ជាតិ
នយោបាយជាតិ
តំណារាស្ដ្រ CNRP ស្នើឲ្យលោក ហ៊ុន សែន ទប់ស្កាត់ការកាប់បំផ្លាញព្រៃឈើនៅខេត្តរតនគិរី
×
ក្រុមអ្នកតំណាងរាស្ដ្រគណសង្គ្រោះជាតិ ស្នើឲ្យប្រមុខរដ្ឋាភិបាលជួយអន្តរាគមន៍បញ្ឈប់សកម្មភាពក្រុមហ៊ុនរបស់លោក ទ្រី ភាព និងក្រុមហ៊ុនរបស់លោក អាន ម៉ារ៉ាឌីដែលកំពុងតែធ្វើអាជីវកម្មកាប់បំផ្លាញព្រៃឈើ នៅក្នុងភូមិសាស្ដ្រឧទ្យានជាតិវីរៈជ័យ ខេត្ដរតនគិរី។ នេះបើតាមលិខិតរបស់ក្រុមតំណាងរាស្ដ្របក្សប្រឆាំង ផ្ញើជូនលោក ហ៊ុន សែន ចុះថ្ងៃទី៨ ខែកក្កដានេះ។
ក្រុមអ្នកតំណាងរាស្ត្របក្សប្រឆាំង បានប្រមូលគ្នាចុះហត្ថលេខាលើលិខិតរួមមួយ ដាក់ជូនលោក ហ៊ុន សែន ដើម្បីជួយទប់ស្កាត់ជាបន្ទាន់នូវសកម្មភាពអាជីវកម្ម កាប់បំផ្លាញព្រៃឈើយ៉ាងអនាធិបតេយ្យពីសំណាក់ក្រុមហ៊ុនរបស់ លោក ទ្រី ភាព និងក្រុមហ៊ុនរបស់ លោក អាន ម៉ារាឌី។
ការចោទប្រកាន់ក្រុមហ៊ុនទាំងពីរថាបានកាប់ព្រៃឈើធ្វើអាជីវកម្ម ពីសំណាក់អ្នកតំណារាស្ត្របក្សប្រឆាំងនេះ ដោយសំអាងថា បានប្រទះឃើញសកម្មភាពនៃការកាប់បំផ្លាញ និងដឹកជញ្ជូនព្រៃឈើយ៉ាងអនាធិបតេយ្យ ពេលដែលក្រុមខ្លួនចុះទៅពិនិត្យផ្ទាល់នៅក្នុងឧទ្យានជាតិជីរៈជ័យ ដែលជាតំបន់ព្រៃស្រោង ស្ថិតនៅក្នុងតំបន់កន្ទុយនាគ ស្រុកតាវែង ខេត្តរតនគិរី កាលពីថ្ងៃទី៩ ខែមិថុនា ឆ្នាំ២០១៥ កន្លងទៅ។
ខ្លឹមសារនៃលិខិតដដែលបន្តថា បច្ចុប្បន្ននេះ ព្រៃឈើនៅក្នុងឧទ្យានជាតិវីរៈជ័យ តំបន់កន្ទុយនាគកំពុងតែប្រឈមយ៉ាងខ្លាំងពីការកាប់បំផ្លាញ និងអាចឈានទៅរកវិនាសកម្មព្រៃឈើ ដោយសារតែក្រុមហ៊ុន ទាំងពីរនេះ។
តំណាងរាស្ដ្រទាំងនោះបញ្ជាក់ថា ប្រសិនបើគ្មានការទប់ស្កាត់ទាន់ពេលទេ ព្រៃឈើនៅតំបន់នោះនឹងត្រូវបាត់បង់ទាំងស្រុងនាពេលដ៏ខ្លីខាងមុខជាមិនខាន៕
© រក្សាសិទ្ធិដោយ thmeythmey.com