុស្ស៊ី។ បច្ចុប្បន្ននេះ បញ្ហាជម្លោះប្រដាប់អាវុធនៅភាគខាងកើតអ៊ុយក្រែនត្រូវលោកខាងលិចទុកមួយឡែក ដោយឆ្លៀតពង្រឹងកម្លាំងយោធាជុំវិញរុស្ស៊ីសិន។ អំណាចកិច្ចព្រមព្រៀងសន្តិភាពក្រុង Minsk ដែលចូលជាធរមានពាក់កណ្តាលខែកុម្ភៈខ្សោយទៅៗ រៀបដាច់ខ្យល់ ខណៈក្តីសង្ឃឹមរបស់ជនស៊ីវិលអ៊ុយក្រែនថានឹងបានសន្តិភាពក៏ជិតរលាយអស់ដែរ។
១. បង្កើនចំនួនអាវុធនុយក្លេអ៊ែររុស្ស៊ី ជាការព្រមានអាមេរិកឲ្យបោះបង់ហិច្ឆតាពង្រីងអំណាចយោធានៅអឺរ៉ុប
យោងតាមសម្តីរបស់ប្រធានាធិបតីរុស្ស៊ីម្សិលមិញក្នុងពិព័រណ៌បច្ចេកទេសយោធាអន្តរជាតិនៅក្នុងទីក្រុងម៉ូស្គូ ជុំវិញការបំពាក់អាវុធនុយក្លេអ៊ែរកងទ័ព ល្មមខ្លាំងគ្រាន់បើអាចឲ្យលោកខាងលិចស្តាប់លឺនិងធ្វើឲ្យរដ្ឋខ្លះភ័យស្លន់ស្លោផងក៏មិនដឹង។ សារប្រធានាធិបតី វ្ល៉ាឌីមៀ ពូទីន ផ្ញើរទៅ លោកខាងលិច នឹងបង្ខំឲ្យអាមេរិកពិចារណាជាថ្មីលើផែនការយោធាដ៏គ្រោះថ្នាក់ដោយពង្រាយទ័ពផងនិងអាវុធគ្រប់ធុនផងដូចត្រៀមធ្វើសង្គ្រាមតាមព្រំដែនរុស្ស៊ី។ យុទ្ធសាស្ត្រយោធារបស់លោកពូទីន នឹងបន្ថែមកាំជ្រួចនុយក្លេអ៊ែរសម្រាប់បាញ់ឆ្លងទ្វីបក្នុងវិស័យការពារជាតិ កងទ័ពរុស្ស៊ីនឹងទទួលបានអាវុធទំនើបថ្មីៗត្រឹមឆ្នាំ ២០២០ ហើយដាក់ឲ្យដំណើរការនាវាមុជទឹកបំពាក់កាំជ្រួចនុយក្លេអ៊ែរត្រឹមចុងឆ្នាំនេះផង។ មហិច្ឆតារបស់លោក ពូទីន គឺពង្រឹងអំណាចយោធារុស្ស៊ីឲ្យខ្លាំងតាមដែលអាចធ្វើបាន ដោយមិនបណ្តែតបណ្តោយឲ្យអាមេរិកនិងរដ្ឋណាតូដាក់ពង្រាយអាវុធតាមព្រំដែនខ្លួនតាមចិត្តទេ។
អ្វីដែលធ្វើឲ្យរុស្ស៊ីមិនស្រួលចិត្តខ្លាំងនោះ គឺការប៉ងតំឡើងប្រព័ន្ធប្រឆាំងមីស៊ីលរបស់ណាតូ ដែលវាជាសញ្ញាគ្រោះថ្នាក់មួយសម្រាប់សន្តិសុខរុស្ស៊ី។ រុស្ស៊ីក្រោមការដឹកនាំរបស់លោក ពូទីន បានបង្កើនថវិកាយោធា និងធ្វើទំនើបកម្មវិស័យការពារជាតិយ៉ាងសកម្មជាយូរមកហើយ ប៉ុន្តែលោកខាងលិចប្រហែលជាវាយតម្លៃខុសដោយចាត់ទុករុស្ស៊ីត្រឹមខ្លាក្រដាស និងមិននឹកស្មានថារុស្ស៊ីមិនអាចជ្រើសយកអាវុធប្រល័យលោកមកប្រើប្រាស់ទុកសងសឹកខ្លួនពេលនេះទេ។ ទោះជារដ្ឋបាល់ទិកមួយចំនួនបន្តទទូចសុំអាមេរិកឲ្យតំឡើងអាវុធក៏ដោយចុះ ក្រុងវ៉ាស៊ីនតោនប្រហែលជាចាំបាច់ត្រូវចៀសផ្លូវគ្រោះថ្នាក់ដែលរុញច្រានរុស្ស៊ីឲ្យទាល់ច្រក។
គេមិនអាចប្រកែកបានឡើយដែលថា រុស្ស៊ីជាមហាអំណាចមិនមែនរដ្ឋតូចតាចឡើយ។ បើយោងតាមសារព័ត៌មានអង់គ្លេស BBC រុស្ស៊ីបច្ចុប្បន្នមានមានក្បាលគ្រាប់នុយក្លេអ៊ែរប្រហែល៤៥០០គ្រាប់ រួមបញ្ជូនទាំងក្បាលគ្រាប់យុទ្ធសាស្ត្របំពាក់លើកាំជ្រួចរយៈចម្ងាយវែងឬឆ្ងាយ គ្រប់ធុន។
២. ពិភពលោកគេចមិនរួចពីគ្រោះថ្នាក់បើមហាអំណាចមិនចោលផ្នត់គំនិតប្រណាំងប្រជែងអាវុធនុយក្លេអ៊ែរ ?
