ជាតិ
បទវិភាគ
ប្រជាជនខ្មែររង់ចាំអ្នកខ្លាំង!
× ក្នុងរយៈពេលប៉ុន្មានឆ្នាំចុងក្រោយនេះ ប្រជាជនកម្ពុជា កាន់តែច្រើនឡើង បានគាំទ្រ លើកទឹកចិត្តដល់អ្នកដែលមានសមត្ថភាពពូកែៗ ស្ទើគ្រប់វិស័យ ជាពិសេស គឺវិស័យអប់រំ និងវិស័យកីឡាតែម្តង។ កន្លងមកនៅក្នុងវិស័យអប់រំ នៅពេលដែលសិស្ស និស្សិត សាស្ត្រាចារ្យ ណាមួយដែលមានសមត្ថភាពខ្លាំង ប្រឡងបានចំណាត់ថ្នាក់ល្អ ឬទទួលបានពានរង្វាន់ល្អជាងគេប្រចាំប្រទេស ឬតំបន់ ឬក៏នៅលើពិភពលោកនោះ ប្រជាជនខ្មែរតែងអបអរសាទរនឹងលើកទឹកចិត្តដល់ពួកគេ។ តួយ៉ាងដូចជា ករណីកីឡាការិនី ស៊ន សៀវម៉ី និងក្រុមកីឡាបាល់ទាត់ជម្រើសជាតិកម្ពុជាជាដើម។
អ្នកដឹកនាំ អ្នកនយោបាយ និងប្រជាជនខ្មែរ កាន់តែច្រើនឡើង ផ្តើមឲ្យតម្លៃ គាំទ្រ និងលើកទឹកចិត្តដល់អ្នកមានសមត្ថភាព ដែលបានសាងស្នាដៃល្អៗសម្រាប់កត្តិយសកម្ពុជា ក្នុងឆាកជាតិ និងអន្តរជាតិ។ ជាក់ស្តែងនៅក្នុងវិស័យអប់រំ ករណីសិស្ស ១១ នាក់ ដែលប្រឡងមធ្យមសិក្សាជាប់និទ្ទេស A កាលពីឆ្នាំ ២០១៤ កន្លងទៅ ករណីអ្នកគ្រូនាង ផល្លា បេក្ខជនជ័យលាភីពានរង្វាន់គ្រូឆ្នើមពិភពលោក និងករណីសិស្សដែលទទួលបានជ័យលាភីមេដាយសំរិទ្ធ និងប្រាក់ ក្នុងការប្រកួតរូបវិទ្យាអូឡាំព្យាដទ្វីបអាស៊ីនៅប្រទេសចិន កាលពីពេលថ្មីៗនេះ ព្រមទាំងជ័យលាភីផ្សេងៗទៀតនៅលើឆាកអន្តរជាតិរបស់សិស្ស និស្សិត គ្រូ សាស្ត្រាចារ្យខ្មែរ សុទ្ធតែបានទទួលការសាទរយ៉ាងខ្លាំងពីសំណាក់ប្រជាជន និងរដ្ឋាភិបាល។ ក្រៅពីទទួលបានគាំទ្រផ្នែកផ្លូវចិត្ត អ្នកដែលមានសមត្ថភាពពូកកែៗទាំងនោះ ថែមទាំងទទួលបានវត្ថុ ឬថវិកាពីរដ្ឋាភិបាលទៀតផង។
ចំណែកវិស័យកីឡាវិញ ក៏ប្រជាជនខ្មែរគាំទ្រខ្លាំងផងដែរនាពេលបច្ចុប្បន្ន។ ម្ចាស់មេដាយមាសតៃក្វាន់ដូក្នុងព្រឹត្តិការណ៍ ASAIN GAME ស៊ន សៀវម៉ី និងម្ចាស់មេដាយមាសកីឡាប៉េតង់ក្នុងព្រឹត្តិការណ៍ Women’s World Championship of Petanqueនៅប្រទេសបារាំង កាលពីឆ្នាំ២០១៣អ្នកស្រី កែ ឡេង សុទ្ធតែរដ្ឋាភិបាលរៀបចំហែរក្បួនអបអរសាទរចំពោះជ័យលាភីរបស់ពួកគេ។ ជាមួយគ្នានេះ វគ្គជម្រុះជុំទីពីរប្រចាំតំបន់អាស៊ីនៃព្រឹត្តិការណ៍ World Cup ពីរប្រកួតចុងក្រោយនេះ គឺកម្ពុជាប៉ះជាមួយសិង្ហបុរី និងអាហ្វហ្កានិស្ថាន ដែលមានអ្នកទស្សនារាប់ម៉ឺននាក់ បានបញ្ជាក់យ៉ាងច្បាស់ថា ប្រជាជនកម្ពជា ជាពិសេសគឺយុវជន កាន់តែច្រើនឡើងចូលរួមគាំទ្រ លើកទឹកចិត្តដល់កីឡាករកម្ពុជា បើទោះជាកម្ពុជាបរាជ័យទាំងពីរលើកក្នុងការប្រកួតក៏ដោយ។ ការបរាជ័យនេះ មិនបានធ្វើឲ្យពួកគេបាក់ទឹកចិត្តនឹងរារែកមិនទៅគាំទ្រការប្រកួតលើកក្រោយទៀតនោះទេ។ នៅក្នុងព្រឹត្តិការណ៍នេះ កីឡាករដែលឆ្នើមនៅក្នុងក្រុម ត្រូវអ្នកគាំទ្រស្រែកបញ្ចេញឈ្មោះចំៗយ៉ាងកងរំពង។
