ជាតិ
សង្គមជាតិ
ពលរដ្ឋសហគមន៍ត្រពាំងអញ្ចាញទាមទារសំណង៨០០០ដុល្លារក្នុងមួយគ្រួសារ ពីធនាគារ ADB
×
ពលរដ្ឋសហគមន៍ត្រពាំងអញ្ចាញ ចំនួន១៣០គ្រួសារ បានប្រមូលផ្តុំគ្នាសាជាថ្មីនៅព្រឹកនេះ ដើម្បីតវ៉ាទាមទារឲ្យធនាគារADBផ្តល់សំណងចំនួន៨០០០ដុល្លារក្នុងមួយគ្រួសារ ដែលរងការប៉ះពាល់ពីគម្រោងស្តារផ្លូវរថភ្លើងរបស់ធនាគារនេះ។
ពលរដ្ឋចំនួន១៣០គ្រួសារ ដែលរស់នៅសហគមន៍ត្រពាំងអញ្ចាញ ស្ថិតនៅភូមិត្រពាំងអញ្ចាញថ្មី សង្កាត់ត្រពាំងក្រសាំង ខណ្ឌពោធិ៍សែនជ័យ សម្រេចចិត្តនាំគ្នាទៅតវ៉ានៅមុខធនាគារ ADB ម្តងទៀត ដើម្បីសុំឲ្យធនាគារនេះផ្តល់សំណង ៨០០០ដុល្លា ក្នុងមួយគ្រួសារដើម្បីស្តារជីវភាពរស់នៅឡើងវិញ បន្ទាប់ពីរងការខូចខាតពីគម្រោងស្តារផ្លូវរថភ្លើងរបស់ធនាគារអស់រយៈពេលជិត ៤ឆ្នាំមកហើយ។
ជាការឆ្លើយតបនឹងការទាមទារនេះ ធនាគារ ADBបានសន្យាថានឹងផ្តល់ចម្លើយនៅរយៈពេល២០ថ្ងៃទៀត។
តំណាងពលរដ្ឋសហគមន៍ត្រពាំងអញ្ចាញ លោកស្រី មុច សុថា បានមានប្រសាសន៍ថា លោកស្រី និងបងប្អូនសហគមន៍ នឹងរង់ចាំចម្លើយ តែប្រសិនបើធនាគារមិនមានចម្លើយ ឬក៏នៅតែមិនផ្តល់សំណងណាមួយនោះទេ ពួកគាត់នៅតែបន្តទាមទារទៀត។ លោកស្រីបញ្ចាក់យ៉ាងនេះថា៖ «កន្លងមក ធនាគារធ្លាប់បានប្រាប់ពួកខ្ញុំថាកុំព្រួយបារម្មណ៍ ធនាគារនឹងគិតគូរផ្តល់សំណងដល់បងប្អូនសហគមន៍ឲ្យបានសមរម្យ។ តែជាក់ស្តែងពួកយើងមិនទាន់ទទួលបាននូវសំណងសមរម្យដូចអ្វីដែលធនាគារធ្លាប់បានសន្យានោះទេ។ ខ្ញុំផ្ទាល់ទទួលបានតែ ដីទំហំ ៧ មែត្រ x ១៥ មែត្រ និងបង្គន់មួយប៉ុណ្ណោះ»។
តំណាងសហគមន៍រូបនេះ ក៏ស្នើដល់ អ្នកការពារសិទ្ធិមនុស្ស ចូលរួមសង្កេតការណ៍ និងជួយជ្រោមជ្រែងក្នុងការទាមទាររបស់ពួកគាត់ ដើម្បីឲ្យពលរដ្ឋសហគមន៍ដែលរងផលប៉ះពាល់ពីគម្រោងស្តារផ្លូវរថភ្លើង ទទួលបាននូវសំណងយ៉ាងឆាប់រហ័សនិងសមរម្យដើម្បីស្តារជីវភាពរស់នៅឡើងវិញ។
គួរបញ្ជាក់ថា អស់រយៈពេលជិត៤ឆ្នាំហើយ ដែលប្រជាពលរដ្ឋសហគមន៍ត្រពាំងអញ្ចាញ ទាមទារសំណងពីធនាគារ ABDតែការទាមទារនេះ មិនទាន់ទទួលបានសំណងសមរម្យ និងអាចទទួលយកបាននោះទេ៕
© រក្សាសិទ្ធិដោយ thmeythmey.com