ជាតិ
អង្គការតម្លាភាពកម្ពុជាប្រកាសចែកប័ណ្ណប្រឆាំងអំពើពុករលួយជាផ្លូវការ
× អង្គការតម្លាភាពកម្ពុជា (TI Cambodia) បានប្រកាសចែកប័ណ្ណប្រឆាំងអំពើពុករលួយដល់ពលរដ្ឋគ្រប់ជាតិសាសន៍ឲ្យប្រើប្រាស់ជាផ្លូវការកាលពីថ្ងៃទី២៤ មិថុនា នៅមជ្ឈមណ្ឌលសហប្រតិបត្តិការកម្ពុជាជប៉ុន (CJCC)។ យុវជន មន្ត្រីអង្គការសង្គមស៊ីវិល និងមន្ត្រីធ្វើការលើវិស័យឯកជនជាង៣០០នាក់ បានចូលស្តាប់ការពន្យល់ពីអត្ថប្រយោជន៍ និងរបៀបប្រើប្រាសកាតប្រឆាំងអំពើពុករលួយនេះឲ្យមានប្រសិទ្ធភាព ដើម្បីរួមគ្នាប្រឆាំងអំពើពុករលួយ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល មានប្រសាសន៍ថា កាតប្រឆាំងអំពើពុករលួយនេះ គឺជាការលើកទឹកចិត្តឲ្យប្រជាពលរដ្ឋចូលរួមប្រឆាំងអំពើពុករលួយ។ ពលរដ្ឋដែលទទួលបានកាតប្រឆាំងអំពើពុករលួយ មិនមែនគ្រាន់តែយកកាត់នេះ ដើម្បីតែការបញ្ចុំតម្លៃនោះទេ គឺត្រូវមានស្មារតី ឆន្ទៈ និងការប្តេជ្ញាចិត្ត ដើម្បីធ្វើសកម្មភាព៥យ៉ាង។
សកម្មភាពទាំង៥ដែលលោក ព្រាប កុល បានមានប្រសាសន៍នោះមាន៖ ទី១) ខ្ញុំមិនសូកប៉ាន។ ទី២) ខ្ញុំមិនស៊ីសំណូក។ ទី៣) ខ្ញុំធ្វើការជាមួយអ្នកដៃ ឬអង្គការ ស្ថាប័នផ្សេងៗដើម្បីចូលរួមយុទ្ធនាការប្រឆាំងអំពើពុករលួយ។ ទី៤) ខ្ញុំសម្តែងមិតប្រឆាំងអំពើពុករលួយ និងរាយការណ៍បទល្មើសពុករលួយ។ និងទី៥) ខ្ញុំគាំទ្រតែបេក្ខជនសម្រាប់មុខតំណែងសាធារណៈណា ដែលនិយាយថា«ទេ»ចំពោះអំពើពុករលួយ និងបង្ហាញថាខ្លួនមានតម្លាភាព សុចរិតភាព និងគណនេយ្យភាព។ សូមបញ្ជាក់ថា ប្រជាពលរដ្ឋគ្រប់ជាតិសាសន៍ដែលមិនទាន់ទទួលបានកាន់នេះ ហើយគិតថាខ្លួនឯងចង់ចូលរូមប្រយុទ្ធប្រឆាំងអំពើពុករលួយ សូមចូលទៅកាន់គេហទំព័រ http://action.ticambodia.org/ ដើម្បីចុះឈ្មោះជាសមាជិក និងទទួលយកកាតនេះ។
សម្រាប់លោក ព្រាប កុល ចង់ឲ្យកាតនេះមានតម្លៃទៅលើមនសិការប្រឆាំងអំពើរពុករលួយ និងការផ្តាច់ជ្ញាចិត្តច្រើនជាងការបញ្ចុះតម្លៃនៅក្នុងកាតនេះ។
លោកបានបញ្ជាក់ថាការបញ្ចុះតម្លៃនេះគ្រាន់តែជាសក្ខីភាពដែលបញ្ជាក់ថា វិស័យឯកជនចូលរួមគាំទ្រដល់អ្នកដែលប្រឆាំងអំពើពុករលួយដោយការបញ្ចុះតម្លៃនៅតាមហាង និងក្រុមហ៊ុនដៃគូដែលបានចុះកុងត្រាជាមួយនឹងអង្គការតម្លាភាពកម្ពុជា។ លោក ព្រាប កុល បានបន្ថែមទៀតថា ពលរដ្ឋខ្មែរនៅតែគិតថាខ្លួនឯងនៅមានភារកិច្ចប្រឆាំអំពើពុករលួយ កាតនេះនៅតែមានប្រសិទ្ធភាព ហើយដរាបណាអំពើពុករលួយនៅតែមាន កាតនេះនៅតែមានសុពលភាពជានិច្ច។
សូមបញ្ជាក់ថា មកដល់ពេលនេះអង្គការតម្លាភាពកម្ពុជាបានចែកកាតប្រឆាំងអំពើពុករលួយនេះដល់ប្រជាពលរដ្ឋនៅទីក្រុងភ្នំពេញ និងនៅតាមបណ្ដាខេត្តនានាបានជាង៧ពាន់នាក់ហើយ។ ហើយក្រុមហ៊ុនដែលបានចុះកុងត្រាជាមួយនឹងអង្គការតម្លាភាពកម្ពុជានៅរាជធានីភ្នំពេញមានជាង៨០ក្រុមហ៊ុន និងនៅតាមបណ្តាខេត្តនានាមានជាង៣០ក្រុមហ៊ុន៕
© រក្សាសិទ្ធិដោយ thmeythmey.com