តាមរយៈសកម្មភាពទាំងអស់នេះ ប្រាកដណាស់ថា ប្រជាជនខ្មែរ កំពុងមានផ្នត់គំនិតផ្តល់តម្លៃ និងគាំទ្រដល់អ្នកដែលមានសមត្ថភាពខ្លាំងពូកែនិយាយឲ្យខ្លីគឺពលរដ្ឋខ្មែរកំពុងតែរង់ចាំអ្នកខ្លាំងមកពីគ្រប់ទិសទីក្នុងប្រទេសកម្ពុជា ដែលសមត្ថភាពខ្ពស់ជួយលើកកិត្តយសប្រទេសជាតិ ដើម្បីផ្តល់កម្លាំងចិត្តដល់ទាំងនោះ។ កន្លងមក កីឡាករ សិស្ស និស្សិត សាស្ត្រាចារ្យមួយចំនួន នៅពេលដែលពួកគេ ប្រកួតប្រជែងឬប្រឡងយកពានរង្វាន់ណាមួយជាលក្ខណៈអន្តរជាតិ ហើយបរាជ័យនោះ ពេលខ្លះពួកគេមិនបានទទួលស្គាល់ពីចំណុចខ្វះខាតរបស់ខ្លួនតែម្យ៉ាងនោះទេ តែពួកគេក៏ទម្លាក់កំហុសមកលើរដ្ឋាភិបាល និងប្រជាជនខ្លួនថា មិនសូវឲ្យតម្លៃ និងគាំទ្រទាំងផ្នែកថវិកា និងលើកទឹកចិត្តដល់ពួកខ្លួន។ ក៏ប៉ុន្តែនៅពេលបច្ចុប្បន្នអ្នកណាដែលមានសមត្ថភាព ពួកគេទទួលបានការយកចិត្តទុកដាក់ទាំងផ្នែកថវិកា និងការគាំទ្រទាំងផ្លូវចិត្ត ពីសំណាក់រដ្ឋាភិបាល និងប្រជាជនកម្ពុជា។ ហើយតាមរយៈសកម្មភាពនេះ វាក៏ជាសារ ប្រាប់ទៅកីឡាករ-កីឡាការិនីថា បើពួកគេប្រកួតប្រជែងចាញ់គេ កុំទម្លាក់កំហុសលើរដ្ឋាភិបាល និងប្រជាជនខ្លួនតែម្យ៉ាងដូចលើកមុនទៀត។
ការគាំទ្រពីសំណាក់រដ្ឋាភិបាល និងប្រជាជនចំពោះអ្នកដែលមានសមត្ថភាពនេះ វាមិនមែនត្រឹមតែជាចំណុចវិជ្ជមានមួយ ដែលជំរុញទឹកចិត្តអ្នកដែលមានសមត្ថភាពបច្ចុប្បន្ន ពោលគឺ កីឡាករ សិស្ស និស្សិត និងគ្រូជាដើម ឲ្យខំប្រឹងបន្ថែមទៀតនោះទេ តែវាក៏បំផុសនូវទឹកចិត្តដល់យុវជនជំនាន់ក្រោយឲ្យមានកម្លាំងចិត្ត និងខិតខំ ដើម្បីពង្រឹងសមត្ថភាពរបស់ពួកគេបន្ថែមទៀត។ ពីព្រោះថា ប្រសិនបើពួកគេខ្លាំង មានសមត្ថភាពខ្ពស់ នឹងទទួលបានការលើកទឹកចិត្ត និងមានកិត្តិយសនៅក្នុងសង្គមដូចសិស្សច្បងគេដែរ។ ពេលនោះ ចំនួនអ្នកពូកែ អ្នកមានសមត្ថភាព ដែលប្រកួតប្រជែកគ្នា ដើម្បីស្វែងរកកិត្តិយសជូនជាតិនៅក្នុងប្រទេសយើង នឹងមានចំនួនកាន់តែច្រើនឡើង។ ហើយនៅពេលដែលក្នុងសង្គមមានធនធានមនុស្សពូកែៗច្រើន ប្រទេសជាតិនឹងឆាប់រីកចម្រើន៕
© រក្សាសិទ្ធិដោយ thmeythmey.com