កីឡាជាតិ
ជាតិ
ហេតុអ្វីបានជាយើងត្រូវគាំទ្រក្រុមជម្រើសជាតិយ៉ាងខ្លាំងក្លានៅពេលនេះ? មូលហេតុគឺ...
× បច្ចុប្បន្ន ក្រុមកីឡាបាល់ទាត់ជម្រើសជាតិទាំង៣៩ [ឥណ្ឌូនេស៊ីត្រូវបានលុបឈ្មោះចេញដោយសារតែមានការជ្រៀតជ្រែកពីសំណាក់រដ្ឋាភិបាល] មិនមែនត្រឹមតែស្ថិតក្នុងយុទ្ធនាការស្វែងរកកៅអីជុំទីបីនៃការប្រកួតជម្រុះប្រចាំតំបន់អាស៊ី នៃព្រឹត្តិការណ៍ World Cup ឆ្នាំ២០១៨ នៅរុស្ស៊ីប៉ុណ្ណោះទេ តែវាក៏ជាការប្រជែងកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួម អេមីរ៉េត ផងដែរ។
ដោយសារការប្រកួតដណ្តើមពានរង្វាន់ពិភពលោក (FIFA World Cup) ជាព្រឹត្តិការណ៍កំពូល សារព័ត៌មានជាច្រើនមិនសូវរំលឹកដល់ព្រឹត្តិការណ៍ដណ្តើមពានរង្វាន់ទ្វីបអាស៊ី (AFC Asian Cup) នោះឡើយ។ ការដាក់បញ្ចូលយុទ្ធនាការរួមគ្នាជាលើកដំបូងនេះ គឺសហព័ន្ធកីឡាបាល់ទាត់ទ្វីបអាស៊ី (AFC) ចង់ឲ្យជម្រើសជាតិទាំងអស់នៅក្នុងទ្វីបអាស៊ី មានការប្រកួតប្រជែងកាន់តែច្រើន។
សារព័ត៌មានថ្មីៗ សូមធ្វើការបង្ហាញមិត្តអ្នកអានទាំងអស់ ដើម្បីឲ្យបានស្វែងយល់ពីមូលហេតុដែលក្រុមអ្នកគាំទ្រត្រូវបន្តលើកទឹកចិត្តក្រុមកីឡាបាល់ទាត់ជម្រើសជាតិរបស់ខ្លួននាការប្រកួតជម្រុះជុំទីពីរប្រចាំតំបន់អាស៊ី នៃព្រឹត្តិការណ៍ World Cup និង AFC Asian Cup។
កម្ពុជាបានឆ្លងកាត់ការប្រកួតជម្រុះបឋមប្រចាំតំបន់អាស៊ី ជាមួយនឹងជ័យជម្នះ ៤-១ លើម៉ាកាវ ដោយឈ្នះ ៣-០ នៅក្នុងទឹកដី និងស្មើ ១-១ នៅលើទឹកដីម៉ាកាវ។ ជ័យជម្នះបាននាំឲ្យកម្ពុជាមានឈ្មោះប្រកួតជុំទីពីរលើកដំបូង ជាមួយក្រុមចំនួន៣៩ទៀត។
នៅក្នុងជុំទីពីរ ក្រុមទាំង៤០ ត្រូវបែងចែកជា៨ពូល ដោយក្នុងមួយពូលៗ មាន៥ក្រុម។ កម្ពុជាស្ថិតនៅក្នុងពូល E ជាមួយ ជប៉ុន សឹង្ហបុរី អាហ្វហ្គានីស្ថាន និងស៊ីរី ហើយការប្រកួតធ្វើឡើងចំនួន៨លើក ជាលក្ខណៈក្នុងទឹកដី និងក្រៅទឹកដី។
សូមបញ្ជាក់ថានៅក្នុងពូល F មានតែ៤ក្រុមប៉ុណ្ណោះ បន្ទាប់សហព័ន្ធកីឡាបាល់ទាត់អន្តរជាតិ (FIFA) បានព្យួរសហព័ន្ធកីឡាបាល់ទាត់ឥណ្ឌូនេស៊ី ដោយសារតែមានការជ្រៀតជ្រែកពីសំណាក់រដ្ឋាភិបាល ហើយកាលពីថ្ងៃទី៣ ខែមិថុនា ឆ្នាំ២០១៥ AFC បានសម្រេចដកក្រុមជម្រើសជាតិឥណ្ឌូនេស៊ីចេញពីរាល់ការប្រកួតទាំងអស់។
