ជាតិ
សង្គមជាតិ
ស្ត្រីឥស្លាមមួយចំនួនមិនប្រើអត្តសញ្ញាណប័ណ្ណនិងលិខិតឆ្លងដែនដោយសាររឿងថតរូប
× មានស្ត្រីខ្មែរឥស្លាមមួយចំនួន បានសម្រេចចិត្តមិនប្រើប្រាស់អត្តសញ្ញាណប័ណ្ណ និងលិខិតឆ្លងដែន។ មូលហេតុដោយសារ ការធ្វើអត្តសញ្ញាណប័ណ្ណ និងលិខិតឆ្លងដែននោះ គឺតម្រូវឲ្យដោះក្រមាដែលផ្ទុយពីការគោរពប្រតិបត្តិតាមសាសនាឥស្លាម។ ដូច្នេះហើយ ទើបគេឃើញមានស្ត្រីខ្មែរឥស្លាមមួយចំនួន មិនបានបំពេញកាតព្វកិច្ចសង្គមដូចជាការបោះឆ្នោតជាដើម ដោយសារគ្មានអត្តសញ្ញាណប័ណ្ណ ឫប័ណ្ណសម្គាល់ខ្លួនជាដើមនោះ។
រដ្ឋាភិបាលកម្ពុជា តាមរយៈសារាចរណ៍របស់ខ្លួនបានសម្រេចឲ្យស្ត្រីឥស្លាមដែលរស់នៅក្នុងប្រទេសកម្ពុជាទាំងអស់ អាចស្លៀកសំលៀកបំពាក់តាមប្រពៃណីរបស់សាសនាឥស្លាម នៅក្នុងគ្រឹះស្ថានអប់រំបាន។ ការសម្រេចនេះ ធ្វើឲ្យមានការសាទរ និងកោតសរសើរ មិនត្រឹមតែសហគមន៍ខ្មែរឥស្លាម តែរង្គើដល់អន្តរជាតិផង ថារដ្ឋាភិបាលកម្ពុជា ពិតជាបានយកចិត្តទុកដាក់ចំពោះសហគមន៍ឥស្លាមនៅកម្ពុជាពិតប្រាកដមែន។ ប៉ុន្តែទន្ទឹមនឹងនេះ គេនៅឃើញចំណុចអវិជ្ជមានមួយទៀត ដែលរដ្ឋាភិបាលមិនទាន់ផ្តល់ឲ្យសហគមន៍ឥស្លាម ទៅតាមអ្វីដែលពួកគេអាចគោរពប្រតិបត្តិតាមសាសនាបាន នោះគឺការតម្រូវឲ្យដោះក្រមា ឫកន្សែងក្បាលនៅពេលថតរូបធ្វើអត្តសញ្ញាណប័ណ្ណ និងលិខិតឆ្លងដែនជាដើម។
មានការលើកឡើងថា ស្ត្រីខ្មែរឥស្លាមមួយចំនួន បានបោះបង់ការងារសង្គមជាច្រើន ដោយសារគ្មានប័ណ្ណសម្គាល់ខ្លួន ដូចជាមិនអាចបោះឆ្នោត និងធ្វើលិខិតស្នាមផ្សេងៗជាដើម។ មិនមែនជាចេតនានោះទេ តែដោយសារលក្ខខ័ណ្ឌនៃការធ្វើលិខិតសម្គាល់ខ្លួននោះ គឺខុសពីសាសនា ដែលពួកគេគោរពយ៉ាងតឹងរឹង។ តាមសាសនា ស្ត្រីឥស្លាមមិនតម្រូវឲ្យដោះក្រមា ឫកន្សែងរ៊ុំក្បាលជាសាធារណនោះទេ គឺបានក្នុងរង្វង់គ្រួសារពួកគេតែប៉ុណ្ណោះ។
លោក ហ៊ីម ខទៀត បានលើកឡើងថា វាជាការល្អបំផុត ប្រសិនបើរដ្ឋាភិបាលបើកសិទ្ធិឲ្យស្ត្រីឥស្លាម អាចពាក់ក្រមានៅពេលថតរូបធ្វើអត្តសញ្ញាណប័ណ្ណ ឫលិខិតឆ្លងដែននោះ។ សមាជិកគណៈកម្មការដឹកនាំក្រុមនិស្សិតមូស្លឹមកម្ពុជា លោក ខទៀត បន្ថែមថា កន្លងមកក្រុមរបស់លោក មើលឃើញពីចំណុចអវិជ្ជមានខាងលើ និងបានស្តាប់ការត្អូញត្អែរជាច្រើនពីសហគមន៍ឥស្លាម។ លោកបញ្ជាក់ថា៖« វាជាប្រការមួយដែលចាំបាច់ ដែលព្រះអាល់ឡោះមានបន្ទូលក្នុងគម្ពីរអាល់គួរអាន (គម្ពីររបស់សាសនាឥស្លាម) ដែលសាសនិកឥស្លាមទូទាំងពិភពលោកអនុវត្តតាម។ ខ្ញុំជឿថា រដ្ឋាភិបាលកម្ពុជាអាចអនុញ្ញាតបានដូចប្រទេសផ្សេងទៀតដែរ ដូចជាប្រទេសថៃ អាមេរិក ឫអូស្ត្រាលីជាដើមនោះ។ នេះយើងមិននិយាយប្រទេសដែលកាន់សាសនាឥស្លាម ដូចជាម៉ាឡេស៊ី ឫឥណ្ឌូនេស៊ីនោះទេ»។
