ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
កីឡាជាតិ
ជាតិ
NOCC៖ លទ្ធផលមិនបានសម្រេចតាមមហិច្ចតា តែជាជោគជ័យ
20, Jun 2015 ,
10:00 am
រូបភាព
លោក វ៉ាត់ ចំរើន នាយបេសកកម្មដឹកនាំប្រតិភូ និងកីឡាករមកកម្ពុជាវិញ។ រូបថត NOCC
×
ដោយ:
អុឹង ចំរើន (Ung Chamroeun)
កម្ពុជាមិនបានសម្រេចតាមមហិច្ឆតារបស់ខ្លួននោះឡើយនៅព្រឹត្តិការណ៍កីឡាស៊ីហ្គេមលើកទី២៨ ក្នុងប្រទេសសឹង្ហបុរីដែលទើបនឹងបញ្ចប់ ដោយដណ្តើមបានតែមេដាយមាស១ ប្រាក់៥ និងសំរឹទ្ធ៩ប៉ុណ្ណោះ ។ លទ្ធផលនេះ បានបង្ហាញថា រដ្ឋាភិបាល និងក្រុមដៃគូឧបត្ថម្ភត្រូវចំណាយប្រាក់ក្នុងខ្ទង់តិចជាងឆ្នាំ២០១៣សម្រាប់ជ័យលាភី ។ ប៉ុន្តែទោះបីជាយ៉ាងណាក៏ដោយ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានអះអាងថា លទ្ធផលមិនអាក្រក់នោះឡើយ ដោយប្រទេសទាំងអស់សុទ្ធតែថយចំនួនមេដាយរបស់ខ្លួន លើកលែងតែម្ចាស់ផ្ទះសឹង្ហបុរី។
នាមហាសន្និបាតរបស់គណៈកម្មាធិការជាតិអូឡាំពិកកម្ពុជា (NOCC) កាលពីចុងខែកុម្ភៈឆ្នាំ២០១៣ ថ្នាក់ដឹកនាំកីឡាកម្ពុជាបានលើកឡើងថា គោលដៅកីឡាស៊ីហ្គេមឆ្នាំ២០១៥ ត្រូវ
រក្សាប្រភេទមេដាយមាសក្នុងចំនួនណាមួយបើប្រៀបធៀបកាលពីឆ្នាំ២០១៣ ហើយរកមេដាយប្រាក់ និងសំរឹទ្ធឲ្យច្រើនតាមលទ្ធភាព។ ប៉ុន្តែមហិច្ចតានេះ មិនបានសម្រេចដូចបំណងឡើយ ដោយក្នុងចំណោមកីឡា២៣ប្រភេទដែលបានចូលរួមប្រកួតប្រជែង កម្ពុជាទទួលបានតែមេដាយមាស១ ប្រាក់៥ និងសំរឹទ្ធ៩ប៉ុណ្ណោះ។
៥ប្រភេទកីឡាក្នុងចំណោម២៣ប្រភេទកីឡាឈ្នះមេដាយ
ក្នុងចំណោមប្រទេសកីឡាចំនួន២៣ មានតែកីឡា៥ប្រភេទប៉ុណ្ណោះដែលដណ្តើមបានមេដាយ ដែលក្នុងនោះ
កីឡាករសីប៉ាកតាក្រឈ្នះមេដាយមាស១ និងសំរឹទ្ធ១ កីឡាប៉េតង់បានមេដាយប្រាក់៤ និងសំរឹទ្ធ៥ កីឡាប្រដាល់បានមេដាយប្រាក់១ កីឡាតេក្វាន់ដូបានមេដាយសំរឹទ្ធ២ និងកីឡាវាយកូនបាល់បានមេដាយសំរឹទ្ធ១ ។
បើគិតលើចំនួនមេដាយឯកត្តជន និងជាក្រុម កម្ពុជាទទួលបានមេដាយមាសចំនួន៨ ប្រាក់៧ និងសំរឹទ្ធ២២ និងមានកីឡាករ-កីឡាការិនីតែ២៥នាក់ប៉ុណ្ណោះដែលត្រូវទទួលបានប្រាក់រង្វាន់ ហើយក្នុងនោះ កីឡាករស៊ីប៉ាកតាក្រ៨នាក់ បានមេដាយមាសផង និងសំរឹទ្ធផង ចំណែកកីឡាប៉េតង់ មានកីឡាករ៣នាក់ និងកីឡាការិនី១នាក់ បានមេដាយចំនួនពីរ។