មកទល់ពេលនេះការសម្រេចចុងក្រោយថានឹងដាក់ទ័ព តំឡើងអាវុធធុនធ្ងន់តាមបន្ទាត់ព្រំដែនរុស្ស៊ី មិនទាន់ចេញជាផ្លូវការទេ ប៉ុន្តែបក្សសម្ព័ន្ធយោធាណាតូនិងអាមេរិក បានព្រួតគ្នាថ្កោលទោសផែនការពង្រឹងអំណាចយោធាដោយយកអាវុធនុយក្លេអ៊ែរជាល្បែងរបស់រុស្ស៊ី។ ប្រមុខណាតូលោក Jens Stoltenberg បានថ្កោលទោសលោកពូទីន ដោយចោទថា ពូទីនព្យាយាមទាញពិភពលោកឲ្យធ្លាក់ចូលក្នុងគ្រោះថ្នាក់។ចំណែកប្រមុខការទូតអាមេរិក ចន ឃឺរី ថារុស្ស៊ីកំពុងដើរត្រលប់ក្រោយ ដោយនាំពិភពលោកឲ្យធ្លាក់ចូលក្នុសង្គ្រាមត្រជាក់ជាថ្មី។ ប៉ុន្តែ ជារឿងអាម៉ាសបន្តិចដែរ ដែលលោកមិនទទួលស្គាល់ថា ដើមហេតុដែលជំរុញឲ្យរុស្ស៊ីធ្វើបែបនេះ ដោយសារមហិច្ឆតាពង្រីកអំណាចយោធាអាមេរិកនៅអឺរ៉ុបឡើយ។
បើសិនជាអាមេរិកមិនអនុវត្តផែនការពង្រាយអាវុធធុនធ្ងន់ទៅអឺរ៉ុបខាងកើតវាជារឿងល្អ ប៉ុន្តែបើអាមេរិកចិត្តសឿងមិនបញ្ឈប់ ភាគីពាក់ព័ន្ធគេចមិនផុតពីទាញអាវុធមកគំរាមគ្នាទៅវិញទៅមកឡើយ។បើផ្អែកតាមប្រវត្តិសាស្ត្រដើម្បីរក្សាតុល្យភាពនិងរក្សាស្ថិរភាពក្នុងពេលប្រទាញប្រទង់គ្នាដោយនុយក្លេអ៊ែរ បក្សសម្ព័ន្ធយោធាណាតូប្រហែលជានឹងជ្រើសរើសយកការពង្រាយកាំជ្រួចនុយក្លេអ៊ែរនៅបណ្តារដ្ឋកៀកជាប់រុស្ស៊ីវិញខាងមុខផង។ វាមិនខុសគ្នាពីពេលដែលប្រធានធិបតីអាមេរិក ចន កេណ្ណឺឌី បញ្ជាឲ្យពង្រាយនុយក្លអ៊ែរនៅតួកគី និងរដ្ឋអឺរ៉ុបនៅក្បែរសហភាពសូវៀតកាលពីជាង៥ទសវត្សមុន ដើម្បីតបតការលួចតំឡើងកាំជ្រួចនុយក្លេអ៊ែរសហភាពសូវៀតនៅគុយបាឡើយ។
ជាការពិតដែលផ្នត់គំនិតប្រជែងអាវុធនុយក្លេអ៊ែរដ៏គ្រោះថ្នាក់នេះ នៅដក់ជាប់ក្នុងខួរក្បាលមេដឹកនាំមហាអំណាចទាំងនោះប៉ុន្តែពិភពលោកមួយនេះមិនអាចខ្ទេចដោយសារមហិច្ឆតាមហាអំណាចពីរបីនេះឡើយ។ ជាធម្មតាអាវុធនុយក្លេអ៊ែរជាអាវុធយុទ្ធសាស្ត្រកម្រិតខ្ពស់និងគ្រោះថ្នាក់បំផុតនេះ គេត្រឹមយកមកប្រើដើម្បីគំរាមគ្នាទៅវិញទៅមកជាជាងយកមកធ្វើសង្គ្រាម៕
© រក្សាសិទ្ធិដោយ thmeythmey.com