ហេតុផលដែលយើងត្រូវលើកទឹកចិត្តក្រុមជម្រើសជាតិគ្រប់កាលៈទេសៈ៖
១. ក្រុមលេខមួយក្នុងពូលនីមួយៗ (៨ក្រុម) និងក្រុមលេខពីរដែលមានពិន្ទុខ្ពស់ចំនួន៤ក្រុម ឈានបន្តទៅវគ្គជម្រុះជុំទីបីនៃ World Cup ឆ្នាំ២០១៨ ព្រមទាំងទទួលបានកៅអីនៅវគ្គចុងក្រោយនៃ AFC Asian Cup ឆ្នាំ២០១៩ ។
២. ក្រុមដែលទទួលបានចំណាត់ថ្នាក់លេខពីរលំដាប់ទាបចំនួន៤ក្រុម ក្រុមចំណាត់ថ្នាក់លេខបីចំនួន៨ក្រុម និងក្រុមលេខ៤ដែលលំដាប់មានពិន្ទុខ្ពស់ជាងគេ (៤ក្រុម) ឈានទៅប្រកួតវគ្គជម្រុះជុំទី៣នៃ AFC Asian Cup ។
៣. ក្រុមលេខ៤ដែលមានលំដាប់ពិន្ទុទាប (៤ក្រុម) រួមទាំងក្រុមលេខ៥ (៨ក្រុម) នៃពូលនិមួយៗ ត្រូវប្រកួតនៅវគ្គ Play-off នៃ AFC Asian Cup ដោយ AFC គ្រោងរៀបចំឲ្យមានការប្រកួតជុំទីមួយ និងជុំទីពីរ នាអំឡុងខែមិថុនា និងខែកញ្ញា ឆ្នាំ២០១៦ ប៉ុន្តែរូបមន្តនៃការប្រកួតមិនទាន់ត្រូវបានប្រកាសឲ្យដឹងឡើយ ខណៈ៨ក្រុមនឹងឈានទៅជុំទីបី AFC Asian Cup។
ដើម្បីឲ្យងាយស្រួលយល់ សារព័ត៌មានថ្មីៗ សូមលើកយកឧទាហរណ៍មកបញ្ជាក់ដូចខាងក្រោម៖
បើកម្ពុជា៖
-លេខ១ នឹងទទួលកៅអីនៅវគ្គជម្រុះជុំទីបី World Cup និងជុំចុងក្រោយ AFC Asian Cup
- លេខ២ អាចបានកៅអីជុំចុងក្រោយ AFC Asian Cup (ក្នុងករណីកម្ពុជាស្ថិតក្នុងចំណោមក្រុមលេខ២ដែលមានលំដាប់ពិន្ទុខ្ពស់៤ក្រុម) ឬវគ្គជម្រុះជុំទីបី AFC Asian Cup (ក្នុងករណីកម្ពុជាស្ថិតក្នុងចំណោមក្រុមចំណាត់ថ្នាក់លេខ២ដែលមានលំដាប់ពិន្ទុទាប៤ក្រុម)។
-លេខ៣ បានកៅអីសម្រាប់ការប្រកួតវគ្គជម្រុះជុំទី៣នៃ AFC Asian Cup
-លេខ៤ លេងនៅវគ្គជម្រុះជុំទី៣នៃ AFC Asian Cup (ក្នុងករណីកម្ពុជាស្ថិតក្នុងចំណោមក្រុមចំណាត់ថ្នាក់លេខ៤ដែលមានលំដាប់ពិន្ទុខ្ពស់៤ក្រុម) ឬលេងនៅវគ្គ Asian Cup qualifying play-off round (ក្នុងករណីកម្ពុជាស្ថិតក្នុងចំណោមក្រុមចំណាត់ថ្នាក់លេខ៤ដែលមានលំដាប់ពិន្ទុទាប៤ក្រុម)។
-លេខ៥ កម្ពុជាអាចលេងនៅវគ្គ Asian Cup qualifying play-off round ដើម្បីប្រជែងទៅកាន់ជុំទីបីនៃ AFC Asian Cup៕
© រក្សាសិទ្ធិដោយ thmeythmey.com