ជាតិ
នយោបាយជាតិ
ភាពមិនច្បាស់លាស់នៃកិច្ចប្រជុំរឿងព្រំដែនកម្ពុជា-វៀតណាម
× តាមគម្រោង ចាប់ពីថ្ងៃទី៦ដល់ នេះតទៅរហូតដល់ ថ្ងៃទី៩ ខែកក្កដា គណៈកម្មការចម្រុះព្រំដែនគោកកម្ពុជា និងវៀតណាម ចាប់ផ្តើមប្រជុំ ដើម្បីដោះស្រាយវិវាទព្រំដែនដែលនៅសេសសល់ និងបញ្ហាតាមខ្សែបន្ទាត់ព្រំដែនផ្សេងទៀតកន្លងមក។ ក៏ប៉ុន្តែ កិច្ចប្រជុំនេះ មន្ត្រីជាន់ខ្ពស់រដ្ឋាភិបាលជាច្រើនរូប សុទ្ធតែមិនដឹងពីទីតាំងពិតប្រាដកដែលមន្ត្រីព្រំដែនបើកកិច្ចប្រជុំនោះទេ។
ប្រធាននិងអនុប្រធានគណៈកម្មាធិការព្រំដែនកម្ពុជា លោក វ៉ា គឹមហុង និងលោកស្រី កុយ ពិសី សុទ្ធតែមិនលើកទូរសព្ទទេនៅព្រឹកថ្ងៃចន្ទនេះ។ រីឯអ្នកពាក្យក្រសួងការបរទេសកម្ពុជា លោក ជុំ សុន្ទរី និងអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ព្រមទាំងលោក ទិត សុធា មន្រ្តីអង្គភាពប្រតិកម្មរហ័សនៃទីស្តីការគណៈរដ្ឋមន្រ្តី ក៏សុទ្ធតែអះអាងថា ពួកខ្លួនមិនបានដឹងពីកិច្ចប្រជុំគណៈកម្មការចម្រុះព្រំដែនគោកកម្ពុជា និងវៀតណាម រៀបចំធ្វើនៅកន្លែងណា និងនៅម៉ោងប៉ុន្មាននោះដែរ។
តាមគម្រោងកិច្ចប្រជុំនេះ ត្រូវធ្វើឡើងនៅក្នុងខេត្តសៀមរាប តែកាលពីថ្ងៃអាទិត្យម្សិលមិញ លោក វ៉ា គឹមហុង ប្រធានគណៈកម្មការចម្រុះព្រំដែនកម្ពុជា បានបញ្ជាក់ថា កិច្ចប្រជុំនេះ ត្រូវប្តូរមកធ្វើនៅរាជធានីភ្នំពេញវិញ។ ហើយលោក ក៏មិនបញ្ជាក់ថា កិច្ចប្រជុំនេះ ធ្វើនៅរាជធានីភ្នំពេញ ត្រង់កន្លែងណានោះទេ។
កាចុះផ្សាយរបស់សារព័ត៌មានCEN ដែលស្រង់សម្តីមន្រ្តីជាន់ខ្ពស់ទីស្តីការគណៈរដ្ឋមន្រ្តីដោយមិនបញ្ចេញឈ្មោះ បានឲ្យដឹងថា កិច្ចប្រជុំគណៈកម្មការចម្រុះព្រំដែនគោកកម្ពុជា និងវៀតណាមនេះ ចាប់ផ្តើមធ្វើដោយស្ងាត់ៗនៅភ្នំពេញនៅថ្ងៃចន្ទនេះ ហើយការប្តូរទីតាំងមកភ្នំពេញ ដើម្បីការពារសុវត្ថិភាពមន្រ្តីជាន់ខ្ពស់វៀតណាម។
ចំណែកឯសារព័ត៌មាន Fresh News វិញ បានចុះផ្សាយផ្ទុយពីសារព័ត៌មានCEN ដោយសារព័ត៌មាននេះយោងទៅតាមសម្តីរបស់លោក វ៉ា គឹមហុង ថា កិច្ចប្រជុំគណៈកម្មការចម្រុះព្រំដែនគោកកម្ពុជា និងវៀតណាម ត្រូវលើកពេលទៅធ្វើនៅថ្ងៃទី ០៧ ខែកក្កដា ស្អែកវិញ នៅទីស្តីការគណៈរដ្ឋមន្រ្តី។ បើតាមលោក វ៉ា គឹមហុង ដែលប្រាប់សារព័ត៌មាន Fresh News ការលើកពេលនេះ ដោយសារមន្រ្តីព្រំដែនវៀតណាមទើបមកដល់កម្ពុជា ហើយរៀបចំមិនទាន់៕
© រក្សាសិទ្ធិដោយ thmeythmey.com