កីឡាជាតិ
ជាតិ
ទង្វើដែលអ្នកទស្សនាការប្រកួតកីឡាបាល់ទាត់មិនគួរធ្វើ
× គណៈកម្មាធិការប្រតិបត្តិរបស់សហព័ន្ធកីឡាបាល់ទាត់អន្តរជាតិ (FIFA) កាលពីថ្ងៃទី៣០ ខែឧសភា ឆ្នាំ២០១១ បានអនុម័តសារជាថ្មីនូវ «ក្រមវិន័យ» (FIFA Disciplinary Code) ដើម្បីឲ្យ សហព័ន្ធកីឡាបាល់ទាត់ សមាជិករបស់សហព័ន្ធ ជាពិសេសក្លិបបាល់ទាត់ មន្ត្រី កីឡាករ មន្ត្រីរៀបចំការប្រកួត ភ្នាក់ងារកីឡាករ បុគ្គលដែលមានការទទួលស្គាល់ពី FIFA រួមទាំងក្រុមអ្នកទស្សនា អនុវត្តតាម។
ក្រុមវិន័យហ្វីហ្វា ដែលបានចូលជាធរមានកាលពីថ្ងៃទី១ ខែសីហា ឆ្នាំ២០១១ និងត្រូវបានចុះហត្ថលេខា ដោយលោក Joseph S.Blatter ប្រធាន FIFA និងលោក Jerome Valcke ដែលជាអគ្គលេខាធិការ នោះ មាន១៤៧មាត្រា។
នៅត្រង់ ជំពូក II ផ្នែកពិសេស (Chapter II. Special Part) មាត្រា៦៧ ចែងអំពីទំនួលខុសត្រូវលើការប្រព្រឹត្តរបស់អ្នកទស្សនា (Liability for spectator conduct) ដោយវាក្យខណ្ឌ៣ លើកឡើងពីចំណុចនៃការប្រព្រឹត្តមិនត្រូវរបស់អ្នកទស្សនា ដែលទង្វើទាំងនោះ រួមមាន អំពើហិង្សាទៅលើមនុស្ស ឬវត្ថុនានា ការបង្កឲ្យមានគ្រោះអគ្គិភ័យ ការគប់កាំជ្រួច ការបង្ហាញពាក្យស្លោកក្នុងន័យជេប្រមាថ ឬក្នុងន័យនយោបាយនូវរាល់ទម្រង់ ការបន្លឺសម្តី ឬសំឡេងជេប្រមាថ ឬការលុកលុយលើទីលានជាដើម។
រាល់ទង្វើទាំងឡាយណាដែលធ្វើខុសពីក្រមវិន័យហ្វីហ្វា បុគ្គលដែលប្រព្រឹត្តកំហុសអាចទទួលរងពិន័យជាទឹកប្រាក់ រងការហាមមិនឲ្យចូលមើលការប្រកួត ឬអាចជាប់ពន្ធនាគារក្នុងករណីធ្ងន់ធ្ងរ។ ក្នុងករណីខ្លះ សាម៉ីប្រទេស ឬក្លិប ត្រូវទទួលខុសត្រូវលើទង្វើរបស់អ្នកទស្សនា ឬក្រុមអ្នកគាំទ្ររបស់ខ្លួន។
សូមបញ្ជាក់កាលពីថ្ងៃទី១៦ ខែមិថុនា កន្លងមក ក្លិប Al-Hilal របស់អារ៉ាប៊ីសាអូឌីត ត្រូវបានសហព័ន្ធកីឡាបាល់ទាត់ទ្វីបអាស៊ី (AFC) ពិន័យឲ្យលេងក្នុងទឹកដីរបស់ខ្លួនដោយគ្មានអ្នកទស្សនា សម្រាប់ការប្រកួតវគ្គ១/៤ផ្តាច់ព្រ័ត្រក្របខណ្ឌ AFC Champions League។ ការពិន័យបានលេចចេញជារូបរាងឡើងដោយសារតែក្រុមអ្នកគាំទ្របានគប់របស់របរទៅលើក្រុម Persepolis របស់អ៊ីរ៉ង់ នាជ័យជម្នះ ៣-០ នៅវគ្គ១៦ក្រុមចុងក្រោយ៕
© រក្សាសិទ្ធិដោយ thmeythmey.com