រដ្ឋត្រូវបានផ្តល់ប្រាក់រង្វាន់ដែលតិចជាងឆ្នាំ២០១៣រហូតដល់៥០ម៉ឺនដុល្លារ
យោងតាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលថ្ងៃទី២៥ ខែវិច្ឆិកា ឆ្នាំ២០១៣ រាល់ជ័យលាភីមេដាយមាសទទួលបានប្រាក់រង្វាន់៤០លានរៀល មេដាយប្រាក់បាន៣០លានរៀល និងមេដាយសំរឹទ្ធបាន១៦លានរៀល ។
កាលពីព្រឹត្តិការណ៍កីឡាស៊ីហ្គេមលើកទី២៧ នៅប្រទេសមីយ៉ាន់ម៉ារ កម្ពុជាដណ្តើមបានមេដាយសរុប៤៧ មានមាស៨ ប្រាក់១១ និងសំរឹទ្ធ២៨ ដោយមានការរួមចំណែកយ៉ាងច្រើនពីកីឡាចំបាប់ និងវ៉ូវីណាម។ ដោយគិតលើចំនួនមេដាយទាំងឯកត្តជន និងជាក្រុម កម្ពុជាទទួលបានមេដាយមាស១៤ ប្រាក់២៩ និងសំរឹទ្ធ៩១ ក្នុងនោះកីឡាករ-កីឡាការិនីចំនួន៧៤នាក់ជាម្ចាស់ជ័យលាភី។ សម្រាប់ប្រាក់រង្វាន់សម្រាប់ជ័យលាភីកាលពីឆ្នាំ២០១៣ រដ្ឋាភិបាលបានផ្តល់ប្រាក់ឧបត្ថម្ភសរុបចំនួន២ ៨៨៦ ០០០ ០០០ (២ពាន់៨រយ៨៦លានរៀល) ពោលគឺជាង៧០ម៉ឺនដុល្លារអាមេរិក។
សម្រាប់ព្រឹត្តិការណ៍កីឡាស៊ីហ្គេមលើកទី២៨នេះ រដ្ឋាភិបាលនឹងចំណាយប្រាក់ឧបត្ថម្ភតែ ៨៨២លានរៀល (ជាង២១ម៉ឺនដុល្លារអាមេរិក) ប៉ុណ្ណោះដល់ជ័យលាភី ដោយតិចជាងឆ្នាំ២០១៣ រហូតដល់ប្រមាណ៥០ម៉ឺនដុល្លារអាមេរិក។
ក្រៅពីកីឡាករដែលទទួលបានជ័យលាភី គ្រូបង្វឹក និងគ្រូជំនួយៗក៏ត្រូវទទួលបានប្រាក់រង្វាន់ពីរដ្ឋាភិបាលផងដែរ។ យោងតាមអនុក្រឹត្យ គ្រូបង្វឹកទទួលបានប្រាក់ឧបត្ថម្ភស្មើនឹងប្រាក់រង្វាន់របស់ជ័យលាភីដែលឈ្នះចំណាត់ថ្នាក់មេដាយខ្ពស់ជាងគេក្នុងវិញ្ញាសាប្រកួតក្នុងក្រុមដែលខ្លួនទទួលបន្ទុកបង្វឹក ខណៈគ្រូជំនួយត្រូវទទួលបានប្រាក់ឧបត្ថម្ភចំនួន៧០ភាគរយនៃប្រាក់ឧបត្ថម្ភសម្រាប់គ្រូបង្វឹក។
គ្រូបង្វឹកបានប្រាក់រង្វាន់ស្មើអត្តពលិកដែលទទួលបានមេដាយខ្ពស់ជាងគេក្នុងវិញ្ញាសាដែលខ្លួនដឹកនាំ
យោងតាមឯកសារឧទ្ទេសនាមរបស់ NOCC កីឡាសីប៉ាកតាក្រ មានលោក ជាតិ ខេមរា ជាគ្រូបង្វឹក លោក ឈួន ប៉ុណ្ណារ៉ា និងលោកស្រី យ៉ែម ប៉ព្រៀង ជាគ្រូជំនួយ។ កីឡាប៉េតង់មានលោក អ៊ឹម ផាត ជាគ្រូបង្វឹក លោក សុខ ម៉ុង លោក អ៊ុក យ៉ារី និងអ្នកស្រី ជុំ ច័ន្ទថុល ជាគ្រូជំនួយ។ កីឡាប្រដាល់មានលោក Rolawdo Casteullano Rodrigoes ជាគ្រូបង្វឹក និងលោក វ៉ែន សុផល ជាគ្រូជំនួយ។ កីឡាតេក្វាន់ដូ មានលោក Choi Yong Sok ជាគ្រូបង្វឹក លោក ជាតិ ខេមរា និងលោក ម៉ៅ សុផល ជាគ្រូជំនួយ។ កីឡាវាយកូនបាល់ មានលោក ជា ពៅ មានឈ្មោះជាគ្រូបង្វឹក ខណៈលោក Braen Aneiros ជាគ្រូជំនួយ។
