កីឡាជាតិ
ក្រុមកុមារី U-14 កម្ពុជាប៉ះមីយ៉ាន់ម៉ានាវេលាម៉ោង២រសៀលនេះនៅក្នុងទីក្រុងហាណូយ
×
ក្រុមកីឡាការិនីបាល់ទាត់ជម្រើសជាតិអាយុក្រោម១៤ឆ្នាំ ដឹកនាំការប្រកួតដំបូងក្នុងព្រឹត្តិការណ៍ AFC U-14 Girls’s Regional Championship ប្រចាំតំបន់អាស៊ាន ដែលប្រព្រឹត្តទៅនៅលើទីលាន YFTC Field ក្នុងទីក្រុងហាណូយ ប្រទេសវៀតណាម ដោយកម្ពុជាបើកការប្រកួតនៅក្នុងពូល A ដោយប៉ះជាមួយក្រុមមីយ៉ាន់ម៉ានាវេលាម៉ោង២រសៀលថ្ងៃនេះ មុននឹងប៉ះជាបន្តបន្ទាប់ជាមួយថៃ និងឡាវ។
ក្រុមកីឡាការិនី U-14 កម្ពុជា ដឹកនាំបង្វឹកដោយ លោក មាស សំអឿន អតីតគ្រូបង្វឹកក្លិបបៀលប្រាយយូណាយធីត និងក្លិបវេស្ទើនយូនីអែហ្វស៊ី ខណៈអ្នកស្រី កែវ សូលីដា មានតួនាទី ជាអ្នកចាត់ការទូទៅ។
កម្ពុជាស្ថិតនៅពូល A ជាមួយមីយ៉ាន់ម៉ារ ថៃ និងឡាវ រីឯពូល B មានម្ចាស់ផ្ទះវៀតណាម សឹង្ហបុរី ម៉ាឡេស៊ី និងហ្វីលីពីន។ ក្រុមពីរកំពូលតារាងនៃពូលនីមួយៗនឹងឈានបន្តទៅកាន់វគ្គពាក់កណ្តាលផ្តាច់ព្រ័ត្រនាថ្ងៃទី២៧ ខែមិថុនា ហើយវគ្គដណ្តើមចំណាត់ថ្នាក់លេខបី និងវគ្គផ្តាច់ព្រ័ត្រ ប្រព្រឹត្តទៅនៅថ្ងៃទី២៨ ខែមិថុនា។
នេះជាលើកទីបីហើយសម្រាប់កម្ពុជាដែលបានចូលរួមក្នុងព្រឹត្តិការណ៍ AFC U-14 Girls’s Regional Championship ប្រចាំតំបន់អាស៊ាន។ កាលពីឆ្នាំ២០១៣ ក្រោមការដឹកនាំរបស់លោក Samuel Schweingruberគ្រូបង្វឹកក្លិបភ្នំពេញក្រោននាពេលបច្ចុប្បន្ននោះ ក្រុមកុមារីកម្ពុជាស្ថិតក្នុងចំណាត់ថ្នាក់លេខ៥ក្នុងចំណោម៦ក្រុម ដោយម្ចាស់ផ្ទះវៀតណាម ជាប់លេខ១ ថៃ លេខ២ និងមីយ៉ាន់ម៉ារ បានលេខ៣ ។
នាការប្រកួតនៅលើទីលាន Thong Nhat Stadium នៃទីក្រុងហូជីមិញ កាលពីឆ្នាំ២០១៤ លោក អ៊ុំ សាវង្ស បានដឹកនាំក្រុមបញ្ចប់ក្នុងចំណាត់ថ្នាក់លេខបីនៅក្នុងពូល A ដោយយកឈ្នះសឹង្ហបុរី ២-១ ចាញ់វៀតណាម ៨-០ និងចាញ់ហ្វីលីពីន ៥-០ ។ កាលណោះ ថៃក្លាយជាម្ចាស់ជើងឯក ហ្វីលីពីនលេខ២ និងម្ចាស់ផ្ទះវៀតណាមបានលេខ៣ ។
ក្រៅពីតំបន់អាស៊ាន ព្រឹត្តិការណ៍ AFC U-14 Girls’s Regional Championship ក៏បានរៀបចំនៅតំបន់ផ្សេងៗក្នុងទ្វីបអាស៊ីផងដែរ។ នៅតំបន់ខាងកើតដែលមាន៨ក្រុមចូលរួម កូរ៉េខាងជើងបានលេខមួយ ម្ចាស់ផ្ទះចិនលេខ២ ជប៉ុនលេខ៣ រួមទាំងរង្វាន់ Fair Play។ កីឡាការិនីកូរ៉េខាងជើង Kim Yun Ok រកគ្រាប់បញ្ចូលទីច្រើនជាងគេដោយមាន៩គ្រាប់ ខណៈមិត្តរួមជាតិរបស់នាង គឺ Kim Ryo-song ជាប់ជាកីឡាការិនីឆ្នើមប្រចាំការប្រកួត។
នៅតំបន់ខាងលិចដែលមានតែ៥ក្រុមចូលរួម ហ្ស៊កដង់ បានចំណាត់ថ្នាក់លេខមួយ អារ៉ាប់រួម អេមីរ៉េត បានចំណាត់ថ្នាក់លេខពីរ ប៉ាឡេស្ទីន បានលេខបី ខណៈម្ចាស់ផ្ទះបារ៉ែន បានរង្វាន់ Fair Play។ កីឡាការិនីហ្ស៊កដង់ LeenYasin Mohammad Al Btoushជាប់ជាកីឡាការិនីឆ្នើមប្រចាំការប្រកួតផង និងជាអ្នកស៊ុតបាល់បញ្ចូលទីច្រើនជាងគេផងដែលមានចំនួន១២គ្រាប់។
រីឯនៅតំបន់អាស៊ីខាងត្បូង និងកណ្តាលដែលមាន៧ក្រុមចូលរួមនោះ ម្ចាស់ផ្ទះនេប៉ាល់ ត្រូវប៉ះបង់ក្លាដែសនៅវគ្គផ្តាច់ព្រ័ត្រ ខណៈឥណ្ឌាប្រជែងយកលេខ៣ជាមួយអ៊ីរ៉ង់។ ដោយសារតែនេប៉ាល់បានទទួលរងគ្រោះដោយសាររញ្ជួយ AFC មិនទាន់កំណត់ការប្រកួតសារជាថ្មីឡើយ ដែលកន្លងមក គេគ្រោងធ្វើនៅថ្ងៃទី២៥ ខែមេសា។
ក្រុមកីឡាការិនីកម្ពុជាដែលចូលរួមនៅឆ្នាំ២០១៥នេះ រួមមាន៖
អ្នកចាំទី៖ ភឿ ធូ, សុខា រតនា, ពឿន គន្ធា
ខ្សែការពារ៖ ចាន់ ធិន, ឡេង ពេជ្រនិល, ញ៉រ ស្រីណែត, ស៊ាន សាងយី, វ័យ ស្រីទូច, ឆាយ វ៉ាន់ឌី, ភឿន ស្រីល័ក្ខណ៍, ស្រីលាភ
ខ្សែបម្រើ៖ យ៉ន សោភ័ណ្ឌរស្មី, ហៀង សារី, សឿន វិផា, រ័ត្ន ឆៃអ៊ាង, ឈឿន គានី, ទី សំណាង
ខ្សែប្រយុទ្ធ៖ ម៉េត ម៉ាយ៉ាន, លឹម សុជា, មូល រស្មី, សុន ស៊ីណៃ, ជា ស្រីឃួន៕
© រក្សាសិទ្ធិដោយ thmeythmey.com