កីឡាជាតិ
ជាតិ
ខ្សែបម្រើខ្មែរ-បារាំង គួច ដានី ចូលរួមជាមួយភ្នំពេញក្រោនសារជាថ្មី ខ្សែបម្រើ គួច ដានី និងលោកគ្រូបង្វឹកភ្នំពេញក្រោន Sam Schweingruber នាពិធីចុះហត្ថលេខា។ រូបថត ហ្វេសប៊ុកក្លិបភ្នំពេញក្រោន
× ក្លិបកីឡាបាល់ទាត់ភ្នំពេញក្រោន តាមរយៈទំព័រហ្វេសប៊ុកផ្លូវការរបស់ខ្លួន បានប្រកាសពីកិច្ចព្រមព្រៀងនាំយកខ្សែបម្រើខ្មែរ-បារាំង គួច ដានី មកចូលរួមជាមួយខ្លួនសារជាថ្មី នៅមុនការបើករដូវកាលថ្មីនៃក្របខណ្ឌមិត្តហ្វូនខេមបូឌានលីក។
គួច ដានី អាយុ២៤ឆ្នាំ បានចូលលេងឲ្យក្លិបភ្នំពេញក្រោនកាលពីចុងឆ្នាំ២០១២ ហើយបានចាកចេញពីក្លិបកំពូលមួយនេះ កាលពីខែមិនា ឆ្នាំ២០១៣ មុននឹងទៅលេងឲ្យក្លិបបៀលប្រាយយូណាយធីត និងជាកីឡាកររបស់ក្លិប Phnom Penh TriAsia ពេញមួយរដូវកាលឆ្នាំ២០១៤ ។
កាលពីឆ្នាំមុន គួច ដានី ក៏ជាសមាជិកនៃក្លិបហ្វុតសាល Daniel FC ដែលតំណាងឲ្យកម្ពុជាក្នុងព្រឹត្តិការណ៍ Tiger Street Football ផងដែរ។ ក្រោយការប្រកួតជាមួយក្រុមពីម៉ុងហ្គោលី និងសឹង្ហបុរី ដានី បានជាប់ក្នុងជម្រើស All-Stars Team។
ក្លិបភ្នំពេញក្រោនបានដកស្រង់សម្តីរបស់លោក Sam Schweingruber ដែលជាគ្រូបង្វឹកថា ដានីជាកីឡាករដែលមានជំនាញខ្ពស់ និងមានភាពចាស់ទុំ ហើយគេនឹងក្លាយជាកម្លាំងដ៏សំខាន់ដែលនាំឲ្យភ្នំពេញក្រោនការពារពានរបស់ខ្លួនបានជោគជ័យ។
គួច ដានី បាននិយាយថា ខ្លួនមានការរំភើបដែលបានចូលរួមជាមួយក្លិបចាស់ និងដែលទើបសម្ពោធកីឡដ្ឋានថ្មី។ «ខ្ញុំជឿថា យើងអាចឈ្នះជើងឯកម្តងទៀត។ ខ្ញុំចង់ជួយក្លិបឲ្យឈ្នះការប្រកួតតាមដែលអាចធ្វើទៅបាន ដើម្បីរក្សាដំណែងជើងឯង និងមានឈ្មោះលេងក្នុងព្រឹត្តិការណ៍អន្តរជាតិ។ នេះជាក្លិបលេងមួយនៅក្នុងព្រះរាជាណាចក្រកម្ពុជា»។ នេះជាការលើកឡើងរបស់កីឡាករខ្មែរ-បារាំង ដានី៕
© រក្សាសិទ្ធិដោយ thmeythmey.com