លោក ហ៊ីម ខទៀត រំពឹងថា ប្រមុខរដ្ឋាភិបាលកម្ពុជានឹងលើកមកនិយាយ ឫសម្រេចតែម្តងពីបញ្ហាខាងលើ នៅថ្ងៃចូលរួមពិសាអាហារស្រាយបួសជាថ្នាក់ជាតិនៅពេលខាងមុខ ដែលរដ្ឋាភិបាលកម្ពុជា រៀបចំឡើងសម្រាប់សហគមន៍ខ្មែរឥស្លាម ក្នុងគោលបំណងផ្សារភ្ជាប់ភាពសិទ្ធិស្នាលនឹងគ្នា ក៏ដូចជាបង្ហាញពីការយកចិត្តទុកចំពោះសហគមន៍ខ្មែរឥស្លាមនៅកម្ពុជា។ លោក ខទៀត បានរម្លឹកពីភាពជោគជ័យ ដែលរដ្ឋាភិបាលបានអនុញ្ញាតឲ្យស្ត្រីឥស្លាមអាចស្លៀកពាក់នៅក្នុងគ្រឹះស្ថានអប់រំកាលពីកន្លងទៅថា៖« យើងឃើញថា មានស្ត្រីឥស្លាមច្រើន បានបន្តការសិក្សានៅថ្នាក់ឧត្តមសិក្សា ធ្វើការនៅតាមស្ថាប័នច្រើន។ ចំពោះការធ្វើអត្តសញ្ញាណប័ណ្ណ នេះគឺដូចគ្នា គឺបង្កការរាំងស្ទះជាច្រើន។ យើងមិនមានតួលេខពិតប្រាកដ តែយើងដឹងថា មានស្ត្រីខ្មែរឥស្លាមមួយចំនួន សម្រេចចិត្តមិនធ្វើអត្តសញ្ញាណប័ណ្ណ លិខិតឆ្លងដែន ឫប័ណ្ណសម្គាល់ផ្សេងទៀត ដើម្បីបម្រើផលប្រយោជន៍សង្គមបាន»។
លោក ខទៀត បន្ថែម៖« រដ្ឋាភិបាលគួរបញ្ជាក់ពីជំហរច្បាស់លាស់នូវអ្វីដែលគាត់អះអាងថា ផ្តល់សិទ្ធិពេញលេញដល់សហគមន៍ឥស្លាម។ រដ្ឋាភិបាលថា ស្រលាញ់ ការពារខ្មែរឥស្លាមជាងប្រទេសថៃ តែដោយឡែកប្រទេសថៃ គេមានការបើកទូលាយជាងយើងច្រើន។ យើងមិនបន្ទោសរដ្ឋាភិបាលទេ តែដោយសារថ្នាក់ដឹកនាំឥស្លាមយើងមិនទាន់ជម្រាបដល់រដ្ឋាភិបាលឲ្យបានដឹងពីបញ្ហានេះ។ ពិតប្រាកដបញ្ហានេះ គឺមានឥទ្ធិពល និងផលវិជ្ជមានច្រើនដល់រដ្ឋាភិបាល»។
ទាក់ទងនឹងបញ្ហានេះ លោកស្រី ម៉ាត់ ម៉ារ៉ា រដ្ឋលេខាធិការក្រសួងអភិវឌ្ឍន៍ជនបទ យល់ថា ការទាមទារអ្វីមួយត្រូវមានមូលដ្ឋាន និងការសិក្សាឲ្យបានត្រឹមត្រូវ។ លោកស្រី ម៉ារ៉ា ដែលសកម្មក្នុងការងារមនុស្សធម៌ និងអប់រំ ក្នុងសហគមន៍ខ្មែរឥស្លាមមួយរូបនោះ បានពន្យល់ថា៖« មានការលើកឡើងថា យើងចាំបាច់ត្រូវធ្វើ តែខ្លះទៀតថា យើងរស់នៅស្រុកណា ត្រូវគោរពតាមស្រុកហ្នឹង»។ តែយ៉ាងណា លោកស្រី ម៉ាត់ ម៉ារ៉ា ចង់ឃើញពីលទ្ធភាពរដ្ឋាភិបាលចំពោះការទាមទារឲ្យមានការពាក់ក្រមានៅពេលធ្វើលិខិតស្នាមផ្សេងៗ ដែលលោកស្រីអះអាងថា វាជារឿងសំខាន់មួយ។
កន្លងមកថ្នាក់ដឹកនាំខ្មែរឥស្លាមមួយចំនួន បានលើកសំណើរខាងដើមទៅរដ្ឋាភិបាលរួចម្តងហើយ។ ជាការឆ្លើយតប ប្រមុខរដ្ឋាភិបាលកម្ពុជា បានប្រគល់ឲ្យក្រុមជំនាញមួយ ដើម្បីសិក្សាពីលទ្ធភាពដែលរដ្ឋាភិបាលអាចធ្វើបាន។ បញ្ហានេះ លោក ខទៀត យល់ថា គួរត្រូវបានដោះស្រាយជាបន្ទាន់ ដើម្បីឲ្យស័ក្កសមចំពោះពាក្យសំដីដែលគាត់ថា ធ្វើឲ្យសហគមន៍ខ្មែរឥស្លាមរស់នៅដោយភាពសុខស្រួល។ លោក ខទៀត បន្ថែម៖« វាមិនមែនជារឿងតូចតាចទេ តែវាប៉ះពាល់ផ្លូវចិត្តដល់ស្ត្រីឥស្លាមផង ដែលពេលខ្លះពួកគាត់ត្រូវបង្ខំចិត្តដោះក្រមា ហើយដែលការងារទាំងនោះ គាត់បានអនុវត្តតាំងពីតូចៗមក»៕
© រក្សាសិទ្ធិដោយ thmeythmey.com