កម្ពុជាឡើង១ចំណាត់ថ្នាក់
ទោះបីជាយ៉ាងណាក៏ដោយ លោក វ៉ាត់ ចំរើន អគ្គលេខាធិការ NOCC និងជានាយបេសកកម្មប្រតិភូកីឡាកម្ពុជា បានអះអាងថា វាមិនអាក្រក់ពេកនោះឡើយសម្រាប់កម្ពុជា ពីព្រោះប្រទេសទាំងអស់សុទ្ធតែធ្លាក់ចុះនូវចំនួនមេដាយរបស់ខ្លួន លើកលែងតែម្ចាស់សឹង្ហបុរី។
លោកបានកត់សម្គាល់ថា មីយ៉ាន់ម៉ារដែលជាម្ចាស់ផ្ទះកាលពីឆ្នាំ២០១៣ បានធ្លាក់ពីចំណាត់ថ្នាក់លេខ២ ទៅចំណាត់ថ្នាក់លេខ៧ ប៉ុន្តែសម្រាប់កម្ពុជាបានឡើងពីចំណាត់ថ្នាក់លេខ៩ មកលេខ៨ ដោយឈរពីលើឡាវ ប្រ៊ុយណេ និងទីម័រខាងកើត ដែលគ្មានមេដាយមាសក្នុងដៃ។
ក្រៅពីកីឡាសីប៉ាតាក្រ ប៉េតង់ ប្រដាល់ តេក្វាន់ដូ និងវាយកូនបាល់ ដែលទទួលបានមេដាយ លោក វា់ត់ ចំរើន បានលើកឡើងពីការវិវត្តទៅមុខដ៏គួរឲ្យកត់សម្គាល់លើប្រភេទកីឡាជាក្រុម រួមមានបាល់ទាត់ បាល់បោះ និងបាល់ទះ ដែលបានក្លាយជាគូប្រជែងដ៏តឹងតែងរបស់បណ្តាប្រទេសនានា។ រីឯកីឡាវាយកូនឃ្លីលើតុ វាយសី និងប្រណាំងកង់ សុទ្ធតែមានកំណត់ត្រាឈ្នះការប្រកួត។
ខណៈកីឡាករ-កីឡាការិនីមួយចំនួននៃកីឡាហែលទឹក និងអត្តពលកម្ម បានបំបែកកំណត់ត្រាចាស់របស់ខ្លួន កីឡាផ្សេងទៀតរបស់កម្ពុជាភាគច្រើន បានបញ្ចប់ចំណាត់ថ្នាក់ចុងក្រោយគេ និងធ្លាក់នៅវគ្គជម្រុះ។
ព្រឹត្តិការណ៍កីឡាស៊ីហ្គេមលើកទី១៩ នាឆ្នាំ២០១៧ នឹងប្រព្រឹត្តទៅនៅប្រទេសម៉ាឡេស៊ី ហើយកម្ពុជាក៏ទទួលលិខិតផ្លូវការរួចរាល់ហើយផងដែរសម្រាប់ការធ្វើជាម្ចាស់ផ្ទះព្រឹត្តិការណ៍កីឡាថ្នាក់តំបន់នេះជាលើកដំបូងនាឆ្នាំ២០២៣ ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
ផ្សារដើមគរថ្មី លើផ្ទៃដី៣០ហិកតា ត្រូវបានដាក់ដំណើរការជាផ្លូវការហើយ
3 ថ្ងៃ
ដំណឹងបឋម៖ ករណីផ្ទុះឃ្លាំងគ្រាប់នៅបន្ទាយភូមិភាគ៣ ក្រុងច្បារមន មានអ្នកស្លាប់ និងរបួសច្រើននាក ...
4 ថ្ងៃ
តើពាក្យងារជា «សម្តេច» មានន័យដូចម្តេច?
17 ម៉ោង
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
7 ថ្ងៃ
តើពាក្យ «ដុតដៃដុតជើង» មានន័យដូចម្តេច?
6 ថ្ងៃ
អត្ថបទពេញនិយមបន្ថែម