ជាតិ
CNRP មិនបានទទួលការអញ្ជើញឲ្យចូលរួមពិធីខួបកំណើតCPPឡើយ
× បើទោះជាបានបង្កើតវប្បធម៌សន្ទនាជាមួយគ្នា ក៏ទំនងជាមិនមានន័យថា ទំនាក់ទំនងរវាងគណបក្សគូរប្រជែងនយោបាយទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ អាចរំកិលចូលគ្នា រហូតដល់អញ្ជើញគ្នាឲ្យចូលរួមក្នុងពិធីរម្លឹកខួបនៃការបង្កើតគណបក្សដែរ។
លោក ហុង សុខហួរ មន្ត្រីជាន់ខ្ពស់នៃខុទ្ទកាល័យលោកសម រង្ស៊ី បានបញ្ជាក់ប្រាប់សារព័ត៌មានថ្មីៗថា រហូតដល់ព្រឹកថ្ងៃសៅរ៍នេះ គណបក្សសង្គ្រោះជាតិមិនបានឃើញលិខិតអញ្ជើញពីគណបក្សប្រជាជនកម្ពុជាឲ្យចូលរួមពិធីរម្លឹកខួបគណបក្សនៅថ្ងៃអាទិត្យទី២៨មិថុនានេះឡើយ។ ទោះយ៉ាងនេះក្តី មន្ត្រីខុទ្ទកាល័យប្រធានគណបក្សសង្គ្រោះជាតិក៏មិនទាន់ហ៊ានសន្មតជាចុងក្រោយថា វាពិតជាគ្មានការអញ្ជើញនោះដែរ ខណៈដែលពិធីនឹងប្រព្រឹត្តទៅនៅថ្ងៃអាទិត្យស្អែក។ «យើងមិនបានឃើញលិខិតអញ្ជើញទេរហូតដល់ព្រឹកថ្ងៃសោរ៍នេះ។ ធម្មតាបើគេអញ្ជើញ យើងគួរទទួលបានលិខិតអញ្ជើញ៤៨ម៉ោងមុនដែរ។ ប៉ុន្តែ អ្វីៗក៏អាចទៅរួចដែរ»។ នេះជាប្រសាសន៍របស់លោក ហុង សុខហួរ។
«អ្វីៗក៏អាចទៅរួច» លុះត្រាតែក្នុងករណីដែលលោក ហ៊ុន សែន ដែលអាចនៅបន្តសន្ទនា ឬទាក់ទងតាមទូរសព្ទជាមួយលោក សម រង្ស៊ី ដូចដែលលោកធ្លាប់បានបង្ហើបក្នុងពេលកន្លងមក ហើយលោក ហ៊ុន សែន ក៏អញ្ជើញលោក សម រង្ស៊ី ផ្ទាល់មាត់។ ប៉ុន្តែបើស្តាប់ការអះអាងរបស់លោក លោក ឈឹម ផលវរុណ ដែលជាអ្នកនាំពាក្យគណបក្សប្រជាជនកម្ពុជាវិញ គណបក្សប្រជាជនកម្ពុជាមិនមានទម្លាប់អញ្ជើញគណបក្សប្រឆាំងឲ្យចូលរួមក្នុងពិធីរម្លឹកខួបកំណើតបក្សនោះទេ។
ផ្ទុយទៅវិញ លោក ឈឹម ផលវរុណ បានដឹងច្បាស់អំពីវត្តមាននៃថ្នាក់ដឹកនាំគណបក្សហ្វ៊ុនស៊ិនប៉ិចដែលជាគណបក្សសម្ព័ន្ធភាពរបស់គណបក្សប្រជាជនកម្ពុជា។ «តាមដឹងគឺនឹងមានព្រះវត្តមានសម្តេចក្រុមព្រះ នរោត្តម រណឬទ្ធិ ឯកឧត្តម ញឹក ប៊ុនឆៃ ឯកឧត្តម នុត សុខុម និងឯកឧត្តម សាយ ហាក់ ពីខាងគណបក្សហ្វ៊ុនស៊ិនប៉ិច។ យើងមិនមានទម្លាប់អញ្ជើញគណបក្សប្រឆាំងទេ»។ នេះជាការបញ្ជាក់របស់អ្នកនាំពាក្យនៃគណបក្សប្រជាជនកម្ពុជា៕
© រក្សាសិទ្ធិដោយ thmeythmey.com