ជាតិ
នយោបាយជាតិ
បណ្តឹងសាទុក្ខ៖សាក្សីថាខ្មែរក្រហមកាប់សម្លាប់អតីតកងទ័ព និងមន្ត្រីរដ្ឋការនៃរបបនន់ នល់
× អង្គជំនុំជម្រះតុលាការកំពូល នឹងបន្តសវនាការលើបណ្តឹងសាទុក្ខនៅថ្ងៃចន្ទទី៦ខែកក្កដាដើមសប្តាហ៍ក្រោយបន្តទៀត និងត្រៀមស្តាប់ការផ្តល់សក្ខីកម្មសាក្សីទី៣មួយរូបទៀត។ តាមគម្រោងសវនាការដែលគ្រោងធ្វើឡើងរយៈពេល៤ថ្ងៃនេះ នឹងស្តាប់ការផ្តល់សក្ខីកម្មរបស់សាក្សីចំនួន៣រូប ដែលស្នើសុំដោយក្រុមមេធាវីការពារក្តីជនជាប់ចោទ នួន ជា។
លោក នេត ភក្ត្រា អ្នកនាំពាក្យសាលាក្តីខ្មែរក្រហម បានឲ្យដឹងថានៅថ្ងៃទី៣ខែកក្កដានេះ អង្គជំនុំជម្រះតុលាការកំពូលបានស្តាប់ការផ្តល់សក្ខីកម្មរបស់សាក្សីទី២ ដែលជាជនរងគ្រោះនៅក្នុងរបបខ្មែរក្រហម។
លោក សម សិទ្ធី គឺជាជនរងគ្រោះនៃការកាប់សម្លាប់របស់ខ្មែរក្រហមទៅលើអតីតកងទ័ព និងមន្ត្រីរដ្ឋការនៃរបបសាធារណរដ្ឋខ្មែរនៅក្នុងខេត្តកំពង់ឆ្នាំង ដោយលោកមានឪពុកជា ទាហាននៃរបប លន់ នល់ ដែលបានមកផ្តល់សក្ខីកម្មនៅថ្ងៃទី២ នៃសវនាការលើកទី១ លើបណ្តឹងសាទុក្ខសំណុំរឿង០០២/០១នេះ។
នៅចំពោះមុខអង្គជំនុំជម្រះនៅថ្ងៃនេះ លោក សម សិទ្ធី បានរៀបរាប់ថាប្រជាពលរដ្ឋជាច្រើនពាន់នាក់ត្រូវបាន ខ្មែរក្រហមជម្លៀសចេញ។ លោកថាកងទ័ពខ្មែរក្រហមបានប្រកាសឱ្យប្រជាជននៅខេត្តកំពង់ឆ្នាំងចាកចេញពីផ្ទះសម្បែងរបស់ខ្លួន នៅពេលដែលពួកគេឡើងកាន់អំ ណាចនៅថ្ងៃទី១៧ ខែមេសា ឆ្នាំ១៩៧៥ បើមិនចេញទេប្រយ័ត្នយន្តហោះអាមេរិកមកទម្លាក់គ្រាប់បែក។
សាក្សីរូបនេះបានបញ្ជាក់ទៀតថា លោកបានធ្វើពុតជាស្លាប់នៅពេលដែល មានការបាញ់ប្រហារពីក្រុមខ្មែរក្រហម ទៅលើសមាជិក៧គ្រួសារដែលត្រូវបានជម្លៀសចេញ។ លោក សម សិទ្ធី បានប្រាប់អង្គជំនុំជម្រះទៀតថា ក្រុមខ្មែរក្រហមបានប្រកាសឱ្យអតីតទាហាន និងមន្ត្រីរដ្ឋការលន់ នល់ និងប្រជាជនទៅចុះឈ្មោះដើម្បីយកអង្ករ ហើយនៅពេលនោះអតីតទាហាន លន់ នល់ ដែលស្លៀកពាក់ទាហាននៅឡើយ បានទៅចុះឈ្មោះ បន្ទាប់មកអ្នកទាំងនោះត្រូវបានប្រមូល និងយកទៅសម្លាប់ចោល ជាពិសេសអតីតមន្ត្រីរដ្ឋការ និងទាហានរបស់របប លន់ នល់។
សំណុំរឿង០០២/០១គឺជាការជំនុំជម្រះលើកទីមួយនៃការជំនុំជម្រះយ៉ាងតិចពីរប្រឆាំងនឹង ខៀវ សំផន អតីតប្រមុខរដ្ឋនៃកម្ពុជាប្រជាធិបតេយ្យ និង នួន ជា អតីតអនុលេខាបក្សកុម្មុយនីស្តកម្ពុជា។ បទចោទនៅក្នុងសំណុំរឿង ០០២/០១ គឺផ្តោតលើបទឧក្រិដ្ឋប្រឆាំងមនុស្សជាតិ ដែលរងការចោទប្រកាន់ក្នុងអំឡុងពេលជម្លៀសនៅទីក្រុងភ្នំពេញ ក្នុងខែមេសា ឆ្នាំ១៩៧៥ និងការផ្លាស់ទីដោយបង្ខំបន្តបន្ទាប់ពីតំបន់ដទៃទៀត រួមទាំងការកាប់សម្លាប់លើអតីតមន្ត្រីរដ្ឋការ និងទាហានៃរបបខ្មែរក្រហម ដែលរងការចោទប្រកាន់នៅទួលពោធិ៍ជ្រៃ ក្នុងខេត្តពោធិ៍ សាត់៕
© រក្សាសិទ្ធិដោយ thmeythmey.com