កីឡាជាតិ
ជាតិ
FIFA Ranking៖ ចាញ់២លើកក្នុងជម្រុះ World Cup នាំឲ្យកម្ពុជាធ្លាក់ទៅចំណាត់ថ្នាក់លេខ១៨១វិញ
× ក្រុមកីឡាបាល់ទាត់ជម្រើសជាតិកម្ពុជា បានធ្លាក់ពីចំណាត់ថ្នាក់លេខ១៧៨ទៅលេខ១៨១វិញ នៅក្នុងតារាងចំណាត់ថ្នាក់របស់សហព័ន្ធកីឡាបាល់ទាត់អន្តរជាតិ (FIFA World Rangking) ដែលចេញផ្សាយនៅថ្ងៃទី៩ ខែកក្កដា នេះ។
ចំណាត់ថ្នាក់នេះ គឺផ្អែកទៅលើការប្រកួតចំនួន៣លើករបស់ក្រុមជម្រើសជាតិកម្ពុជា ក្រោមការដឹកនាំរបស់គ្រូបង្វឹកជប៉ុន លោក Ohara Kazunori កាលពីអំឡុងខែមិថុនា។ នាជំនួបមិត្តភាពអន្តរជាតិជាមួយមីយ៉ាន់ម៉ារកាលពីថ្ងៃទី៥ ខែមិថុនា នៅប្រទេសថៃ កម្ពុជា បានយកឈ្នះក្នុងលទ្ធផល ១-០ ។ ជ័យជម្នះបាននាំឲ្យកម្ពុជាទទួលបានអត្រាពិន្ទុ ១៤៥.៣៥ ប៉ុន្តែក្នុងយុទ្ធនាការជម្រុះ World Cup ជុំទីពីរប្រចាំតំបន់អាស៊ី កម្ពុជា បានចាញ់សឹង្ហបុរី ៤-០ និងចាញ់អាហ្វហ្គានីស្ថាន ១-០ នៅពហុកីឡដ្ឋានជាតិ។
យោងតាម FIFA Ranking កម្ពុជាស្ថិតនៅលេខរៀងទី១៨១ ដូចម៉ាកាវ ដែលខ្លួនបានទម្លាក់ចេញពីការប្រកួតជម្រុះបឋមនៃព្រឹត្តិការណ៍ World Cup ។ ក្រុមដែលនៅពីលើកម្ពុជា និងម៉ាកាវ មានដូចជា យ៉េមែន ប៉ាគីស្ថាន ម៉ាល់ឌីវ ឡាវ និង ចិន-តៃប៉ិ ខណៈក្រុមនៅតំបន់អាស៊ីដែលមានចំណាត់ថ្នាក់ទាបជាងកម្ពុជា និងម៉ាកាវ មាន ស្រីលង្កា ប្រ៊ុយណេ នេប៉ាល់ និងម៉ុងហ្គោលី។
សម្រាប់ចំណាត់ថ្នាក់រួមលើពិភពលោក អាហ្សង់ទីនឈរលេខមួយ ហើយអាល្លឺម៉ង់ បែលហ្ស៊ិក កូឡុំប៊ី ហូឡង់ ប្រេស៊ីល ព័រទុយហ្គាល់ រ៉ូម៉ានី អង់គ្លេស និងវេលស៍ ស្ថិតក្នុងតំបន់ top 10 ៕
© រក្សាសិទ្ធិដោយ thmeythmey.com