ជាតិ
នយោបាយជាតិ
តំណាងរាស្ត្រ CNRP នឹងធ្វើសន្និសីទកាសែតជុំវិញបញ្ហាព្រំដែននៅដើមសប្តាហ៍ក្រោយ
×![]()
ដោយ: ម៉ៅ សុផា
ក្រុមតំណាងរាស្ត្របក្សប្រឆាំង១៤នាក់ ដែលដឹកនាំដោយលោក ម៉ៅ មុនីវណ្ណ នឹងធ្វើសន្និសីទកាសែតស្តីពីបញ្ហាព្រំដែនកម្ពុជា-វៀតណាម នៅទីស្នាក់ការកណ្តាលគណបក្សខ្លួន នៅដើមសប្តាហ៍ក្រោយ។ នេះបើតាមការបញ្ជាក់របស់លោក ម៉ៅ មុនីវណ្ណ តំណាងរាស្ត្រមណ្ឌលកំពង់ចាម នៅថ្ងៃទី១៩ ខែមិថុនា។
លោក ម៉ៅ មុនីវណ្ណ នឹងធ្វើសន្និសីទកាសែតជុំវិញរឿងព្រំដែនកម្ពុជា-វៀតណាម នៅទីស្នាក់ការកណ្តាលបក្សសង្គ្រោះជាតិ ដែលស្ថិតនៅសង្កាត់ ចាក់អង្រែលើខណ្ឌ មានជ័យ។ ការសម្រេចចិត្តធ្វើសន្និសីទកាសែតនៅទីស្នាក់ការបក្ស គឺក្រោយពីលោក ហេង សំរិន ប្រធានរដ្ឋសភា បដិសេធមិនឲ្យលោកធ្វើសន្និសីទកាសែតនៅវិមានរដ្ឋសភាតាមការស្នើសុំរបស់ខ្លួន។
ការធ្វើសន្និសីទកាសែតនេះ ដើម្បីប្រតិកម្មនឹងលិខិតឆ្លើយតប របស់លោក វ៉ា គឹមហុង ទេសរដ្ឋមន្ត្រី ទទួលបន្ទុកកិច្ចការព្រំដែន ដែលការឆ្លើយតបនោះត្រូវបាន បានលោក ម៉ៅ មុនីវណ្ណថ្លែងថា ជាការឆ្លើយតបដែលមិនអាចទទួលយកបាន និងមិនសមហេតុផល។
គួរបញ្ជាក់ថា កាលពីថ្ងៃទី២៨ ខែឧសភា ឆ្នាំ២០១៥ ក្រុមតំណាងរាស្ត្រគណបក្សសង្គ្រោះជាតិទាំង១៤រូបមាន លោក ម៉ៅ មុនីវណ្ណ លោក អ៊ុំ សំអាន ជាដើម បានចុះហត្ថលេខារួមគ្នាលើលិខិតមូយផ្ញើទៅកាន់ លោកវ៉ា គឹមហុង ឲ្យបង្ហាញផែនទីដែលប្រើប្រាស់សម្រាប់ការបោះបង្គោលព្រំដែនកម្ពុជា-វៀតណាម និងពន្យល់អំពីនីតិវិធីនៃដំណើរការបោះបង្គោលតាមព្រំដែនកម្ពុជា-វៀតណាម។
ទាក់ទងនឹងបញ្ហានេះ ត្រូវបានលោក វ៉ា គឹមហុង ចេញលិខិតឆ្លើយតប នៅថ្ងៃទី១០ ខែមិថុនា ឆ្នាំ២០១៥ ដោយទាត់ចោលមិនធ្វើតាមសំណើរបស់ក្រុមតំណាងរាស្ត្របក្សសង្គ្រោះជាតិឡើយ ដោយលោកអះអាងថា បញ្ហានេះរដ្ឋាភិបាលធ្លាប់បានបញ្ជាក់ជាច្រើនលើកមកហើយ ជាពិសេសការបកស្រាយរបស់លោក ហ៊ុន សែន ក្នុងរដ្ឋសភាអស់រយៈពេល ៥ម៉ោង ២០នាទី កាលពីថ្ងៃទី៩ ខែសីហា ឆ្នាំ២០១២ ។ លិខិតឆ្លើយតបនោះ លោក វ៉ា គឹមហុង បានបញ្ជាក់ទៀតថា ការទាមទារឲ្យរដ្ឋាភិបាលបង្ហាញផែនទី និងបកស្រាយពីបញ្ហាព្រំដែននេះ គ្រាន់តែជាយុទ្ធសាស្ត្ររបស់ក្រុមអ្នកតំណាងរាស្ត្របក្សប្រឆាំងដើម្បីទាញយកប្រជាប្រិយភាពប៉ុណ្ណោះ។ លោកក៏បន្ថែមទៀតថា ប្រសិនបើអ្នកតំណាងរាស្ត្របក្សសង្គ្រោះជាតិ មានផែនទីដែលខ្លួនអះអាងថាត្រឹមត្រូវមែននោះ សូមឲ្យតំណាងរាស្ត្រទាំងនោះប្រគល់ជូនរដ្ឋាភិបាល ដើម្បីផ្ទៀងផ្ទាត់ជាមួយផែនទីផ្លូវការដែលកម្ពុជាមាន៕
© រក្សាសិទ្ធិដោយ thmeythmey.com
